|
ຕາມຂ່າວສານຊິນຮວາ,ວັນທີ19ພະຈິກນີ້,ທ່ານຫູຈິນທາວ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນທີ່ເດີນທາງໄປຮອດນະຄອນຫຼວງວຽງຈັນຂອງລາວເພື່ອເລີ່ມຢ້ຽມຢາມລາວທາງລັດຖະກິດນັ້ນໄດ້ເຈລະຈາກັບທ່ານຈູມມະລີໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດລາວ.ຜູ່ນຳຂອງສອງປະເທດໄດ້ເປັນເອກະສັນກັນເຫັນດີພ້ອມກັນພະຍາຍາມເພື່ອປະຕິບັດຕາມທິດທາງທີ່ໝັ້ນຄົງຍາວນານ,ມີໄມຕີຈິດຖານບ້ານໃກ້ເຮືອນຄຽງທີ່ດີຕໍ່ກັນໄວ້ເນື້ອເຊື່ອໃຈກັນແລະຮ່ວມມືກັນຢ່າງຮອບດ້ານ,ຊຸກຍູ້ການພົວພັນລະຫວ່າງສອງພັກ ສອງລັດໃຫ້ກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ.
ທ່ານຫູຈິນທາວກ່າວວ່າ,ນັບແຕ່ສ.ປ.ປ.ລາວສະຖາປະນາ ເປັນເວລາ30ປີມານີ້,ພັກປະຊາຊົນປະຕິວັດລາວໄດ້ນຳພາປະຊາຊົນລາວສ້າງສາປະເທດຢ່າງຫ້າວຫັນແລະໄດ້ຮັບຜົນສຳເລັດຢ່າງພົ້ນເດັ່ນ.ພັກ ລັດແລະປະຊາຊົນຈີນເດັດດ່ຽວຢືນຢູ່ຄຽງຂ້າງພັກ ລັດແລະປະຊາຊົນລາວ,ຂໍອວຍພອນໃຫ້ປະຊາຊົນລາວຈົ່ງໄດ້ຮັບຜົນສຳເລັດໃໝ່ໃຫຍ່ຫຼວງກວ່າເກົ່າໃນການສ້າງສາສັງຄົມນິຍົມແລະພາລະກິດປ່ຽນແປງໃໝ່ແລະໄຂປະຕູສູ່ພາຍນອກ.
ທ່ານຈູມມະລີ ໄລຍະສອນ ໄດ້ສະແດງຄວາມຍິນດີຕ້ອນຮັບທ່ານຫູຈິນທາວມາຢ້ຽມຢາມລາວຢ່າງອົບອຸ່ນ.ທ່ານກ່າວວ່າ,ທ່ານຫູຈິນທາວໄດ້ນຳເອົາມິດຕະພາບອັນເລິກເຊິ່ງແລະຄວາມຮັກແພງຖານມິດສະຫາຍຂອງປະຊາຊົນຈີນມາໃຫ້ປະຊາຊົນລາວ,ເຊື່ອວ່າ,ການຢ້ຽມຢາມເທື່ອນີ້ຍ່ອມຈະຍົກສູງມິດຕະພາບອັນເປັນມູນເຊື້ອລະຫວ່າງສອງຊາດລາວຈີນ,ເຮັດໃຫ້ຄວາມສາມັກຄີລະຫວ່າງສອງພັກແລະປະຊາຊົນສອງຊາດຍິ່ງແໜັ້ນແຟ້ນກວ່າເກົ່າ.ທ່ານຈູມມະລີໄດ້ອວຍພອນໃຫ້ພັກກອມມູນິດຈີນນຳພາປະຊາຊົນຈີນຈົ່ງໄດ້ຮັບຜົນສຳເລັດຫຼາຍກວ່າເກົ່າໃນພາລະກິດສ້າງສາສັງຄົມນິຍົມທີ່ມີສີສັນພິເສດຂອງຈີນ.
