|
ແອສປາຍຝະຣັ່ງແລະອີຕາລີຕົກລົງສະເໜີແຜນການໃໝ່ກ່ຽວກັບການແກ້ໄຂການປະທະກັນລະຫວ່າງປາເລັສຕິນກັບອິສຣາແອນ ປາເລັສຕິນກັບອິສຣາແອນທຳປະຕິກິລິຍາຕ່າງກັນຕໍ່ເລື່ອງນີ້
cri
ຕາມຂ່າວCRI,ວັນທີ16ພະຈິກນີ້,ສາມປະເທດຄືແອສປາຍ ຝະຣັ່ງແລະອີຕາລີໄດ້ຕົກລົງຮ່ວມກັນສະເໜີແຜນການໃໝ່ກ່ຽວກັບການແກ້ໄຂການປະທະກັນລະຫວ່າງປາເລັສຕິນອິສຣາແອນ,ແລະຈະຍື່ນແຜນການດັ່ງກ່າວໃຫ້ສະຫະພາບເອີລົບເພື່ອປຶກສາຫາລື.
ທ່ານຊາປາເຕໂຣ ນາຍົກລັດຖະມົນຕີແອສປາຍແນະນຳວ່າ,ແຜນການດັ່ງກ່າວມີເນື້ອໃນ5ຂໍ້ຄື: ສອງຝ່າຍປາເລັສຕິນອິສຣາແອນຢຸດຕິການການເຄື່ອນໄຫວໃຊ້ກຳລັງຮຸນແຮງທັງໝົດໃນທັນທີ, ສ້າງຕັ້ງລັດຖະບານປະສົມແຫ່ງຊາດທີ່ປະຊາຄົມໂລກຮັບຮອງຢູ່ປາເລັສຕິນ.ສອງຝ່າຍແລກປ່ຽນສະເລີຍເສິກແລະຈັດການເຈລະຈາລະຫວ່າງຜູ່ນຳ,ແຕ່ງຕັ້ງຜູ່ສັງເກດການສາກົນປະຈຳເຂດກາຊາເພື່ອຕິດຕາມການຢຸດຍິງແລະຈັດກອງປະຊຸມສາກົນກ່ຽວກັບບັນຫາສັນຕິພາບຕາເວັນອອກກາງທີ່ມີຝ່າຍຕ່າງໆທີ່ກ່ຽວຂ້ອງເຂົ້າຮ່ວມໃນເວລາອັນເໝາະສົມ.
ວັນທີ16ພະຈິກນີ້,ທ່ານອາບູ ເລເຕນາໂຄສົກທຳນຽບປະທານາທິບໍດີປາເລັສຕິນໄດ້ສະແດງຄວາມຊົມເຊີຍຕໍ່ເລື່ອງນີ້.
ແຕ່ໂຄສົກກະຊວງການຕ່າງປະເທດອິສຣາແອນກ່າວວ່າ,ແຜນການທີ່ສະເໜີໂດຍແອສປາຍ ຝະຣັ່ງແລະອີຕາລີບໍ່ສາມາດຕາງໜ້າຫຼັກໝັ້ນຂອງສີ່ຝ່າຍທີ່ກ່ຽວຂ້ອງກັບບັນຫາຕາເວັນອອກກາງຄືສະຫະປະຊາຊາດ,ສະຫະພາບເອີລົບ,ອາເມລິກາແລະຣັດເຊຍ.ຝ່າຍອິສຣາແອນຍິ່ງຫວັງໃຫ້ແກ້ໄຂບັນຫາອິສຣາແອນປາເລັສຕິນດ້ວຍການເຈລະຈາໂດຍກົງ.
|
|
