|
ໂຄສົກກະຊວງການຕ່າງປະເທດເວົ້າວ່າ, ຈີນອາເມລິກາເຫັນດີສືບຕໍ່ທຳຄວາມພະຍາຍາມເພື່ອຊຸກຍູ້ການເຈລະຈາ 6 ຝ່າຍຟື້ນຟູການເຈລະຈາໂດຍໄວແລະໄດ້ຮັບຄວາມຄືບໜ້າ
cri
Author: m
ຕາມຂ່າວ CRI: ວັນທີ 21 ພະຈິກນີ້, ຢູ່ທີ່ປັກກິ່ງ, ນາງຈ່ຽງອີ້ ໂຄສົກກະຊວງການຕ່າງປະເທດຈີນເວົ້າວ່າ, ຈີນອາເມລິກາເຫັນດີສືບຕໍ່ທຳຄວາມພະຍາຍາມເພື່ອຊຸກຍູ້ການເຈລະຈາ 6 ຝ່າຍຟື້ນຟູການເຈລະຈາໂດຍໄວແລະໄດ້ຮັບຄວາມຄືບໜ້າ.
ໃນກອງປະຊຸມຖະແຫຼງຂ່າວທີ່ຈັດຂຶ້ນໃນມື້ດຽວກັນ, ນາງຈ່ຽງອີ້ເວົ້າວ່າ, ຕອນຄ່ຳວັນທີ 20 ພະຈິກນີ້, ຢູ່ທີ່ປັກກິ່ງ, ທ່ານອູຕ້າເວີຍ ລັດຖະມົນຕີຊ່ອຍວ່າການກະຊວງການຕ່າງປະເທດຈີນໄດ້ແລກປ່ຽນຄວາມເຫັນກ່ຽວກັບການເຈລະຈາ 6 ຝ່າຍກ່ຽວກັບບັນຫານິວເຄຼຍແຫຼມເກົາຫຼີກັບທ່ານຮິວ, ຝ່າຍຈີນຫວັງໃຫ້ຝ່າຍຕ່າງໆໃຊ້ການເຄື່ອນໄຫວຕົວຈິງເພື່ອຟື້ນຟູການເຈລະຈາ 6 ຝ່າຍໂດຍໄວ, ຕັ້ງໜ້າປະຕິບັດ "ຖະແຫຼງການຮ່ວມຂອງການເຈລະຈາ 6 ຝ່າຍຮອບ 4", ເພື່ອໃຫ້ບັນລຸເຖິງການປອດນິວເຄຼຍຢູ່ແຫຼງເກົາຫຼີ. ນາງເວົ້າວ່າ, ຝ່າຍຈີນພວມດຳເນີນການເປິກສາຫາລືກັບຝ່າຍຕ່າງໆທີ່ກ່ຽວຂ້ອງກ່ຽວກັບເວລາຟື້ນຟູການເຈລະຈາ 6 ຝ່າຍ.
ສຳລັບກ່ອນນີ້ມີຂ່າວແຈ້ງວ່າທະນາຄານບານໂຄ ເດວຕາອາຊີ ມາກາວຍົກເລີກການກີກທຶນຈຳນວນໜຶ່ງຂອງສ.ປ.ປເກົາຫຼີ, ນາງຈ່ຽງອີ້ເວົ້າວ່າ, ຝ່າຍຈີນຍັງບໍ່ທັນໄດ້ຮູ້ຂ່າວກ່ຽວກັບເລື່ອງນີ້ເທື່ອ. ນາງເວົ້າວ່າ, ກ່ຽວກັບບັນຫາລົງໂທດທາງດ້ານການເງິນ, ພວກເຮົາສະໜັບສະໜູນອົງການປົກຄອງເຂດພິເສດມາກາວດຳເນີນຕາມກົດໝາຍ, ແລະກໍ່ຫວັງໃຫ້ຝ່າຍຕ່າງໆຖືການເຈລະຈາ 6 ຝ່າຍແລະການປອດນິວເຄຼຍຂອງແຫຼມເກົາຫຼີເປັນສິ່ງສຳຄັນໃນບັນຫານີ້, ແລະແກ້ໄຂຢ່າງເໝາະສົມໂດຍໄວ.
|
|