ທ່ານຫູຈິນທາວຊີ້ອອກວ່າ,ນັບແຕ່ກ້າວເຂົ້າສະຕະວັດໃໝ່ມານີ້,ການພົວພັນລະຫວ່າງສອງພັກແລະລັດຈີນລາວໄດ້ຂະຫຍາຍຕົວຢ່າງຮອບດ້ານແລະກ້າວສູ່ລວງເລິກ,ມີທ່ວງທ່າອັນດີງາມທີ່ຂະຫຍາຍຕົວໃນຫຼາຍຂົງເຂດແລະຫຼາຍລະດັບ. ຜູ່ນຳສອງຝ່າຍຕິດຕໍ່ພົວພັນກັນເລື້ອຍໆ,ແລກປ່ຽນກັນຢ່າງຈິງໃຈ,ການແລກປ່ຽນກັນດ້ານທິດສະດີກັບພຶດຕິກຳດ້ານສັງຄົມນິຍົມແລະການຮ່ວມມືອົບຮົມພະນັກງານໄດ້ພັດທະນາຢ່າງກ້າວໜ້າ,ການຄ້າສອງຝ່າຍບັນລຸການເຕີບໂຕແບບກ້າວກະໂດດ,ໂຄງການຮ່ວມມືໄດ້ຮັບຄວາມຄືບໜ້າຢ່າງສະດວກ,ອົງການນິຕິບັນຍັດ ອົງການຂອງພັກລັດແລະອົງການຈັດຕັ້ງມະຫາຊົນໄດ້ໄປມາຫາສູ່ກັນຢ່າງສະໜິດແໜ້ນ,ການຮ່ວມມືໃນຂົງເຂດການປ້ອງກັນປະເທດ ປ້ອງກັນຄວາມສະຫງົບ ການສຶກສາແລະຊາວໜຸ່ມເປັນຕົ້ນໄດ້ຮັບການເພີ່ມທະວີຢ່າງຕໍ່ເນື່ອງ,ການຮ່ວມມືໃນວຽກງານພາກພື້ນກໍແໜ້ນແຟ້ນຂຶ້ນ. ພັກແລະລັດຖະບານລາວໄດ້ສະໜັບສະໜູນຈີນຢ່າງເດັດດ່ຽວໃນບັນຫາສຳຄັນທີ່ກ່ຽວຂ້ອງກັບອະທິປະໄຕ ສິດແລະຜົນປະໂຫຍດທີ່ເປັນໃຈກາງຂອງຊາດຈີນເຊັ່ນ ບັນຫາໄຕ້ຫວັນ ບັນຫາຕິເບດແລະສິດທິມະນຸດເປັນຕົ້ນ,ຝ່າຍຈີນສະແດງຄວາມຂອບອົກຂອບໃຈຕໍ່ເລື່ອງນີ້.
ທ່ານຈູມມະລີ ໄຊຍະສອນກ່າວວ່າ,ການພົວພັນໄມຕີຈິດຖານບ້ານໃກ້ເຮືອນຄຽງທີ່ດີຕໍ່ກັນ ແລະມິດຕະພາບລະຫວ່າງປະຊາຊົນສອງຊາດລາວຈີນມີປະຫວັດສາດອັນຍາວນານ,ພັກແລະລັດສອງປະເທດໄດ້ສະໜັບສະໜູນເຊິ່ງກັນແລະກັນໃນຂະບວນການປະຕິວັດແລະການສ້າງສາເປັນເວລາດົນນານ. ນັບແຕ່ກ້າວສູ່ສະຕະວັດໃໝ່ມານີ້,ການພົວພັນລະຫວ່າງລາວຈີນທີ່ສ້າງຂຶ້ນບົນພື້ນຖານໝັ້ນຄົງຍາວນານ ເປັນປະເທດບ້ານໃກ້ເຮືອນຄຽງທີ່ດີຕໍ່ກັນໄວ້ເນື້ອເຊື່ອໃຈເຊິ່ງກັນແລະກັນ ແລະຮ່ວມມືຮອບດ້ານນັ້ນ ໄດ້ຮັບໝາກຜົນໃໝ່ຢ່າງບໍ່ຢຸດຢັ້ງ,ກາຍເປັນຊັບສິນຮ່ວມອັນລ້ຳຄ່າຂອງພັກ ລັດແລະປະຊາຊົນສອງຊາດ. ທ່ານກ່າວວ່າ,ບໍ່ວ່າສະຖານະການສາກົນຈະປ່ຽນແປງແນວໃດກໍ່ຕາມ,ລາວກໍ່ຈະຂະຫຍາຍການພົວພັນມິດຕະພາບຮ່ວມມືຮອບດ້ານກັບຈີນຢ່າງເດັດດ່ຽວ,ນີ້ສອດຄ່ອງກັບຜົນປະໂຫຍດພື້ນຖານຂອງສອງຊາດແລະປະຊາຊົນສອງປະເທດ.ລາວຍຶດໝັ້ນປະຕິບັດນະໂຍບາຍຈີນດຽວ,ສະໜັບສະໜູນພາລະກິດການໂຮມຈີນເຂົ້າເປັນເອກະພາບກັນ,ຄັດຄ້ານການເຄື່ອນໄຫວແບ່ງແຍກໄຕ້ຫວັນເປັນເອກະລາດດ້ວຍຮູບການໃດໆກໍ່ຕາມ.
