|
|
 |
| (GMT+08:00)
2006-12-29 14:48:59
|
 |
|
ຄົນຈີນນິຍົມດຳເນີນທຸລະກິດທາງອິນເຕີເນັດ
cri
ທີ່ນີ້ວິທະຍຸສາກົນແຫ່ງປະເທດຈີນ,ສະບາຍດີທ່ານຜູ້ຟັງທີ່ເຄົາລົບ,ຢູ່ປະເທດຈີນ,ຄຽງຄູ່ກັບລະດັບຂອງເຕັກໂນໂລຊີອິນເຕີເນັດໄດ້ສູງຂຶ້ນແລະອິນເຕີເນັດໄດ້ເຜີຍແຜ່ກວ້າງອອກຕື່ມອີກ,ການຄ້າເອເລັດໂຕຼນິກໄດ້ຄ່ອຍໆກາຍເປັນວິທີຕົ້ນຕໍຂອງການຄ້າຂາຍຂອງບາງຄົນທີ່ມີສະໜອງດ້ານການຄ້າໄດ້ເຮັດທຸລະກິດໂດຍຜ່ານອິນເຕີເນັດ,ໃນນັ້ນ,ມີບາງຄົນໄດ້ຕັ້ງຮ້ານຄ້າຂອງຕົນຢູ່ໃນອິນເຕີເນັດ,ໄດ້ຮັບກຳໄລຈາກການຄ້າຂາຍທາງອິນເຕີເນັດ.ຍັງມີບາງຄົນຜ່ານຈາກອິນເຕີເນັດເພື່ອມອບສົ່ງຜະລິດຕະພັນທີ່ມີຫົວຄິດປະດິດສ້າງ,ຫາລາຍໄດ້ດ້ວຍການອອກແຮງງານທາງດ້ານມັນສະໝອງ.ໃນລາຍການສວນວິທະຍາສາດແລະການສຶກສາມື້ນີ້,ພວກເຮົາຈະສະເໜີສະພາບກ່ຽວກັບຄົນຈີນນິຍົມຄ້າຂາຍທາງອິນເຕີເນັດສູ່ທ່ານຟັງ.
ບົດລາຍງານສະຖິຕິທີ່ສູນຂໍ້ມູນຂ່າວສານອິນເຕີເນັດຈີນປະກາດສະແດງໃຫ້ເຫັນວ່າ,ປະຈຸບັນ,ຈຳນວນຄົນຈີນທີ່ໃຊ້ອິນເຕີເນັດມີເຖິງ 100 ລ້ານກວ່າຄົນແລ້ວ,ຈຳນວນຄອມພີວເຕີທີ່ເຂົ້າເຄືອຂ່າຍອິນເຕີເນັດກໍ່ລື່ນກາຍ 50 ລ້ານເຄື່ອງ.ກໍ່ແມ່ນຍ້ອນການນຳໃຊ້ອິນເຕີເນັດຢ່າງກວ້າງຂວາງ,ເຮັດໃຫ້ການເຮັດທຸລະກິດທາງອິນເຕີເນັດກາຍເປັນເລື່ອງທີ່ເປັນໄປໄດ້.ນາງຫລີວຢິງຢິງທີ່ພວມຮຽນຢູ່ມະຫາວິທະຍາໄລກໍ່ໄດ້ຕັ້ງຮ້ານຂາຍເຄື່ອງນຸ່ງຢູ່ໃນອິນເຕີເນັດ,ນາງເວົ້າວ່າ, "ນັກສຶກສາຍິງມັກຊື້ເຄື່ອງນຸ່ງ,ແຕ່ກ່ອນ ຂ້ອຍມັກໄປຊື້ເຄື່ອງນຸ່ງຢູ່ຕະຫລາດຂາຍສົ່ງ,ພາຍຫລັງມາຂ້ອຍປະກົດເຫັນວ່າ,ນັກສຶກສາແມ່ນຜູ້ບໍລິໂພກອັນກວ້າງໃຫຍ່,ຕົນເອງດຳເນີນທຸລະກິດຄ້າຂາຍທາງອິນເຕີເນັດຈະດີກວ່າ.ເວລາຂ້ອຍໄປຊື້ເຄື່ອງນຸ່ງກໍ່ໄດ້ຊອກຫາຊ່ອງທາງນຳເຂົ້າຈຳນວນໜຶ່ງໄວ້,ເວລາຕັ້ງຮ້ານຄ້າທາງອິນເຕີເນັດກໍ່ພໍດີເອົາມາໃຊ້ໄດ້."
