|
|
 |
| (GMT+08:00)
2006-11-22 17:51:59
|
 |
|
ໃຫ້ຊາວຫນຸ່ມຂຽນຫນ້າປະຫວັດສາດໃຫມ່ແຫ່ງໄມຕີຈິດມິດຕະພາບລະຫວ່າງຈີນອິນເດຍ
cri
Author: sayvanny
ຕອນແລງວັນທີ 21 ພະຈິກນີ້,ຢູ່ນິວແດນລີ ທ່ານຫູຈີນທາວ ປະທານປະເທດຈີນທີ່ພວມຢ້ຽມຢາມອິນເດຍທາງລັດຖະກິດໄດ້ພ້ອມກັບທ່ານອັບດຸນຄາລາມ ປະທານາທິບໍດີອິນເດຍພົບປະຜູ່ແທນຊາວຫນຸ່ມຈີນແລະອິນເດຍ 200 ຄົນ.
ການພົບປະກັນແມ່ນດຳເນີນຢູ່ເດີ່ນຫຍ້າຕໍ່ຫນ້າໂຮງແຮມທີ່ເປັນບ່ອນພຳນັກຂອງທ່ານຫູຈີນທາວ.ໃນທ່າມກາງສຽງຮ້ອງຂອງນົກບິນ, ນາງວິເດຍ.ຊາໄດ້ອ່ານບົດກະວີຂອງຊຸບຣາມາເນຍ.ບາລະຕິ ນັກກະວີອຳມະຕະຂອງອິນເດຍດ້ວຍສຽງເພງ,ກະວີບົດນີ້ມີຄວາມຫມາຍວ່າ:ຄວາມຮັກແພງແລະຄວາມທະນົງໃຈຕໍ່ອິນເດຍແລະວັດທະນະທຳອິນເດຍບໍ່ຫນ້ອຍກວ່າຄວາມຮັກຂອງນັກກະວີທີ່ມີຕໍ່ພໍ່ແມ່ຂອງຕົນ.ນາງວີເດຍ.ຊາເວົ້າວ່າ, ຈີນອິນເດຍລ້ວນແຕ່ແມ່ນປະເທດອາລະຍະທຳບູຮານທີ່ມີປະຫວັດພັນກວ່າປີ, ກະວີດັ່ງກ່າວກໍ່ສາມາດສະແດງຄວາມຮັກແພງຂອງນາງທີ່ມີຕໍ່ຈີນແລະວັດທະນະທຳຈີນ.
ເດືອນຕຸລາປີນີ້, ນາງວິເດຍຊາພ້ອມກັບຊາວຫນຸ່ມອິນເດຍຮ້ອຍຄົນໄດ້ໄປຢ້ຽມຢາມຈີນ,ເທື່ອນີ້, ຊາວຫນຸ່ມອິນເດຍເຫລົ່ານີ້ກໍ່ໄດ້ພົບກັບຊາວຫນຸ່ມຈີນທີ່ໄປຢ້ຽມຢາມອິນເດຍ, ແລະພ້ອມກັນເຂົ້າຢ້ຽມຄຳນັບຜູ່ແນຳຂອງສອງປະເທດ.
ໃນໂອກາດພົບກັບຊາວຫນຸ່ມທີ່ຫັນມັງຂອງຈີນແລະອິນເດຍ, ທ່ານປະທານຫູຈີນທາວກໍ່ໄດ້ຫວນຄືນເຫດການຂອງຄະນະຜູ່ແທນຊາວຫນຸ່ມຈີນທີ່ທ່ານນຳພາໃນນາມເປັນປະທານສະຫະພັນຊາວຫນຸ່ມທົ່ວປະເທດຈີນໄປຢ້ຽມຢາມອິນເດຍເມື່ອ 22 ປີກ່ອນ, .ທ່ານເວົ້າວ່າ, ເພື່ອໃຫ້ມິດຕະພາບລະຫວ່າງປະຊາຊົນສອງຊາດຈີນອິນເດຍສືບຕໍ່ກັນໄປທຸກເຊັ່ນຄົນ, ລັດຖະບານຈີນຕົກລົງເຊື້ອເຊີນຊາວຫນຸ່ມອິນເດຍ 500 ຄົນໄປຢ້ຽມຢາມຈີນພາຍໃນໄລຍະ 5 ປີຂ້າງຫນ້ານີ້.ທ່ານຍັງໄດ້ນຳເອົາບົດກະວີຂອງທາໂກ ນັກກະວີທີ່ມີຊື່ສຽງຂອງອິນເດຍມາລະດົມໃຈຊາວຫນຸ່ມຈີນອິນເດຍປະກອບສ່ວນເຂົ້າໃນການຂະຫຍາຍການພົວພັນລະຫວ່າງສອງປະເທດ.ທ່ານເວົ້າວ່າ:
