|
ທີ່ນີ້ ວິທະຍຸສາກົນແຫ່ງປະເທດຈີນ,ສະບາຍດີທ່ານຜູ້ຟັງທີ່ໂຄລົບ, ຫຼາຍໆປະເທດຂອງໂລກ,ລ້ວນແຕ່ມີແພດສາດພື້ນເມືອງຂອງຕົນເອງ,ຕົວຢ່າງຄືແພດສາດແລະຢາພື້ນເມືອງຂອງຈີນ,ການຝຶກໂຍຄະຂອງອິນເດຍແລະແພດສາດພື້ນເມືອງຂອງເອີລົບເປັນຕົ້ນ. ແພດສາດພື້ນເມືອງເຫຼົ່ານີ້ແມ່ນທິດສະດີວິທະຍາສາດແລະວິທີກວດແລະປິ່ນປົວພະຍາດທີ່ມີເອກະລັກແລະເປັນລະບົບທີ່ຈໍ່ຕົວຂຶ້ນໃນການອອກແຮງງານຍາວນານແລະການຕໍ່ສູ້ກັບພະຍາດຂອງປະຊາຊົນປະເທດຕ່າງໆ,ໄດ້ເສີມຂະຫຍາຍບົດບາດທີ່ສຳຄັນເພື່ອປ້ອງກັນ,ປິ່ນປົວພະຍາດແລະພັດທະນາແພດສາດຂອງມະນຸດເຮົາ. ແຕ່ຍ້ອນມູນເຫດຕ່າງໆ,ແພດສາດພື້ນເມືອງເຫຼົ່ານີ້ມີບາງອັນບໍ່ໄດ້ສືບທອດກັນມາຫຼືມຸດມ້ວຍໄປແລ້ວ.
ຄຽງຄູ່ກັບວິທະຍາສາດເຕັກນິກພັດທະນາຢ່າງວ່ອງໄວພ້ອມທັງມະນຸດເຮົາມີຄວາມຮັບຮູ້ໃໝ່ຕໍ່ພະຍາດໂລຄາ,ທັດສະນະຄະຕິກ່ຽວກັບສຸຂະພາບແລະວິທີປິ່ນປົວພະຍາດເປັນຕົ້ນ,ຄົນທັງຫຼາຍໄດ້ຄ່ອຍໆຮູ້ຈັກຈຸດພິເສດບາງຢ່າງຂອງແພດສາດພື້ນເມືອງ, ບາງບັນຫາທີ່ແພດສາດຍຸກປັດຈຸບັນແກ້ໄຂບໍ່ໄດ້ນັ້ນສາມາດແກ້ໄດ້ໃນແພດສາດພື້ນເມືອງ,ສະນັ້ນ,ປະເທດຕ່າງໆໃນໂລກຈຶ່ງພາກັນເພີ່ມທະວີການຄົ້ນຄວ້າແລະນຳໃຊ້ແພດສາດພື້ນເມືອງ. ໃນລາຍການສວນວິທະຍາສາດແລະການສຶກສາພາກນີ້,ພວກເຮົາຈະແນະນຳສະພາບຈີນແລກປ່ຽນກັບຕ່າງປະເທດໃນຂະແໜງແພດສາດພື້ນເມືອງ. (ດົນຕີຂັ້ນ)
ຢູ່ຈີນ,ແພດສາດແລະຢາພື້ນເມືອງຂອງຈີນໄດ້ຮັບຄວາມເອົາໃຈໃສ່ໂດຍຕະຫຼອດ,ສະນັ້ນ ຈຶ່ງໄດ້ມີການພັດທະນາດີສົມຄວນ,ແລະໄດ້ກາຍເປັນພາກສ່ວນປະກອບທີ່ສຳຄັນທີ່ສຸດໃນແພດສາດພື້ນເມືອງຂອງໂລກພາຍໃຕ້ການກະຕຸກຊຸກຍູ້ຂອງຈີນ. ທ່ານເສີນຈື້ຊຽງ ຫົວໜ້າກົມຮ່ວມມືກັບຕ່າງປະເທດຂອງກົມຄຸ້ມຄອງແພດສາດແລະຢາພື້ນເມືອງແຫ່ງຊາດຈີນບອກໃຫ້ຮູ້ວ່າ: (ອັດສຽງ 1)
"ຫຼາຍປະເທດໃນໂລກລ້ວນແຕ່ມີແພດສາດພື້ນເມືອງທີ່ຕ່າງກັນ,ບໍ່ວ່າເວົ້າໃນດ້ານທິດສະດີຫຼືດ້ານພຶດຕິກຳລ້ວນແຕ່ເຫັນໄດ້ວ່າ,ແພດສາດພື້ນເມືອງຈີນແມ່ນອ່າວເປັນລະບົບ,ຍ້ອນວ່າມັນມີລະບົບຂອງຕົນ,ສະນັ້ນ ຈຶ່ງໄດ້ເຜີຍແຜ່ກວ້າງສົມຄວນຢູ່ຕ່າງປະເທດ."
