|
|
(GMT+08:00)
2006-11-15 18:36:35
|
|
ທ່ານຫູຈິນທາວຢ້ຽມຢາມ 4 ປະເທດອາຊີມີຄວາມໝາຍສຳຄັນແລະມີຜົນສະທ້ອນອັນເລິກເຊິ່ງຍາວໄກ
cri
Author: da
ຕາມຂ່າວCRI:ທ່ານຫູຈິນທາວ ປະທານປະເທດຈີນໄດ້ເດີນທາງອອກຈາກປັກກິ່ງໃນວັນທີ 15 ພະຈິກນີ້,ໄປຢ້ຽມຢາມຫວຽດນາມ ລາວ ອິນເດຍແລະປາກີສະຖານທາງລັດຖະກິດ,ແລະຈະເຂົ້າຮ່ວມກອງປະຊຸມບໍ່ເປັນທາງການຂອງຜູ່ນຳອົງການຮ່ວມມືເສດຖະກິດອາຊີປາຊິຟິກຫຼືເອເປັກຄັ້ງທີ 14 ທີ່ຈັດຂຶ້ນຢູ່ຮ່າໂນ້ຍຂອງຫວຽດນາມ. ນີ້ແມ່ນການເຄື່ອນໄຫວທາງການທູດທີ່ສຳຄັນເທື່ອໜຶ່ງອີກຂອງຜູ່ນຳລະດັບສູງຂອງຈີນຢູ່ເຂດອາຊີແຕ່ປີນີ້ມາ. ເຈົ້າໜ້າທີ່ກະຊວງການຕ່າງປະເທດຈີນກ່າວວ່າ,ການຢ້ຽມຢາມເທື່ອນີ້ມີຄວາມໝາຍສຳຄັນຕໍ່ການຊຸກຍູ້ການພົວພັນລະຫວ່າງຈີນກັບ 4 ປະເທດດັ່ງກ່າວຢ່າງຮອບດ້ານ,ມີຜົນສະທ້ອນອັນເລິກເຊິ່ງຍາວໄກ,ມີຄວາມໝາຍສຳຄັນທີ່ສຸດຕໍ່ການຮ່ວມມືໃນພາກພື້ນອາຊີປາຊິຟິກ.
ຫວຽດນາມແມ່ນປະເທດໃກ້ຄຽງທີ່ສຳຄັນຂອງຈີນ,ໃນຫຼາຍປີມານີ້ ການພົວພັນລະຫວ່າງສອງປະເທດໄດ້ຂະຫຍາຍຕົວຢ່າງຮອບດ້ານ,ບັນຫາທີ່ຕົກຄ້າງມາແຕ່ປະຫວັດສາດໄດ້ຮັບການແກ້ໄຂໃຫ້ຕົກເປັນກ້າວໆ,ການແລກປ່ຽນບົດຮຽນດ້ານການປົກຄອງນັບມື້ນັບກ້າວສູ່ລວງເລິກ,ໄດ້ຮັກສາການປະສານງານແລະປະສານສົມທົບກັນເປັນຢ່າງດີໃນວຽກງານລະຫວ່າງຊາດ.ທ່ານຊຸ່ຍທ່ຽນໄຂ ຜູ່ຊ່ວຍລັດຖະມົນຕີວ່າການກະຊວງການຕ່າງປະເທດຈີນແນະນຳວ່າ,ທ່ານຫູຈິນທາວ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນໄປຢ້ຽມຢາມຫວຽດນາມທາງລັດຖະກິດ,ແມ່ນຜູ່ນຳສູງສຸດຂອງພັກແລະລັດຈີນຢ້ຽມຢາມຫວຽດນາມເປັນເທື່ອທຳອິດພາຍຫຼັງກອງປະຊຸມໃຫຍ່ຄັ້ງທີ 10 ຂອງພັກກອມມູນິດຫວຽດນາມແລະເລືອກຕັ້ງຄະນະນຳພາຊຸດໃໝ່.ທ່ານເວົ້າວ່າ:
"ຮອດຍາມນັ້ນ,ຜູ່ນຳສອງປະເທດຈີນກັບຫວຽດນາມຈະແລກປ່ຽນຄວາມເຫັນຢ່າງເລິກເຊິ່ງກ່ຽວກັບບັນຫາສຳຄັນໃນການພົວພັນລະຫວ່າງສອງພັກແລະສອງລັດຈາກດ້ານຍຸດທະສາດແລະດ້ານມະຫາພາກ. ພວກຂ້າພະເຈົ້າຫວັງວ່າ ຜ່ານຈາກການຢ້ຽມຢາມເທື່ອນີ້ ຈະເພີ່ມທະວີມິດຕະພາບທີ່ມີມູນເຊື້ອລະຫວ່າງຈີນກັບຫວຽດນາມໃຫ້ເລິກເຊິ່ງກວ່າເກົ່າ,ເພີ່ມຄວາມໄວ້ເນື້ອເຊື່ອໃຈເຊິ່ງກັນແລະກັນທາງການເມືອງ,ເປີດກວ້າງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ,ພ້ອມກັນກຳນົດທິດຂະຫຍາຍການພົວພັນລະຫວ່າງຈີນກັບຫວຽດນາມ."
