|
ຕາມຂ່າວ CRI: ຈີນກັບຫວຽດນາມມີພູຜາແມ່ນ້ຳລຳເຊຕິດຈອດກັນ ມີວັດທະນະທຳຄ້າຍຄືກັນ. ໃນຫຼາຍປີມານີ້, ພາຍໃຕ້ການສະໜັບສະໜູນຢ່າງແຂງແຮງຂອງສອງພັກສອງລັດ, ການພົວພັນທີ່ມີໄມຕີຈິດມິດຕະພາບຖານບ້ານໃກ້ເຮືອນຄຽງລະຫວ່າງຈີນກັບຫວຽດນາມໄດ້ມີຄວາມຄືບໜ້າໃໝ່ຢ່າງບໍ່ຢຸດຢັ້ງ. ຂະນະດຽວກັນ, ການຮຽນແລະການແລກປ່ຽນກັນດ້ານພາສາລະຫວ່າງສອງປະເທດກໍນັບມື້ນັບຟົດຟື້ນ, "ການນິຍົມກັນຮຽນພາສາຈີນ" ແລະ "ການນິຍົມກັນຮຽນພາສາຫວຽດນາມ" ໄດ້ກາຍເປັນພາບທີ່ສວຍງາມຂອງການພົວພັນໄມຕີຈິດລະຫວ່າງສອງປະເທດ. ຕໍ່ໄປເຊີນຟັງບົດແຈ້ງຂ່າວປະກອບສຽງຂອງນັກຂ່າວ CRI ທີ່ພາດຫົວເລື່ອງວ່າ: ຂົວທາງພາສາທີ່ເຊື່ອມໂຍງມິດຕະພາບລະຫວ່າງຈີນຫວຽດນາມ.
ມະຫາວິທະຍາໄລຮ່າໂນຍສ້າງຕັ້ງຂຶ້ນເມື່ອປີ 1959, ໃນຄາວນັ້ນຊື່ວ່າມະຫາວິທະຍາໄລພາສາຕ່າງປະເທດຮ່າໂນຍ, ໃນເວລາໂຮງຮຽນຫາກໍ່ສ້າງຕັ້ງຂຶ້ນກໍຕັ້ງໃຫ້ມີພະແນກພາສາຈີນໂລດ, ລະດັບການສອນພາສາຈີນແມ່ນມີຊື່ສຽງດົ່ງດັງໃນທົ່ວປະເທດຫວຽດນາມ. ໃນມະຫາວິທະຍາໄລດັ່ງກ່າວມີນັກສຶກສາ 3 ຄົນຊີງໄດ້ລາງວັນໃນການແຂ່ງຂັນ "ຂົວທາງພາສາ" ທີ່ຈັດຂຶ້ນຢູ່ຈີນໃນປີກາຍແລະປີນີ້. ທ່ານໂດະດຸຍຈວຽນ ຮອງອະທິການບໍດີມະຫາວິທະຍາໄລດັ່ງກ່າວເວົ້າວ່າ:
"ກໍຍ້ອນຄຸນນະພາບການສິດສອນຂອງພວກຂ້າພະເຈົ້າສູງແລະດີຄືແນວນີ້, ສະນັ້ນ ມະຫາວິທະຍາໄລພວກຂ້າພະເຈົ້າຈຶ່ງມີແຮງດຶງດູດເພີ່ມຂຶ້ນຢ່າງບໍ່ຢຸດຢັ້ງ. ປັດຈຸບັນ ບໍ່ວ່າເວົ້າສຳລັບທົ່ວປະເທດຫວຽດນາມຫຼືເວົ້າສຳລັບຮ່າໂນຍແລ້ວ, ຄວາມຮຽກຮ້ອງຕ້ອງການຮຽນພາສາຈີນພວມເພີ່ມຂຶ້ນຢ່າງບໍ່ຢຸດຢັ້ງ."