ຊາວຫນຸ່ມເຕັມໄປດ້ວຍຄວາມກະຕືລືລົ້ນ, ມີອຸດົມການ, ແມ່ນຄວາມຫວັງຂອງປະເທດ,ແລະກໍ່ແມ່ນອະນາຄົດຂອງມວນມະນຸດ.ປີ 1924, ໃນເວລາທ່ານທາໂກເຣ ນັກກະວີຜູ່ຍິ່ງໃຫຍ່ຂອງອິນເດຍຢ້ຽມຢາມຈີນ, ເພິ່ນເຄີຍເວົ້າວ່າ, ຊາວຫນຸ່ມເຫມືອນກັບດາວປະດັບຟ້າ,ເປັ່ງແສງແຫ່ງຄວາມຫວັງຂອງອະນາຄົດຂອງປະເທດຊາດ.ຂ້າພະເຈົ້າຫວັງຢ່າງຍິ່ງວ່າຊາວຫນຸ່ມຈີນອິນເດຍຈະເພີ່ມທະວີການແລກປ່ຽນກັນ, ເພີ່ມໄມຕີຈິດມິດຕະພາບ, ຕ່າງຮ່ຳຮຽນນຳກັນ, ຊຸກຍູ້ການຮ່ວມມື,ພ້ອມກັນຂຽນຫນ້າປະຫວັດສາດໃຫມ່ແຫ່ງການພົວພັນໄມຕີຈິດມິດຕະພາບຈີນອິນເດຍ.ພ້ອມກັນສ້າງອະນາຄົດອັນດີງາມກວ່າເກົ່າຂອງອາຊີກໍ່ຄືຂອງໂລກ.
ໃນເວລາກ່າວຄຳອວຍພອນ, ທ່ານຄາລາມ ປະທານາທິບໍດີອິນເດຍໄດ້ອ່ານກາບກອນສັນລະເສີນອິນເດຍທີ່ໂຮມສູນແນວຄິດຂົງຈື້ຂອງຈີນແລະມີເນື້ອໃນພຸດທະສາສະຫນາ. ທ່ານຮຽກຮ້ອງຊາວຫນຸ່ມຈີນອິນເດຍປະກອບ ສ່ວນເຂົ້າໃນການພັດທະນາຂອງສອງປະເທດ, ເກາະແຂນກັນພ້ອມກັນສ້າງໂລກທີ່ກົມກຽວກັນ.ທ່ານຄາລາມເວົ້າວ່າ:
ຈີນໄດ້ມີແຜນແມ່ບົດໃຫຍ່ໃນການພັດທະນາປະເທດ,ຄື ຊຸກຍູ້ການພັດທະນາເສດຖະກິດ, ແລະສ້າງສັງຄົມທີ່ກົມກຽວກັນ,ພ້ອມກັນນັ້ນຈີນຍັງຕ້ອງອະນຸລັກທັດສະນະຄຸນຄ່າດັ້ງເດີມທີ່ສືບທອດມາແຕ່ສະໄຫມຂົງຈື້ຂອງຈີນ.ເປົ້າຫມາຍຂອງພວກຂ້າພະເຈົ້າແມ່ນ,ກ່ອນປີ 2020,ສ້າງອິນເດຍເປັນປະເທດພັດທະນາທາງດ້ານເສດຖະກິດ,ອະນຸລັກວັດທະນະທຳດັ້ງເດີມຕັ້ງແຕ່ກຳເນີດພຸດທະສາສະຫນາເປັນຕົ້ນມາ.ໃນໂລກປັດຈຸບັນ, ວຽກງານຂອງຊາວຫນຸ່ມກໍ່ແມ່ນເພື່ອຊຸກຍູ້ການກຳເນີດສັງຄົມທີ່ໂອບອ້ອມອາລີ.ຈີນກັບອິນເດຍໄດ້ເສີມຂະຫຍາຍບົດບາດສຳຄັນໃນການຫລຸດຜ່ອນຄວາມທຸກຍາກຂອງໂລກ, ຜ່ານການໃຫ້ຊາວຫນຸ່ມໄປເຜີຍແຜ່ຄວາມຮູ້, ນຳໃຊ້ຊັບພະຍາກອນໃຫ້ດີກວ່າເກົ່າ,ກໍ່ອາດຈະລົບລ້າງຄວາມບໍ່ດຸນດຽງກັນໃນການພັດທະນາລະຫວ່າງບັນດາປະເທດ, ແລະບັນລຸສັນຕິພາບໄດ້.
|
|
|
