ຕາມຂ່າວສານຊິນຮວາ: ວັນທີ 11 ພະຈິກ, ວາລະສານ "ຮັ້ນຢີຊື້ເຈ້" ແປວ່າ "ໂລກແຫ່ງພາສາຈີນ" ເຊິ່ງແມ່ນວາລະສານຮຽນພາສາຈີນທີ່ແນໃສ່ຜູ່ອ່ານຂອງຕ່າງປະເທດພຽງສະບັບດຽວຂອງຈີນໃນປັດຈຸບັນໄດ້ເລີ່ມພິມຈຳໜ່າຍຢູ່ທີ່ປັກກິ່ງ, ກາຍເປັນຂົວຕໍ່ໃໝ່ສຳລັບຜູ່ອ່ານຂອງຕ່າງປະເທດເຂົ້າໃກ້ກັບຈີນ ແລະຊອກຮູ້ວັດທະນະທຳຈີນ.
ທ່ານຈູ່ສຽວຈ້ຽນ ບັນນາທິການໃຫຍ່ ສາສະດາຈານມະຫາວິທະຍາໄລສ້າງຄູປັກກິ່ງແນະນຳວ່າ, ວາລະສານ "ໂລກແຫ່ງພາສາຈີນ" ຕົ້ນຕໍພິມຈຳໜ່າຍຕໍ່ຜູ່ອ່ານຂອງຕ່າງປະເທດ, ແລະກໍລວມທັງອົງການຕ່າງປະເທດປະຈຳຈີນ ເຊັ່ນ ສະຖານທູດແລະບໍລິສັດການຄ້າຕ່າງປະເທດປະຈຳຈີນເປັນຕົ້ນ. ປັດຈຸບັນ ວາລະສານດັ່ງກ່າວມີສະບັບພາສາຈີນແລະພາສາອັງກິດ, ແຕ່ລະສອງເດືອນພິມຈຳໜ່າຍສະບັບໜຶ່ງ.
ທ່ານຈູ່ສຽວຈ້ຽນກ່າວວ່າ, ຄຽງຄູ່ກັບເສດຖະກິດຂອງຈີນໄດ້ພັດທະນາແລະການແລກປ່ຽນກັບຕ່າງປະເທດເລັ່ງໄວເຂົ້າ, ຜູ່ຮຽນພາສາຈີນໃນຂອບເຂດທົ່ວໂລກນັບມື້ນັບເພີ່ມຂຶ້ນ. ປັດຈຸບັນ ຢູ່ຕ່າງປະເທດມີປະມານ 30 ລ້ານຄົນຮຽນພາສາຈີນ.
|