ທ່ານຫູຈີນທາວກ່າວເນັ້ນວ່າ, ຈີນແລະລາວລ້ວນແຕ່ພວມສ້າງສາສັງຄົມນິຍົມູ, ຊຸກຍູ້ການເປີດປະຕູສູ່ພາຍນອກ, ຊອກຫາເສັ້ນທາງພັດທະນາທີ່ສອດຄ່ອງກັບສະພາບຕົວຈິງຂອງປະເທດຕົນ, ມີຜົນປະໂຫຍດຮ່ວມດ້ານຍຸດທະສາດຢ່າງຫຼວງຫຼາຍ. ການເພີ່ມທະວີມິດຕະພາບທີ່ມີມູນເຊື້ອແລະການຮ່ວມມືຮອບດ້ານລະຫວ່າງສອງພັກສອງລັດ, ສອດຄ່ອງກັບຜົນປະໂຫຍດພື້ນຖານຂອງປະຊາຊົນສອງປະເທດ, ມີຜົນດີຕໍ່ສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນນີ້. ພັກ, ລັດແລະປະຊາຊົນຈີນສຸດທີ່ຫວງແຫນມິດຕະພາບທີ່ມີມູນເຊື້ອລະຫວ່າງຈີນກັບລາວ, ເອົາໃຈໃສ່ນຳການຂະຫຍາຍການພົວພັນລະຫວ່າງຈີນກັບລາວໃນລະດັບສູງ, ຍິນດີເປັນປະເທດໃກ້ຄຽງທີ່ດີ, ເພື່ອນມິດທີ່ດີ,ສະຫາຍແລະຄູ່ຮ່ວມມືທີ່ດີກັບຝ່າຍລາວຕະຫຼອດໄປ. ທ່ານຫູຈີນທາວໄດ້ສະເໜີຂໍ້ສະເໜີ 5ຂໍ້ກ່ຽວກັບ ການຂະຫຍາຍການພົວພັນລະຫວ່າງສອງປະເທດ. ຄື: 1 ຮັກສາກົນໄກພົບປະປະຈຳປີຂອງຜູ້ນຳຊັ້ນສູງສອງປະເທດ, ແລກປ່ຽນຄວາມເຫັນກ່ຽວກັບບັນຫາທີ່ສົນໃຈຮ່ວມກັນ,ເພີ່ມທະວີການຊີ້ນຳຕໍ່ການຂະຫຍາຍການພົວພັນສອງຝ່າຍ. 2 ເພີ່ມທະວີການແລກປ່ຽນບົດຮຽນກ່ຽວກັບການຄຸ້ມຄອງພັກແລະລັດ, ຖອດຖອນເອົາບົດຮຽນເຊິ່ງກັນແລະກັນ,ຍົກລະດັບໃຫ້ສູງຂຶ້ນພຶ້ອມກັນ. 3 ເພີ່ມທະວີການຊີ້ນຳແລະການປະສານງານຕໍ່ການຮ່ວມມືເສດຖະກິດການຄ້າລະຫວ່າງສອງຝ່າຍຂອງຄະນະກຳມະການຮ່ວມມືສອງປະເທດ,ຊອກຫາຮູບແບບແລະຊ່ອງທາງການຄ້າໃໝ່,ສ້າງໃຫ້ມີບາດກ້າວກະໂດດໃໝ່,ເລັ່ງຈັດຕັ້ງປະຕິບັດໂຄງການຮ່ວມມືຈຸດໜັກທີ່ໄດ້ຕົກລົງກັນແລ້ວ, ຝ່າຍຈີນຈະຊຸກຍູ້ວິສາຫະກິດຈີນທີ່ມີກຳລັງຕົວຈິງຫຼາຍກວ່າເກົ່າໄປລົງທຶນຢູ່ລາວ,ຍິນດີສືບຕໍ່ສະໜອງການຊ່ອຍເຫຼືອເທົ່າທີ່ສາມາດເຮັດໄດ້ໃຫ້ແກ່ລາວ.4 ເພີ່ມທະວີການຮ່ວມມືໃນດ້ານຮັກສາການປ້ອງກັນຄວາມສະຫງົບຢູ່ຕາມຊາຍແດນແລະຕໍ່ຕ້ານອາຊະຍາກຳຂ້າມຊາດລະຫວ່າງສອງປະເທດ, ຊຸກຍູ້ການໄປມາຫາສູ່ກັນລະຫວ່າງຊາວໜຸ່ມເຍົາວະຊົນ,ຝ່າຍຈີນຈະສືບຕໍ່ສົ່ງອາສາສະໝັກຊາວໜຸ່ມໄປຊ່ວຍລາວ,ຊຸກຍູ້ການຮ່ວມມືໃນດ້ານການສຶກສາ, ສາທາລະນະສຸກແລະການທ່ອງທ່ຽວ. 5 ເພີ່ມທະວີການສະໜັບສະໜູນກັນໃນວຽກງານສາກົນແລະພາກພື້ນ,ປະສານຫຼັກໝັ້ນກ່ຽວກັບບັນຫາສາກົນແລະພາກພື້ນຢ່າງທັນການ.ຮັດແໜ້ນການປະສານງານແລະການປະສານສົມທົບໃນກົນໄກຫຼາຍຝ່າຍ,ເຊັ່ນ: ຈີນອາຊຽນ,ແລະອົງການສະຫະປະຊາຊາດເປັນຕົ້ນ,ປັກປັກຮັກສາຜົນປະໂຫຍດຮ່ວມກັນຂອງສອງປະເທດ.