ລາວແມ່ນປະເທດເພື່ອນບ້ານໃກ້ຄຽງທີ່ມີພູຜາແມ່ນ້ຳຕິດຈອດກັບຈີນ. ປີນີ້ແມ່ນປີທີ່ຈີນກັບລາວສ້າງສາຍສຳພັນທາງການທູດຄົບຮອບ 45 ປີ,ສອງປະເທດໄດ້ຈັດການເຄື່ອນໄຫວສະເຫຼີມສະຫຼອງຢ່າງເປັນລະບົບ,ມິດຕະພາບອັນເປັນມູນເຊື້ອແລະການຮ່ວມມືໃນຂົງເຂດຕ່າງໆໄດ້ຮັບການເພີ່ມທະວີຕື່ມອີກ.ທ່ານຊຸ່ຍທ່ຽນໄຂເວົ້າວ່າ:
"ທ່ານຫູຈິນທາວ ເລຂາທິການໃຫຍ່ສູນກາງພັກ ປະທານປະເທດຈີນຢ້ຽມຢາມລາວທາງລັດຖະກິດ,ແມ່ນຜູ່ນຳສູງສຸດຂອງຈີນຢ້ຽມຢາມລາວເປັນເທື່ອທຳອິດຫຼັງຈາກທີ່ລາວໄດ້ເລືອກຕັ້ງຄະນະນຳພາຊຸດໃໝ່ຂອງພັກແລະລັດລາວ,ທັງແມ່ນຜູ່ນຳສູງສຸດຈີນຢ້ຽມຢາມລາວອີກຫຼັງຈາກ 6 ປີ. ພວກຂ້າພະເຈົ້າຫວັງໃຫ້ຜ່ານຈາກການຢ້ຽມຢາມເທື່ອນີ້,ເພີ່ມທະວີມິດຕະພາບທີ່ມີມູນເຊື້ອລະຫວ່າງຈີນກັບລາວ,ເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນແລະກັນທາງການເມືອງ,ເປີດກວ້າງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດໃຫ້ກ້າວສູ່ລວງເລິກ,ພ້ອມກັນກຳນົດທິດຂະຫຍາຍຕົວຂອງການພົວພັນລະຫວ່າງສອງຝ່າຍໃນອະນາຄົດ."
ຈີນແລະອິນເດຍລ້ວນແຕ່ແມ່ນປະເທດພວມພັດທະນາ,ທັງແມ່ນປະເທດໃຫຍ່ໃນອາຊີ.ຄວາມໝາຍຂອງການພົວພັນລະຫວ່າງຈີນກັບອິນເດຍໄດ້ລື່ນກາຍຂອບເຂດສອງຝ່າຍ. ໃນເດືອນເມສາປີ 2005 ທ່ານເວີນເຈຍປາວ ນາຍົກລັດຖະມົນຕີຈີນໄດ້ຢ້ຽມຢາມອິນເດຍຢ່າງມີຜົນສຳເລັດ,ສອງປະເທດປະກາດສ້າງຕັ້ງການພົວພັນຄູ່ຮ່ວມມືຍຸດທະສາດທີ່ມຸ່ງໜ້າໄປສູ່ສັນຕິພາບແລະສະຖຽນລະພາບ,ອັນເປັນຂີດໝາຍສະແດງໃຫ້ເຫັນວ່າ ການພົວພັນລະຫວ່າງຈີນກັບອິນເດຍໄດ້ກ້າວເຂົ້າສູ່ໄລຍະຂະຫຍາຍຕົວອັນໃໝ່.ທ່ານຊຸ່ຍທ່ຽນໄຂກ່າວວ່າ:
"ພວກຂ້າພະເຈົ້າເຊື່ອວ່າ ການຢ້ຽມຢາມເທື່ອນີ້ຈະສະແດງໃຫ້ທົ່ວໂລກເຫັນວ່າ,ຈີນກັບອິນເດຍພັດທະນາພ້ອມກັນນັ້ນ ບໍ່ພຽງແຕ່ຈະນຳເອົາໂອກາດໃໝ່ໃຫ້ແກ່ການຮ່ວມມືລະຫວ່າງສອງປະເທດນີ້ທໍ່ນັ້ນ,ຫາກຍັງຈະປະກອບສ່ວນອັນຕັ້ງໜ້າເຂົ້າໃນການຊຸກຍູ້ສັນຕິພາບ ສະຖຽນລະພາບແລະການພັດທະນາຂອງໂລກ."
