|
ທ່ານອານນານເຫັນວ່າ,ອີຣັກເກືອບໄດ້ຕົກຢູ່ໃນສົງຄາມກາງເມືອງ
cri
Author: shuo
ຕາມຂ່າວCRI:ວັນທີ27ພະຈິກນີ້,ທ່ານອານນານ ເລຂາທິການໃຫຍ່ສະຫະປະຊາຊາດກ່າວວ່າ,ເນື່ອງຈາກສະພາບການປະທະກັນດ້ວຍກຳລັງຮຸນແຮງຢູ່ພາຍໃນປະເທດອີຣັກໄດ້ນັບມື້ນັບຮຸນແຮງຂຶ້ນ,ຄົນທັງຫຼາຍເກືອບເຫັນໄດ້ວ່າ ອີຣັກໄດ້ຕົກຢູ່ໃນສົງຄາມກາງເມືອງ.
ໃນເວລາຕ້ອນຮັບການເຂົ້າສຳພາດຂອງສື່ມວນຊົນຢູ່ສຳນັກງານໃຫຍ່ສະຫະປະຊາຊາດທີ່ນິວ ຢອກ,ທ່ານອານນານເວົ້າວ່າ,ໂດຍຄຳນຶງເຖິງສະພາບຂອງອີຣັກໃນປັດຈຸບັນ,ມີແຕ່ໃຊ້ມາດຕະການໃນທັນທີເພື່ອຫຼີກເວັ້ນບໍ່ໃຫ້ສະຖານະການຊຸດຮ້າຍລົງຕື່ມອີກ,ຖ້າບໍ່ດັ່ງນັ້ນ,ການທີ່ອີຣັກຕົກຢູ່ໃນສົງຄາມກາງເມືອງຈະແມ່ນເລື່ອງຫຼີກເວັ້ນບໍ່ໄດ້,ທີ່ຈິງແລ້ວ,ອີຣັກເກືອບໄດ້ຕົກຢູ່ໃນສົງຄາມກາງເມືອງແລ້ວ.
ໃນມື້ດຽວກັນ,ບົດແຈ້ງຂ່າວຂອງNBCກໍກ່າວວ່າ,ອີຣັກໄດ້ຕົກຢູ່ໃນສົງຄາມກາງເມືອງແລ້ວ.ກ່ຽວກັບເລື່ອງນີ້,ທ່ານກໍເດິນ ຈອງໂດຼ ໂຄສົກຄະນະກຳມະການຄວາມປອດໄພແຫ່ງຊາດອາເມລິກາກ່າວວ່າ,ເຖິງວ່າປະຈຸບັນນີ້,ສະຖານະການອີຣັກຂ້ຽວຂາດຫຼາຍ,ແຕ່ທ່ານບຸສ ປະທານາທິບໍດີອາເມລິກາແລະທ່ານນູລີ ອານ ມາລີຄີ ນາຍົກລັດຖະມົນຕີອີຣັກລ້ວນແຕ່ບໍ່ເຫັນວ່າອີຣັກໄດ້ຕົກຢູ່ໃນສົງຄາມກາງເມືອງ.
ເພື່ອສະແຫວງຫາການຊ່ອຍເຫຼືອຂອງອີຣານມາຜ່ອນຄາຍສະຖານະການຄວາມປອດໄພຂອງອີຣັກໄດ້ຊຸດຮ້າຍລົງຢ່າງບໍ່ຢຸດຢັ້ງ,ຕອນຄ່ຳວັນທີ27ພະຈິກ,ທ່ານຈາລານ ທາລາບານີ ປະທານາທິບໍດີອີຣັກເລີ່ມຢ້ຽມຢາມອີຣານ,ແລະເຈລະຈາກັບທ່ານມາຣມຸດ ອາຣມາດີ ເນຈາດ ປະທານາທິບໍດີອີຣານ.
|
|
