|
ຕາມຂ່າວCRI,ວັນທີ19ພະຈິກນີ້,ກອງປະຊຸມບໍ່ເປັນທາງການຂອງຜູ່ນຳອົງການຮ່ວມມືດ້ານເສດຖະກິດການຄ້າອາຊີປາຊີຟິກຫຼືເອເປັກຄັ້ງທີ14ທີ່ໄດ້ດຳເນີນມາເປັນເວລາ2ມື້ຢູ່ທີ່ຮ່າໂນຍໄດ້ອັດລົງແລ້ວ.ກອງປະຊຸມໄດ້ຜ່ານຖະແຫຼງການຮ່າໂນຍ,ແລະໄດ້ຖະແຫຼງກ່ຽວກັບບັນຫາ ສ.ປ.ປ.ເກົາຫຼີທົດລອງນີວເຄຼຍ.
ຖະແຫຼງການຮ່າໂນຍໄດ້ສະແດງຄວາມຊົມເຊີຍຕໍ່ສະມາຊິກຕ່າງໆທີ່ໄດ້ວາງຂໍ້ມາດຕາແບບຢ່າງກ່ຽວກັບການຈັດວາງການຄ້າໃນພາກພື້ນແລະສັນຍາການຄ້າເສລີໃນ6ຂົງເຂດ,ແລະອະນຸມັດແຜນການດຳເນີນງານຮ່າໂນຍທີ່ສ້າງຂຶ້ນເພື່ອບັນລຸເປົ້າໝາຍໂບກໍຕາມເວລາກຳນົດ.ຖະແຫຼງການຂຽນວ່າ,ຈະສຸມກຳລັງເຂົ້າໃນການບັນລຸການຄ້າແລະການລົງທຶນຢ່າງເສລີແລະເປີດປະຕູຂອງເອເປັກ.ປ້ອງກັນບໍ່ໃຫ້ການພັດທະນາແບບຍືນຍົງຖືກຂົ່ມຂູ່,ສ້າງສະພາບແວດລ້ອມການຄ້າທີ່ປອດໄພແລະດີງາມ,ເພີ່ມທະວີຄວາມປອດໄພຂອງມະນຸດ.
ຖະແຫຼງການຍັງກ່າວຢ້ຳວ່າ,ການສະໜັບສະໜູນລະບຽບວາລະການພັດທະນາໂດຮາຂອງອົງການການຄ້າໂລກຍັງຄົງແມ່ນທິດທາງທີ່ອົງການເອເປັກພິຈາລະນາກ່ອນໝູ່.ສະມາຊິກຕ່າງໆຂອງອົງການເອເປັກຈະທຳຄວາມພະຍາຍາມສຸດຂີດເພື່ອທັບມ້າງສະພາບບໍ່ໄປບໍ່ມາໃນປັດຈຸບັນ,ເຮັດໃຫ້ການເຈລະຈາຮອບໂດຮາໄດ້ຮັບໝາກຜົນອັນໃຫຍ່ຫຼວງແລະດຸນດ່ຽງກັນ.
ຄຳຖະແຫຼງຂອງກອງປະຊຸມທີ່ແນໃສ່ບັນຫາສ.ປ.ປ.ເກົາຫຼີທົດລອງນີວເຄຼຍໄດ້ກ່າວຢ້ຳຄວາມຕັດສິນໃຈຂອງອົງການເອເປັກທີ່ຈະສຸມກຳລັງເຂົ້າໃນການເຮັດໃຫ້ແຫຼມເກົາຫຼີແລະອາຊີຕາເວັນອອກສຽງເໜືອມີສັນຕິພາບແລະຄວາມໝັ້ນຄົງ,ແລະແກ້ໄຂບັນຫານີວເຄຼຍແຫຼມເກົາຫຼີໂດຍສັນຕິ.ຄຳຖະແຫຼງກ່າວເນັ້ນວ່າ,ຕ້ອງປະຕິບັດມະຕິທີ່ກ່ຽວຂ້ອງຂອງສະພາຄວາມໝັ້ນຄົງສະຫະປະຊາຊາດຢ່າງເຕັມສ່ວນ,ເດັດດ່ຽວສະໜັບສະໜູນການເຈລະຈາຫົກຝ່າຍກ່ຽວກັບບັນຫານີວເຄຼຍແຫຼມເກົາຫຼີ.ຄຳຖະແຫຼງຍັງຮຽກຮ້ອງຝ່າຍຕ່າງໆທີ່ກ່ຽວຂ້ອງຈົ່ງໃຊ້ບາດກ້າວທີ່ເປັນຮູບປະທຳທີ່ບັງເກີດຜົນເພື່ອຜັນຂະຫຍາຍຖະແຫຼງການຮ່ວມທີ່ຕົກລົງກັນໃນການເຈລະຈາຫົກຝ່າຍຮອບ4ແລະຈັດການເຈລະຈາຫົກຝ່າຍຄືນໃໝ່ໂດຍໄວ.
|