ໃນເວລາຈີນດຳເນີນການແລກປ່ຽນກັບຕ່າງປະເທດແພດສາດພື້ນເມືອງ, ກ່ອນອື່ນແມ່ນໄດ້ແນະນຳແພດສາດແລະຢາພື້ນເມືອງຈີນໃຫ້ຕ່າງປະເທດຮູ້. ເລີ່ມແຕ່ຊຸມປີ 1970 ເປັນຕົ້ນມາ,ພາຍໃຕ້ການສະໜັບສະໜູນຂອງລັດຖະບານຈີນ,ແພດສາດແລະຢາພື້ນເມືອງຈີນຈຶ່ງໄດ້ກ້າວໄປສູ່ໂລກຢ່າງວ່ອງໄວ. ຕາມສະຖິຕິທີ່ຍັງບໍ່ຄົບຖ້ວນ,ປັດຈຸບັນ,ແພດສາດແລະຢາພື້ນເມືອງຈີນໄດ້ເຜີຍແຜ່ໄປຮອດ 130 ກວ່າປະເທດແລ້ວ,ໂຮງໝໍແພດສາດຈີນຢູ່ຕ່າງປະເທດມີຢູ່ປະມານ 5 ໝື່ນກວ່າແຫ່ງ,ມີນາຍໝໍຫຼາຍກວ່າ 1 ແສນ 2 ໝື່ນຄົນ.
ນອກນີ້,ການແລກປ່ຽນລະຫວ່າງຈີນກັບຕ່າງປະເທດໃນດ້ານການອົບຮົມຜູ້ມີຄວາມຮູ້ຄວາມສາມາດແລະຄົ້ນຄວ້າແພດສາດແລະຢາພື້ນເມືອງຈີນກໍໄດ້ຈັດຂຶ້ນເລື້ອຍໆ. ໃນຫຼາຍປີມານີ້,ຈຳນວນນັກສຶກສາຕ່າງປະເທດທີ່ມາຮັບການສຶກສາແລະອົບຮົມແພດສາດແລະຢາພື້ນເມືອງຈີນຢູ່ຈີນນັ້ນຫຼາຍກວ່າຜູ້ຮຽນວິຊາວິທະຍາສາດທຳມະຊາດອື່ນໆໂດຍຕະຫຼອດ. ໃນຫຼາຍປີມານີ້,ມະຫາວິທະຍາໄລແພດສາດແລະຢາພື້ນເມືອງຈຳນວນໜຶ່ງຂອງຈີນໄດ້ຮ່ວມມືກັບມະຫາວິທະຍາໄລຂອງຫຼາຍປະເທດແລະເຂດແຄວ້ນ,ສ້າງຕັ້ງສະຖາບັນແພດສາດແລະຢາພື້ນເມືອງຈີນຫຼືຕັ້ງຂະແໜງວິຊາແພດສາດຈີນຢູ່ມະຫາວິທະຍາໄລ,ພ້ອມກັນອົບຮົມຜູ້ມີຄວາມຮູ້ຄວາມສາມາດດ້ານແພດສາດແລະຢາພື້ນເມືອງຈີນ. ການຮ່ວມມືລະຫວ່າງໂຮງຮຽນຊັ້ນສູງກັບໂຮງໝໍ,ອົງການຄົ້ນຄວ້າແລະໂຮງງານຜະລິດຂອງຈີນແລະຕ່າງປະເທດກໍໄດ້ເພີ່ມຂຶ້ນຢ່າງບໍ່ຢຸດຢັ້ງ,ລະດັບກໍໄດ້ເພີ່ມຂຶ້ນຢ່າງເດັ່ນຊັດ. ຕົວຢ່າງຄືຈີນກັບຕານຊານີຮ່ວມມືຄົ້ນຄວ້າປິ່ນປົວພະຍາດເອດດ້ວຍແພດສາດແລະຢາພື້ນເມືອງຈີນ,ຈີນກັບອົສຕຼາລີຮ່ວມມືຄົ້ນຄວ້າການປ້ອງກັນແລະປິ່ນປົວພະຍາດເລືອດດ້ວຍຢາພື້ນເມືອງຈີນແລະອື່ນໆ.
