ຕາມຂ່າວ CRI: ວັນທີ 19 ພະຈິກນີ້, ທ່ານຫູຈິນທາວ ປະທານປະເທດຈີນໄດ້ເຂົ້າຮ່ວມກອງປະຊຸມໄລຍະທີສອງຂອງກອງປະຊຸມບໍ່ເປັນທາງການຂອງຜູ່ນຳອົງການຮ່ວມມືພາກພື້ນອາຊີອາຊີຟິກຫຼື ເອເປັກຄັ້ງທີ 14 ທີ່ຈັດຂຶ້ນຢູ່ຮ່າໂນຍຂອງຫວຽດນາມ ແລະໄດ້ບັນຍາຍທັດສະນະຂອງຝ່າຍຈີນກ່ຽວກັບພະລັງງານກັບສິ່ງແວດລ້ອມ ການຮ່ວມມືດ້ານສາທາລະນະສຸກແລະບັນຫານິວເຄຼຍແຫຼມເກົາຫຼີ.
ໃນຄຳປາໄສ ທ່ານຫູຈິນທາວກ່າວວ່າ, ບັນຫາພະລັງງານກ່ຽວພັນເຖິງການພັດທະນາເສດຖະກິດແລະສັງຄົມຂອງພາກພື້ນອາຊີປາຊີຟິກ. ເພື່ອປົກປັກຮັກສາຄວາມປອດໄພດ້ານພະລັງງານ, ຕ້ອງເພີ່ມທະວີການຮ່ວມມືທີ່ຕ່າງຝ່າຍຕ່າງມີຜົນປະໂຫຍດໃນການພັດທະນາແລະນຳໃຊ້ພະລັງງານ, ສ້າງລະບົບຄົ້ນຄວ້າແລະເຜີຍແຜ່ເຕັກໂນໂລຊີພະລັງງານທີ່ກ້າວໜ້າ; ຍັງຕ້ອງສ້າງສະພາບແວດລ້ອມທາງການເມືອງອັນດີງາມ, ບູລະນະກົນໄກຕະຫຼາດພະລັງງານສາກົນໃຫ້ສົມບູນຂຶ້ນ, ບັນລຸການສະໜອງພະລັງງານຂອງສາກົນທີ່ໝັ້ນທ່ຽງຍືນຍົງ ແລະລາຄາສົມເຫດສົມຜົນ.
ກ່ຽວກັບບັນຫາການຮ່ວມມືດ້ານສາທາລະນະສຸກ, ທ່ານຫູຈິນທາວຊີ້ອອກວ່າ, ຊູ່ມື້ນີ້ທີ່ໂລກາພິວັດພັດທະນາໄວເຂົ້າ, ມີແຕ່ເພີ່ມທະວີການຮ່ວມມືລະຫວ່າງຊາດເທົ່ານັ້ນ, ຈຶ່ງສາມາດປ້ອງກັນບໍ່ໃຫ້ພະຍາດລະບາດແຜ່ລາມຢ່າງບັງເກີດຜົນ, ປ້ອງກັນຄວາມປອດໄພດ້ານສາທາລະນະສຸກ.
ໃນເວລາກ່າວເຖິງບັນຫານິວເຄຼຍແຫຼມເກົາຫຼີ, ທ່ານຫູຈິນທາວກ່າວເນັ້ນວ່າ, ການຍຶດໝັ້ນແຫຼມເກົາຫຼີປອດນິວເຄຼຍ, ຜ່ານການເຈລະຈາມາແກ້ໄຂບັນຫານິວເຄຼຍແຫຼມເກົາຫຼີນັ້ນ, ແມ່ນຫຼັກໝັ້ນສະເໝີຕົ້ນສະເໝີປາຍຂອງຝ່າຍຈີນ, ຈີນຈະເຮັດຄືແຕ່ເກົ່າເມືອຫຼັງ ເສີມຂະຫຍາຍບົດບາດທີ່ມີລັກສະນະສ້າງສັນໃນການຊຸກຍູ້ຂະບວນການເຈລະຈາສັນຕິພາບ ແກ້ໄຂບັນຫານິວເຄຼຍແຫຼມເກົາຫຼີດ້ວຍສັນຕິວິທີໂດຍໄວເທົ່າທີ່ຈະໄວໄດ້.
|