ທ່ານໂດະດຸຍຈວຽນກ່າວວ່າ, ພາຍໃຕ້ການຊ່ອຍເຫຼືອຂອງລັດຖະບານຈີນແລະສະຖານທູດຈີນປະຈຳຫວຽດນາມ, ຄູສອນໃນພະແນກພາສາຈີນຂອງມະຫາວິທະຍາໄລຮ່າໂນຍລ້ວນແຕ່ໄດ້ຮັບການອົບຮົມດ້ານພາສາຈີນຢ່າງເປັນລະບົບ, ແຕ່ລະປີ ຍັງມີນັກຮຽນຫວຽດນາມຈຳນວນຫຼວງຫຼາຍໄປຮຽນຕໍ່ຢູ່ມະຫາວິທະຍາໄລປະເພດຕ່າງໆຂອງຈີນອີກດ້ວຍ. ປັດຈຸບັນ ພະແນກພາສາຈີນມະຫາວິທະຍາໄລຮ່າໂນຍມີນັກສຶກສາປະມານ 1600 ຄົນ, ແມ່ນໜຶ່ງໃນພະແນກທີ່ມີນັກສຶກສາຫຼາຍກວ່າໝູ່ໃນມະຫາວິທະຍາໄລດັ່ງກ່າວ, ແຕ່ລະປີໄດ້ບຳລຸງສ້າງນາຍພາສາແລະຄູສອນພາສາຈີນ ໃຫ້ແກ່ອົງການພັກລັດ ວິສາຫະກິດແລະຫົວໜ່ວຍຕ່າງໆຂອງຫວຽດນາມເປັນຈຳນວນຫຼວງຫຼາຍ.
ໃນເວລາກ່າວເຖິງສາເຫດທີ່ຮຽນພາສາຈີນ, ນາງດັງຫົງທູ່ ນັກສຶກສາປີສາມຂອງພະແນກພາສາຈີນມະຫາວິທະຍາໄລຮ່າໂນຍບອກນັກຂ່າວວ່າ:
"ຂ້ອຍສົນໃຈນຳແນວຄິດວັດທະນະທຳຂອງຈີນທີ່ສຸດ, ຈີນມີປະຫວັດວັດທະນະທຳອັນຍາວນານ, ໃນຫຼາຍສີບປີມານີ້, ເສດຖະກິດຈີນໄດ້ພັດທະນາຢ່າງວ່ອງໄວ, ສະນັ້ນ ຄົນຫວຽດນາມຄິດຢາກຖອດຖອນບົດຮຽນຂອງຈີນເພື່ອພັດທະນາເສດຖະກິດຫວຽດນາມ."
ຂະນະດຽວກັນ, ຢູ່ພາກຕາເວັນອອກສຽງໃຕ້ຂອງຈີນ ເຊັ່ນ ເຂດກວາງຊີແລະແຂວງຢຸນນານກໍມີຄົນຮຽນພາສາຫວຽດນາມນັບມື້ນັບຫຼາຍ.
ຕາມສະຖິຕິຂອງພາກສ່ວນທີ່ກ່ຽວຂ້ອງຂອງຈີນ, ປັດຈຸບັນ, ນັກສຶກສາຈີນທີ່ຮຽນພາສາຫວຽດນາມຢູ່ຫວຽດນາມ ພຽງແຕ່ຢູ່ຮ່າໂນຍກໍມີ 1000 ຄົນຂຶ້ນໄປ. ທ່ານໂດະດຸຍຈວຽນ ຮອງອະທິການບໍດີມະຫາວິທະຍາໄລຮ່າໂນຍເວົ້າວ່າ:
"ປັດຈຸບັນ ມີນັກສຶກສາຈີນທີ່ມາຮຽນພາສາຫວຽດນາມຢູ່ມະຫາວິທະຍາໄລພວກຂ້າພະເຈົ້າຫຼາຍສົມຄວນ, ແຕ່ຍ້ອນພວກຂ້າພະເຈົ້າມີຄວາມຫຍຸ້ງຍາກດ້ານຫໍພັກ, ສະນັ້ນ ປັດຈຸບັນມີແຕ່ຮັບເອົານັກສຶກສາຈີນຢ່າງຈຳກັດ."
ການທີ່ມີນັກຮຽນຮຽນພາສາຂອງກັນແລະກັນຢ່າງຫຼວງຫຼາຍນັ້ນ ແມ່ນຍ້ອນວ່າ ໃນບໍ່ເທົ່າໃດປີມານີ້ ການພົວພັນທາງການເມືອງລະຫວ່າງຈີນກັບຫວຽດນາມນັບມື້ນັບແໜ້ນແຟ້ນ ການຮ່ວມມືດ້ານເສດຖະກິດການຄ້າກ້າວສູ່ລວງເລິກເປັນກ້າວໆ. ໃນຖານະເປັນຂົວທາງແຫ່ງການແລກປ່ຽນກັນ, ການແລກປ່ຽນກັນດ້ານພາສາທີ່ນັບມື້ນັບຟົດຟື້ນຈະຂຽນໜ້າໃໝ່ຂອງການຮ່ວມມືແລະມິດຕະພາບທີ່ມີມູນເຊື້ອລະຫວ່າງຈີນຫວຽດນາມໃນສະຕະວັດໃໝ່.
|