ນອກຈາກໂຄສະນາແພດສາດແລະຢາພື້ນເມືອງຈີນໃຫ້ຕ່າງປະເທດຊາບແລ້ວ,ຈີນຍັງສຸດທີ່ເອົາໃຈໃສ່ນຳການຮ່ວມມືກັບປະເທດຕ່າງໆໃນໂລກໃນດ້ານການສ້າງກົດໝາຍ,ຄຸ້ມຄອງໃນດ້ານແພດສາດພື້ນເມືອງພ້ອມດ້ວຍການຈັດເອົາແພດສາດແລະຢາພື້ນເມືອງເຂົ້າໃນລະບົບສາທາລະນະສຸກແຫ່ງຊາດ.
ອົງການອະນາໄມໂລກເຫັນວ່າ,ແພດສາດພື້ນເມືອງແລະຊັບສິນຮ່ວມດ້ານອາລະຍະທຳຂອງມະນຸດ,ແມ່ນຊັບພະຍາກອນສາທາລະນະສຸກທີ່ສຳຄັນທີ່ສຸດ,ດັ່ງນັ້ນ,ອົງການອະນາໄມໂລກໄດ້ຕັ້ງໜ້າຊຸກຍູ້ການພັດທະນາຂອງແພດສາດພື້ນເມືອງ,ນາງມາເລໂບນາ ມັດໂຊໂຊ ຫົວໜ້າກົມຮ່ວມມືເຕັກນິກຢຸກຢາພື້ນຖານແລະແພດສາດພື້ນເມືອງຂອງອົງການອະນາໄມໂລກເວົ້າວ່າLສຽງ 2)
"ໃນຍຸດທະສາດພັດທະນາແພດສາດພື້ນເມືອງທົ່ວໂລກທີ່ອົງການອະນາໄມໂລກວາງອອກມາໃນປີ 2003,ໄດ້ຮຽກຮ້ອງໃຫ້ປະເທດສະມາຊິກຂອງອົງການອະນາໄມໂລກຈັດວາງນະໂຍບາຍແຫ່ງຊາດເພື່ອພັດທະນາແພດສາດແລະຢາພື້ນເມືອງ,ແລະຢາກໃຫ້ບັນດາປະເທດຈັດເອົາແພດສາດແລະຢາພື້ນເມືອງເຂົ້າໃນລະບົບສາທາລະນະສຸກແຫ່ງຊາດໂດຍອີງຕາມສະພາບຄວາມເປັນຈິງປະເທດຕົນ."
ຈີນມີກົດໝາຍກົດລະບຽບແລະວິທີຄຸ້ມຄອງທີ່ອ່າວລະອຽດແລະຮອບດ້ານໃນດ້ານແພດສາດແລະຢາພື້ນເມືອງຈີນ,ຈີນຍັງແມ່ນປະເທດສ່ວນໜ້ອຍໃນໂລກທີ່ຈັດເອົາແພດສາດແລະຢາພື້ນເມືອງເຂົ້າໃນລະບົບສາທາລະນະສຸກແຫ່ງຊາດ. ສະນັ້ນ,ວິທີຂອງຈີນໃນດ້ານນີ້ໄດ້ຮັບຄວາມຢືນຢັນແລະຄວາມຍ້ອງຍໍຈາກອົງການອະນາໄມໂລກ,ແລະໄດ້ໂຄສະນາຕໍ່ປະເທດອື່ນ.
ຫຼາຍປະເທດໄດ້ຈັດຕັ້ງຄະນະມາຈີນເພື່ອທັດສະນະສຶກສາສະພາບທີ່ຈີນສ້າງກົດໝາຍ,ຄຸ້ມຄອງແລະຈັດເອົາແພດສາດແລະຢາພື້ນເມືອງຈີນເຂົ້າໃນລະບົບສາທາລະນະສຸກແຫ່ງຊາດ,ຈີນຍັງໄດ້ເຊັນສັນຍາກັບອົງການອະນາໄມໂລກ,ໂດຍໃຫ້ຄຳໝັ້ນສັນຍາວ່າຈະຊ່ວຍອົງການອະນາໄມໂລກຊຸກຍູ້ການພັດທະນາຂອງແພດສາດແລະຢາພື້ນເມືອງໃນທົ່ວໂລກດ້ວຍຮູບການແລກປ່ຽນຫຼາຍຢ່າງເຊັ່ນຂໍ້ມູນຂ່າວສານແລະເຕັກນິກເປັນຕົ້ນ. ທ່ານຫຼີຕ້ານິງ ຮອງຫົວໜ້າກົມຄຸ້ມຄອງແພດສາດແລະຢາພື້ນເມືອງແຫ່ງຊາດຈີນເວົ້າວ່າ: (ອັດສຽງ 3)
"ຈີນແມ່ນປະເທດສະມາຊິກຂອງອົງການອະນາໄມໂລກ,ພາຍໃຕ້ການຊີ້ນຳຂອງອົງການອະນາໄມໂລກ,ມີພັນທະກໍມີຄວາມສາມາດຕັ້ງໜ້າຊຸກຍູ້ການພັດທະນາແລະການນຳໃຊ້ແພດສາດແລະຢາພື້ນເມືອງ,ແບ່ງປັນບົດຮຽນຂອງຕົນໃຫ້ປະເທດຕ່າງໆ,ໂດຍສະເພາະແມ່ນສະເໜີວິທີລະອຽດທີ່ອີງຕາມສະພາບຄວາມເປັນຈິງຂອງຈີນ,ຈັດເອົາແພດສາດແລະຢາພື້ນເມືອງຈີນເຂົ້າໃນລະບົບສາທາລະນະສຸກໃຫ້ປະເທດຕ່າງໆໃນໂລກ,ເພື່ອປະກອບສ່ວນຂອງຕົນ."
