|
ຈີນແມ່ນປະເທດພວມພັດທະນາທີ່ມີປະຊາກອນຫຼາຍ,ລະບົບປະກັນການປິ່ນປົວພະຍາດຍັງບໍ່ຄົບຖ້ວນສົມບູນ,ສະນັ້ນ,ຈະເຮັດແນວໃດເຮັດໃຫ້ຜູ້ມີລາຍໄດ້ປານກາງແລະຜູ້ມີລາຍໄດ້ຕ່ຳໄດ້ຮັບການປິ່ນ ປົວພະຍາດທີ່ລາຄາຖືກແລະມີປະສິດທິພາບສູງນີ້,ແມ່ນບັນຫາທີ່ສັງຄົມຈີນສົນໃຈນຳໂດຍທົ່ວໄປ.ໃນລາຍການພາກນີ້,ພວກເຮົາຈະພາທ່ານໄປເມືອງຊືເຈ່ຍຈ່ວງ ຕົວເມືອງພາກເໜືອຂອງຈີນ,ໄປເບິ່ງວ່າ ເມືອງນີ້ແມ່ນເຮັດແນວໃດເພື່ອແກ້ໄຂບັນຫາທີ່ມວນຊົນປິ່ນປົວພະຍາດຍາກແລະຄ່າປິ່ນປົວແພງນັ້ນເທື່ອລະກ້າວ,ໂດຍໃຊ້ວິທີຕ່າງໆ ເຊັ່ນການສ້າງຕັ້ງ ສຸກສາລາຢູ່ໃນຊຸມຊົນ ໂຮງໝໍລາຄາຖືກພ້ອມດ້ວຍການເຜີຍແຜ່ການປະກັນໄພດ້ານການປິ່ນປົວພະຍາດເປັນຕົ້ນ.
ເມືອງຊືເຈ່ຍຈ່ວງແມ່ນຕົວເມືອງທີ່ຕັ້ງຢູ່ພາກເໜືອຂອງຈີນ,ມີປະຊາກອນ9ລ້ານກວ່າຄົນ.ເພື່ອເຮັດໃຫ້ປະຊາຊົນສາມາດປິ່ນປົວພະຍາດຢ່າງສະດວກ,ເມືອງຊືເຈ່ຍຈ່ວງໄດ້ຕັ້ງສຸກສາລາຊຸມຊົນຢູ່ຫຼາຍບ່ອນທີ່ມີປະຊາກອນອາໄສຢູ່.ຫວ່າງມໍ່ໆນີ້,ນັກຂ່າວໄດ້ໄປເອົາຂ່າວຢູ່ສຸກສາລາຊຸມຊົນຢູ່ທີ່ຢູ່ໃກ້ຕະຫຼາດມ້າຄຳເມືອງຊືເຈ່ຍຈ່ວງ.ນັກຂ່າວໄດ້ເຫັນວ່າ,ທຸກສິ່ງທຸກຢ່າງໃນສຸກສາລາສະອາດດິ,ຜ້າປູຕຽງສີແດ່ງອອນເຮັດໃຫ້ຫ້ອງຄົນເຈັບອົບອຸ່ນຫຼາຍ.ໃນເວລາສັ້ນໆພຽງແຕ່10ກວ່ານາທີ,ກໍມີປະຊາຊົນ5ຫາ6ຄົນທີ່ຢູ່ໃກ້ມາກວດພະຍາດ,ກວດແລ້ວກໍເອົາຢາເມືອນຳ.