ນັບແຕ່ຈີນກັບປາກີສະຖານໄດ້ສ້າງສາຍສຳພັນທາງການທູດຄົບຮອບ 55 ປີມານີ້,ການພົວພັນລະຫວ່າງສອງຝ່າຍໄດ້ກາຍເປັນຕົວຢ່າງໃຫ້ແກ່ປະເທດຕ່າງໆທີ່ມີລະບອບສັງຄົມແລະວັດທະນະທຳຕ່າງກັນສາມາດຢູ່ຮ່ວມກັນຢ່າງມີໄມຕີຈິດ.ເດືອນເມສາປີ 2005 ທ່ານເວີນເຈຍປາວ ນາຍົກລັດຖະມົນຕີຈີນຢ້ຽມຢາມປາກີສະຖານຢ່າງສຳເລັດຜົນ,ສອງປະເທດໄດ້ເຊັນ"ສັນຍາຮ່ວມມືໄມຕີຈິດຖານບ້ານໃກ້ເຮືອນຄຽງ",ແລະປະກາດຂະຫຍາຍການພົວພັນຄູ່ຮ່ວມມືຍຸດທະສາດທີ່ແໜ້ນແຟ້ນກວ່າເກົ່າ.ທ່ານຊຸ່ຍທ່ຽນໄຂເວົ້າວ່າ:
"ພວກຂ້າພະເຈົ້າຫວັງຜ່ານຈາກການຢ້ຽມຢາມເທື່ອນີ້ຈະສາມາດປັບປຸງແລະຍົກລະດັບການພົວພັນທາງການເມືອງລະຫວ່າງຈີນກັບປາກີສະຖານ,ເປີດກວ້າງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດລະຫວ່າງສອງປະເທດໃນຂົງເຂດຕ່າງໆ,ຂະຫຍາຍການພົວພັນຄູ່ຮ່ວມມືຍຸດທະສາດໃຫ້ກ້າວສູ່ລວງເລິກ. ພວກຂ້າພະເຈົ້າເຊື່ອວ່າ ການຢ້ຽມຢາມເທື່ອນີ້ຈະກາຍເປັນຂີດໝາຍອັນສຳຄັນໃນຂະບວນການພົວພັນຮ່ວມມືຢ່າງມີໄມຕີຈິດແລະມີມູນເຊື້ອລະຫວ່າງຈີນກັບປາກີສະຖານ."
ເນື້ອໃນສຳຄັນໃນການຢ້ຽມຢາມຂອງທ່ານປະທານຫູຈິນທາວເທື່ອນີ້ ແມ່ນເຂົ້າຮ່ວມກອງປະຊຸມບໍ່ເປັນທາງການຂອງຜູ່ນຳອົງການເອເປັກຄັ້ງທີ 14.ທ່ານຊຸ່ຍທ່ຽນໄຂກ່າວວ່າ:
"ໃນກອງປະຊຸມຄັ້ງນີ້ ທ່ານປະທານຫູຈິນທາວຈະສະເໜີກ່ຽວກັບນະໂຍບາຍແລະເຈດຈຳນົງຂອງຈີນໃນການລົງເລິກດຳເນີນການຮ່ວມມືໃນພາກພື້ນ,ປະກອບຄຳຄິດຄຳເຫັນກ່ຽວກັບບັນຫາສຳຄັນແລະອະນາຄົດຂອງການຮ່ວມມືຂອງອົງການເອເປັກ,ແລະຈະສະເໜີຂໍ້ລິເລີ່ມອັນລະອຽດກ່ຽວກັບການຊຸກຍູ້ການຮ່ວມມືດ້ານເສດຖະກິດແລະເຕັກນິກຂອງອົງການເອເປັກຕື່ມອີກ.ທ່ານຍັງຈະແນະນຳທັດສະນະພັດທະນາຕາມຫຼັກວິທະຍາສາດຂອງຈີນ,ບັນລະຍາຍການພັດທະນາຂອງຈີນຈະນຳເອົາໂອກາດໃໝ່ໃຫ້ແກ່ການພັດທະນາຂອງພາກພື້ນແລະຂອງໂລກ."
|
|
|