ໃນຂະນະທີ່ແພດສາດແລະຢາພື້ນເມືອງຈີນກ້າວໄປສູ່ໂລກ,ແພດສາດພື້ນເມືອງຂອງປະເທດອື່ນໆເຊັ່ນໂຍຄະກໍໄດ້ເຜີຍແຜ່ມາຮອດຈີນ. ທ່ານເສີນຈື້ຊຽງ ຫົວໜ້າກົມຮ່ວມມືກັບຕ່າງປະເທດຂອງກົມຄຸ້ມຄອງແພດສາດແລະຢາພື້ນເມືອງແຫ່ງຊາດຈີນເຫັນວ່າ,ໃນຂະນະທີ່ເຜີຍແຜ່ແພດສາດແລະຢາພື້ນເມືອງຈີນສູ່ປະເທດຕ່າງໆໃນໂລກນັ້ນ ຈີນກໍຄວນຮັບເອົາຊັບພະຍາກອນແພດສາດພື້ນເມືອງຂອງປະເທດອື່ນໆ,ເພື່ອຮັບໃຊ້ສຸຂະພາບຂອງປະຊາຊົນຈີນ.ທ່ານເວົ້າວ່າ: (ອັດສຽງ 4)
"ຍົກຕົວຢ່າງຄືຢາ Dragon's Blood ມີຜົນແກ້ພະຍາດເລືອດ,ໃຊ້ໄດ້ຫຼາຍໃນການປິ່ນປົວພະຍາດຫົວໃຈແລະຮ່າງກາຍບາດເຈັບ, ແຕ່ຢານີ້ມາແຕ່ໃສ? ມາແຕ່ປ່າໄມ້ຝົນເຂດແຖບຮ້ອນຂອງອິນໂດເນເຊຍ. ຍັງມີຢາທີ່ເປັນເຄື່ອງຫອມບາງຊະນິດ,ແມ່ນພວກເຮົານຳເຂົ້າຈາກອະຟິຼກາຫຼືໂລກອາລັບພາຍຫຼັງລາຊະວົງຖາງແລ້ວ,ແລະໄດ້ກາຍເປັນຢາພື້ນເມືອງຈີນແລ້ວ. ທີ່ຈິງແລ້ວ,ໃນສະໄໝບູຮານ,ການແລກປ່ຽນແລະການຮ່ວມມືລະຫວ່າງຈີນກັບຕ່າງປະເທດເຮັດໄດ້ດີຫຼາຍ,ສະນັ້ນ,ຂ້າພະເຈົ້າຮູ້ສຶກວ່າ,ດຽວນີ້ ເສດຖະກິດຂອງປະເທດພວກເຮົາພັດທະນາແລ້ວ,ວິທະຍາສາດກ້າວໜ້າແລ້ວ,ຍິ່ງມີຄວາມສາມາດແລະກຳລັງດຶງ ດູດເອົາບົດຮຽນແລະຢຸກຢາຂອງປະເທດອື່ນໆ,ມັນມີຜົນດີຕໍ່ພວກເຮົາ."
ເອົາລະທ່ານຜູ້ຟັງທີ່ໂຄລົບ,ລາຍການສວນວິທະຍາສາດແລະການສຶກສາພາກນີ້ ຂໍຈົບລົງພຽງທໍ່ນີ້,ຂອບໃຈທ່ານທີ່ຮັບຟັງ,ສະບາຍດີ.
|