ຢູ່ອ້ອມສຸກສາລາຫຼັງນີ້ມີຊຸມຊົນຫຼາຍແຫຼ່ງ,ຍັງມີຕະຫຼາດອ່າວໃຫຍ່ແຫ່ງໜຶ່ງແລະຊູເປີມາເກັດຫຼາຍແຫ່ງ,ມີປະຊາຊົນປະມານ1ໝື່ນຄົນ.ການສ້າງຕັ້ງສຸກສາລາບໍ່ພຽງແຕ່ໄດ້ສະໜອງຄວາມສະດວກແກ່ການກວດພະຍາດຂອງຊາວເມືອງທີ່ອາໄສຢູ່ແຫ່ງນີ້ທໍ່ນັ້ນ,ຍັງໄດ້ສະໜອງຄວາມສະດວກພິເສດໃຫ້ປະຊາຊົນຜູ້ດ້ອຍໂອກາດ ເຊັ່ນ ປະຊາກອນເຄື່ອນທີ່ ຊາວເມືອງຜູ້ມີຄວາມຫຍຸ້ງຍາກດ້ານເສດຖະກິດ ຜູ້ຫວ່າງງານແລະຄົນພິການເປັນຕົ້ນ.ທ່ານກ່ວນຊິ່ງຊວນ ຫົວໜ້າສຸກສາລາແນະນຳວ່າ,ສຸກສາລາຈະຫຼຸດຄ່າປິ່ນປົວພະຍາດ 10%ໃຫ້ປະຊາຊົນຜູ້ມີຄວາມຫຍຸ້ງຍາກດ້ານເສດຖະກິດຕາມຂໍ້ກຳນົດ.ນອກນີ້,ນາຍໝໍຂອງໂຮງໝໍໃຫຍ່ຍັງໄດ້ປະກອບເປັນຄະນະຜູ້ຊ່ຽວຊານມາບໍລິການຢູ່ສຸກສາລາຊຸມຊົນ,ຖ້າມີພະຍາດທີ່ກວດຍາກກໍໄປຫາຄະນະຜູ້ຊ່ຽວຊານເພື່ອກວດກາປິ່ນປົວຢ່າງທັນການ,ຖ້າວ່າຕ້ອງການກວດກາພິເສດກໍຍ້າຍໄປກວດກາຢູ່ໂຮງໝໍໃຫຍ່ກວ່ານັ້ນ.
ປະຈຸບັນນີ້,ເມືອງຊືເຈ່ຍຈ່ວງມີສຸກສາລາຊຸມຊົນ197ຫຼັງ,ມີພະນັກງານແພດໝໍ1400ກວ່າຄົນ,ຍ້ອນການບໍລິການຂອງສຸກສາລາເຫຼົ່ານີ້ສະດວກສະບາຍແລະເກັບລາຄາຖືກ,ຈຶ່ງໄດ້ຮັບຄວາມນິຍົມຊົມຊອບຈາກຄົນທີ່ມີລາຍໄດ້ຕ່ຳ.
ພະຍາດທຳມະດາໄປກວດປິ່ນປົວຢູ່ສຸກສາລາຊຸມຊົນທັງສະດວກທັງເສຍເງິນບໍ່ຫຼາຍ. ຖ້າວ່າເປັນພະຍາດໜັກ,ກໍຕ້ອງໄປໂຮງໝໍໃຫຍ່.ເພື່ອເຮັດໃຫ້ປະຊາຊົນຜູ້ມີຄວາມຫຍຸ້ງ ຍາກດ້ານເສດຖະກິດກໍສາມາດກວດພະຍາດ,ເມືອງຊືເຈ່ຍຈ່ວງກຳນົດໃຫ້ໂຮງໝໍໃຈກາງເມືອງຊືເຈ່ຍຈ່ວງທີ່ມີຂະໜາດໃຫຍ່ກວ່າໝູ່ໃນທົ່ວເມືອງເປັນໂຮງໝໍລາຄາຖືກ.ການເງິນຂອງອົງການປົກຄອງທ້ອງຖິ່ນສະໜອງການເກື້ອກູນຈຳນວນໜຶ່ງໃຫ້ໂຮງໝໍແບບນີ້,ເມື່ອມີຜູ້ທຸກຍາກໄປກວດພະຍາດ,ກໍບໍ່ເກັບຄ່າຈົດທະບຽນ,ຄ່າກວດພະຍາດຫຼຸດລາຄາ10%,ຄ່າປິ່ນປົວພະຍາດຫຼຸດລາຄາ5%,ແລະຄ່າຕຽງຄົນເຈັບຫຼຸດ50%.
