ຕາມຂ່າວ CIR: ວັນທີ 15 ພະຈິກ, ທ່ານຫູຈິນທາວ ປະທານປະເທດຈີນໄດ້ເດີນທາງອອກຈາກປັກກິ່ງ, ໄປຢ້ຽມຢາມຫວຽດນາມ ລາວ ອິນເດຍແລະປາກິສຖານທາງລັດຖະກິດຕາມຄຳເຊີນ, ແລະເຂົ້າຮ່ວມກອງປະຊຸມບໍ່ເປັນທາງການຂອງຜູ່ນຳອົງການຮ່ວມມືດ້ານເສດຖະກິດພາກພື້ນອາຊີປາຊີຟິກຫຼືເອເປັກຄັ້ງທີ 14 ທີ່ຈະຈັດຂຶ້ນຢູ່ທີ່ຮ່າໂນຍຂອງຫວຽດນາມ.
ນີ້ແມ່ນການເຄື່ອນໄຫວທາງການທູດທີ່ສຳຄັນເທື່ອໜຶ່ງຂອງຜູ່ນຳຂັ້ນສູງຂອງຈີນທີ່ມີຕໍ່ພາກ ພື້ນອາຊີແຕ່ປີນີ້ມາ. ເຈົ້າໜ້າທີ່ກະຊວງການຕ່າງປະເທດຈີນກ່າວວ່າ, ການຢ້ຽມຢາມເທື່ອນີ້ມີຄວາມໝາຍສຳຄັນແລະມີຜົນສະທ້ອນເລິກເຊິ່ງຍາວໄກຕໍ່ການຊຸກຍູ້ການພົວພັນລະຫວ່າງຈີນກັບ 4 ປະເທດດັ່ງກ່າວ, ແລະກໍມີຄວາມໝາຍສຳຄັນຍິ່ງຕໍ່ການຊຸກຍູ້ການຮ່ວມມືພາກພື້ນອາຊີປາຊີຟິກ.
ໃນຄະນະຢ້ຽມຢາມເທື່ອນີ້ ຍັງມີທ່ານນາງຫຼິວຢົງຊິ່ງ ພັນລະຍາທ່ານຫູຈິນທາວ ທ່ານຫວາງກ່າງ ເລຂາຄະນະເລຂາສູນກາງພັກກອມມູນິດຈີນ ຫົວໜ້າຫ້ອງວ່າການສູນກາງ ທ່ານຫຼີຈ້າວຊິ່ງ ລັດຖະມົນຕີວ່າການກະຊວງການຕ່າງປະເທດ ທ່ານຫວາງເຈ່ຍຢຸ້ຍ ຫົວໜ້າຄະນະພົວພັນກັບຕ່າງປະເທດສູນກາງພັກກອມມູສິດຈີນ ທ່ານມາຄາຍ ປະທານຄະນະກຳມະການການພັດທະນາແລະການປະຕິຮູບແຫ່ງລັດແລະທ່ານປໍຊີລາຍ ລັດຖະມົນຕີວ່າການກະຊວງການຄ້າຈີນເປັນຕົ້ນ.
|