ທ່ານຈູມມະລີເຫັນດີເຫັນພ້ອມນຳຂໍ້ສະເໜີຂອງທ່ານຫູຈິນທ່າວກ່ຽວກັບການຂະຫຍາຍການພົວພັນສອງປະເທດໂດຍກ່າວວ່າຈະພ້ອມກັນກັບຝ່າຍຈີນພະຍາຍາມຈັດຕັ້ງປະຕິບັດຂໍ້ສະເໜີດັ່ງກ່າວ.ທ່ານຈູມມະລີໄດ້ແຈ້ງສະພາບການກໍ່ສ້າງພາຍໃນປະເທດລາວ,ຢາກເພີ່ມທະວີການຮ່ວມມືດ້ານເສດຖະກິດການຄ້າກັບຝ່າຍຈີນຢ່າງບໍ່ຢຸດຢັ້ງ,ເສີມຂະຫຍາຍບົດບາດຂອງກົນໄກຄະນະກຳມະການຮ່ວມມືຂອງສອງປະເທດ,ຄົ້ນຄວ້າຮູບການໃໝ່ແລະຊ່ອງທາງໃໝ່ແຫ່ງການຮ່ວມມືດ້ານເສດຖະກິດການຄ້າ,ຍົກປະສິດທິພາບແຫ່ງການຮ່ວມມືໃຫ້ສູງຂຶ້ນ,ເພີ່ມທະວີການຮ່ວມມືໃນຂົງເຂດຕ່າງໆ,ເຊັ່ນການຄ້າ ການລົງທຶນ ພະລັງໄຟຟ້າ ຂະແໜງການບໍ່ແຮ່ ການກໍ່ສ້າງພື້ນຖານໂຄງລ່າງ ການທ່ອງທ່ຽວແລະອື່ນໆ.
ຫຼັງຈາກການພົບປະເຈລະຈາ,ທ່ານຫູຈິນທ່າວແລະທ່ານຈູມມະລີໄດ້ພ້ອມກັນເຂົ້າຮ່ວມພິທີລົງນາມໃນເອກະສານກ່ຽວກັບການຮ່ວມມືສອງຝ່າຍໃນຂົງເຂດເຕັກນິກເສດຖະກິດ ສາທາລະນະສຸກ ໄຟຟ້າແລະການຄຸ້ມຄອງບໍລິຫານເອເລັກໂຕຼນິກເປັນຕົ້ນພ້ອມດ້ວຍພິທີເລີ່ມອອກອາກາດຂອງສະຖານີວິທະຍຸCRI FM 93MHz.
ກ່ອນການເຈລະຈາ,ທ່ານຫູຈິນທ່າວໄດ້ເຂົ້າຮ່ວມພິທີຕ້ອນຮັບຢ່າງເປັນທາງການທີ່ທ່ານຈູມມະລີຈັດຂຶ້ນເພື່ອເປັນກຽດແກ່ທ່ານຢ່າງຄຶກຄື້ນ.ຕອນຄ່ຳມື້ດຽວກັນ,ທ່ານຫູຈິນທ່າວຍັງໄດ້ເຂົ້າຮ່ວມງານລ້ຽງຮັບຮອງທີ່ທ່ານຈູມມະລີເປັນເຈົ້າພາບຈັດຂຶ້ນ.
|