ເດືອນສິງຫາປີນີ້,ນາງເຊ້ຊູ່ເຟີ່ງຂອງເຂດຊຸມຊົນຈ້ຽນມີນເປັນພະຍາດເຍື່ອຫຸ້ມປອດອັກເສບ,ພີ່ນ້ອງໃນຄອບຄົວຂອງນາງໄດ້ຄິດຮອດໂຮງໝໍລາຄາຖືກກ່ອນໝູ່.ພວກເຂົາເຈົ້າຖືບັດກວດພະຍາດຂອງຄົນທຸກຍາກໄປໂຮງໝໍໃຈກາງເມືອງຊືເຈ່ຍຈ່ວງ,ຜ່ານການກວດ ກາປິ່ນປົວໃນໂຮງໝໍນີ້,ບໍ່ພຽງແຕ່ເຮັດໃຫ້ນາງເຊ້ຊູ່ເຟີ່ງຊວາງເຊົາທໍ່ນັ້ນ,ຍັງໄດ້ປະຢັດເງິນຫຼາຍ.ແມ່ຂອງນາງເຊ້ຊູ່ເຟີ່ງເວົ້າຕໍ່ນັກຂ່າວວ່າ:"ໂຮງໝໍລາຄາຖືກໃຫ້ຄວາມສະດວກພິເສດຫຼາຍແກ່ຜູ້ມີລາຍໄດ້ຕ່ຳ,ພວກເຮົາຫາກໍໄດ້ບັດກວດພະຍາດຂອງຄົນທຸກຍາກ,ລູກສາວກໍໃສເປັນພະຍາດ,ພໍດີໄດ້ໃຊ້."
ທ່ານເຊິ່ງຟານເວີນ ຮອງຫົວໜ້າໂຮງໝໍໃຈກາງເມືອງຊືເຈ່ຍຈ່ວງເວົ້າວ່າ: "ໃນໂຮງໝໍພວກເຮົາ,ບໍ່ວ່າຄົນເຈັບຜູ້ມີລາຍໄດ້ຕ່ຳຫຼືວ່າຄົນເຈັບທຳມະດາ,ລ້ວນແຕ່ໄດ້ຮັບການບໍລິການເທົ່າທຽມກັນໃນເວລາກວດກາພະຍາດແລະປິ່ນປົວພະຍາດ,ແຕ່ເກັບລາຄາຖືກຕໍ່ປະຊາຊົນຜູ້ມີຄວາມຫຍຸ້ງຍາກດ້ານເສດຖະກິດ.ເຖິງວ່າໄດ້ເກັບລາຄາຖືກນຳເຂົາເຈົ້າ,ແຕ່ຄຸນນະພາບຂອງການບໍລິການກໍບໍ່ຕ່ຳກວ່າຜູ້ອື່ນ."
ອົງການປິ່ນປົວພະຍາດໄດ້ໃຊ້ຫຼາຍວິທີເພື່ອແກ້ໄຂບັນຫາທີ່ຜູ້ມີລາຍໄດ້ຕ່ຳໃຫ້ໄດ້ກວດກາພະຍາດໃນລາຄາຖືກ,ສ່ວນການສ້າງລະບອບປະກັນການປິ່ນປົວພະຍາດໃຫ້ເຂັ້ມແຂງແລະສົມບູນເຮັດໃຫ້ຜູ້ມີລາຍໄດ້ຕ່ຳໄດ້ຮັບຜົນດີຫຼາຍຂຶ້ນ.
