ຕາມ​ຂ່າວ CRI: ນັບ​ແຕ່ຈີນ​ປະຕິບັດ "​ໂຄງການ​ແສງຕາ​ເວັນ" ທີ່​ອົບຮົມ​ແລະ​ຍ້າຍ​ແຮງ​ງານ​ຊົນ​ນະ​ບົດ​ນັ້ນ​ເປັນ​ເວລາ 2 ປີ​ມາ​ນີ້, ການ​ເງິນ​ສູນ​ກາງ​ໄດ້​​ເບີກ​ເງິນ​ອຸດ​ໜູນ 1 ຕື້ 250 ລ້ານ​ຢວນ, ​ໄດ້​ອົບຮົມ​ແຮງ​ງານ​ຊົນນະບົດ​ເຖິງ 8 ລ້ານ 3 ​ແສນ​ຄົນ.

"​ໂຄງການ​ແສງ​ຕາ​ເວັນ" ​ເລີ່​ມດຳ​ເນີນ​ເມື່ອ​ປີ 2004, ມີ​ວັດ​ຖຸປະສົງ​ຍົກ​ຄຸນ​ທາດ​ແລະ​ຝີ​ມື​ປະ​ກອບ​ອາຊີບ​ຂອງ​ແຮງ​ງານ​ຊົນນະບົດ​ໃຫ້​ສູງ​ຂຶ້ນ, ຊຸກ​ຍູ້​ໃຫ້​ແຮງ​ງານ​ຊົນ​ນະ​ບົດ​ຍ້າຍ​ໄປ​ສູ່​ຂະ​ແໜງ​ການທີ່​ບໍ່​ແມ່ນ​ກະສິກຳ​ແລະຍ້າຍ​ໄປ​ຕົວ​ເມືອງ, ​ເພື່ອ​ໃຫ້​ແຮງ​ງານ​ຊົນ​ນະ​ບົດ​ມີ​ວຽກ​ເຮັດ​ງານ​ທຳ​ຢ່າງ​ໝັ້ນທ່ຽງ​ແລະ​ມີ​ລາຍ​ໄດ້​ເພີ່ມ​ຂຶ້ນ

ຈີນ​ແມ່ນ​ປະ​ເທດ​ໃຫຍ່​ດ້ານ​ກະສິກຳ, ຊາວ​ກະສິກອນ​ກວມສ່ວນຫຼາຍ​ໃນ​ປະຊາກອນ​ທົ່ວ​ປະ​ເທດ, ​ ​ໃນ​ຊົນນະບົດມີ​ແຮງ​ງານເຫຼືອຫຼາຍ. ​ໃນຫຼາຍປີ​ມາ​ນີ້, ຄຽງ​ຄູ່​ກັບ​ເສດຖະ​ກິດ​ຂອງ​ຕົວ​ເມືອງ​ແລະ​ຊົນ​ນະບົດ​ໄດ້​ພັດທະນາ, ຊາວ​ກະສິກອນ​ທີ່​​ເຮັດວຽກ​​ໃນ​ຂົງ​ເຂດ​ທີ່ບໍ່​ແມ່ນ​ກະ​ສິ​ກຳ​ນັ້ນ​ນັບ​ມື້​ນັບ​ຫຼາຍ. ​ແຕ່​ຄຸນ​ທາດ​ວັດທະນະທຳ​ແລະ​ຝີ​ມືປະ​ກອບ​ອາ​ຊີບ​ຂອງ​ແຮງ​ງານ​ຊົນ​ນະ​ບົດ​ຕ່ຳ​ໂດຍ​ທົ່ວ​ໄປ, ຕ້ອງການ​ອົບຮົມ​ໂດຍ​ດ່ວນ.