ນາງຮູກຸ້ຍສຽວມີຄວາມຫຍຸ້ງຍາກດ້ານເສດຖະກິດ,ເມື່ອໄດ້ເຂົ້າຮ່ວມການປະກັນໄພດ້ານການປິ່ນປົວພະຍາດໜຶ່ງປີແລ້ວ,ນາງໄດ້ຖືກກວດພົບເປັນພະຍາດເນື້ອງອກໃນມົດລູກ.ນາງຮູກຸ້ຍສຽວບໍ່ມີເງິນສະສົມ,ຕ້ອງອາໄສເງິນສົງເຄາະດຳລົງຊີວິດ.ຖ້າວ່າບໍ່ໄດ້ເຂົ້າຮ່ວມ ການປະກັນໄພດ້ານການປິ່ນປົວພະຍາດ,ຄ່າຜ່າຕັດ7ພັນກວ່າຢວນຈະເປັນເງິນທີ່ນາງບໍ່ສາມາດຈ່າຍໄດ້ເລີຍ."ການປິ່ນປົວພະຍາດຕ້ອງເສຍເງິນ7ພັນກວ່າຢວນ,ຂ້ອຍຈ່າຍເອງ1ພັນກວ່າຢວນ,ການປະກັນໄພດ້ານການປິ່ນປົວພະຍາດຈ່າຍໃຫ້5ພັນກວ່າຢວນ,ມັນໄດ້ຊ່ອຍຂ້ອຍຫຼາຍ,ຖ້າໃຫ້ຂ້ອຍຈ່າຍເອງ7ພັນຢວນ,ຂ້ອຍຈ່າຍບໍ່ໄດ້ດອກ."
ທ່ານສ່ຽວຊື້ເຈ ຮອງຫົວໜ້າພະແນກແຮງງານແລະປະກັນສັງຄົມຂອງເມືອງຊືເຈ່ຍຈ່ວງແນະນຳວ່າ,ນັບມາຮອດທ້າຍເດືອນມິຖຸນາປີນີ້,ຜູ້ເຂົ້າຮ່ວມການປະກັນໄພດ້ານການປິ່ນ ປົວພະຍາດພື້ນຖານໃນທົ່ວເມືອງໄດ້ບັນລຸເກືອບ1ລ້ານຄົນ.ຕໍ່ໄປ,ວຽກງານປະກັນໄພ ການປິ່ນປົວພະຍາດພື້ນຖານຈະຈາກພະນັກງານຕົວເມືອງຂະຫຍາຍໄປຮອດປະຊາຊົນ ຕົວເມືອງ,ຈຸດໜັກແມ່ນປຸກລະດົມໃຫ້ຄົນຕ່າງຖິ່ນທີ່ມາເຮັດວຽກຢູ່ເມືອງຊືເຈ່ຍຈ່ວງ,ໂດຍສະເພາະແມ່ນຜູ້ເຮັດວຽກໃນວິສາຫະກິດເອກະຊົນນັ້ນເຂົ້າຮ່ວມການປະກັນໄພ.ທ່ານສ່ຽວຊື້ເຈເວົ້າວ່າ:"ແຕ່ປີນີ້ເປັນຕົ້ນໄປ,ພວກເຮົາຈະໃຫ້ການປະກັນໄພດ້ານການປິ່ນປົວພະຍາດພື້ນຖານຂະຫຍາຍໄປຮອດປະຊາຊົນຕົວເມືອງທັງໝົດ,ບວກກັບວຽກງານການຮ່ວມມືປິ່ນປົວພະຍາດຂອງຊົນນະບົດກ້າວສູ່ລວງເລິກແລະກ້າວໄປໜ້າ,ເມື່ອຮອດປີ2008,ຄົນໃນເມືອງທຸກຖ້ວນໜ້າຂອງເມືອງຊືເຈ່ຍຈ່ວງພວກເຮົາລ້ວນແຕ່ຈະໄດ້ຮັບການປະກັນໄພການປິ່ນປົວພະຍາດ,ນັ້ນແມ່ນເລື່ອງທີ່ຈະເຮັດໃຫ້ຄົນສະບາຍໃຈ.ພວກເຮົາພວມເຮັດວຽກງານໃນດ້ານນີ້."
|