ຍ້ອນວ່າໃນການຊື້ຂາຍກັນທາງອິນເຕີເນັດ,ສອງຝ່າຍທີ່ຄ້າຂາຍກັນບໍ່ໄດ້ເຫັນໜ້າກັນ,ສະນັ້ນ,ຈະຊຳລະເງິນແລະຮັບປະກັນຄວາມປອດໄພຂອງການຄ້າຂາຍແນວໃດຈິ່ງຈະໄດ້ຮັບຄວາມໄວ້ວາງໃຈທີ່ສຸດ,ປະຈຸບັນ,ການດຳເນີນທຸລະກິດທາງອິນເຕີເນັດສ່ວນບຸກຄົນຂອງຈີນແມ່ນນັກທຸລະກິດອິນເຕີເນັດເປັນຝ່າຍທີ່ສາມໃນການ ຊຳລະເງິນ,ໝາຍຄວາມວ່າ,ຜູ້ຊື້ຈ່າຍເງິນໃຫ້ນັກທຸລະກິດບໍລິການອິນເຕີເນັດ,ຫລັງຈາກຜູ້ດຳເນີນທຸລະກິດຮ້ານຄ້າທາງອິນເຕີເນັດສົ່ງເຄື່ອງໃຫ້ຜູ້ຊື້ແລະຢືນຢັນວ່າໄດ້ຮັບແລ້ວ,ນັກທຸລະກິດອິນເຕີເນັດຈິ່ງຈ່າຍເງິນໃຫ້ເຈົ້າຂອງຮ້ານຄ້າທາງອິນເຕີເນັດ,ການຊື້ຂາຍກໍ່ສຳເລັດລົງ.
ການຕັ້ງຮ້ານຄ້າທາງອິນເຕີເນັດບໍ່ຕ້ອງລົງທຶນຫລາຍ,ແລະກໍ່ບໍ່ຕ້ອງເສຍເວລາຫລາຍ.ແຕ່ຍ້ອນການຕັ້ງຮ້ານຄ້າໃນອິນເຕີເນັດສາມາດເຮັດເປັນອາຊີບສຳຮອງ,ລາຍໄດ້ກໍ່ດີ,ສະນັ້ນຈິ່ງໄດ້ຮາບຄວາມຊົມເຊີຍຈາກຊາວໜຸ່ມຈີນທີ່ສຸດ.ການສຳຫລວດສະແດງໃຫ້ເຫັນວ່າ,ປະຈຸບັນ,ຮ້ານຄ້າທາງອິນເຕີເນັດຂອງຈີນໄດ້ດຳເນີນທຸລະກິດຊື້ຂາຍສິນຄ້າຫລາຍຫລາຍຊະນິດ,ຮ້ານຄ້າກໍ່ມີໃຫຍ່ມີນ້ອຍ,ຮ້ານຄ້ານ້ອຍອາດຈະພຽງແຕ່ແມ່ນຕົວແທນຈຳໜ່າຍຍີ່ຫໍ້ໜຶ່ງເທົ່ານັ້ນ,ຮ້ານໃຫຍ່ອາດຈະແມ່ນຈຳໜ່າຍສິນຄ້ານັບເປັນຮ້ອຍເປັນພັນຊະນິດ.ຖ້າລາຍໄດ້ຈາກການຄ້າຂາຍທາງອິນເຕີເນັດລື່ນກາຍລາຍໄດ້ຂອງອາຊີບປະຈຸບັນ,ຫລາຍໆຄົນຍັງລາອອກຈາກອາຊີບເກົ່າແລ້ວດຳເນີນທຸລະກິດການຄ້າທາງອິນເຕີເນັດຢ່າງດຽວ.
ປີ1999,ຢູ່ຈີນໄດ້ປະກົດມີຮ້ານຄ້າທາງອິນເຕີເນັດເທື່ອທຳອິດ,ປະຈຸບັນ, ຈຳນວນຮ້ານຄ້າອິນເຕີເນັດຢູ່ຈີນໄດ້ລື່ນກາຍ 4 ແສນ ແຫ່ງ,ຜູ້ຕັ້ງຮ້ານຄ້າອິນເຕີເນັດສ່ວນບຸກຄົນມີເກືອບເຄິ່ງໜຶ່ງໄດ້ຮັບລາຍໄດ້ເກີນ 3 ໝື່ນຢວນຕໍ່ປີ,ມີເຈົ້າຂອງຮ້ານຄ້າອິນເຕີເນັດ 20% ໄດ້ຮັບລາຍໄດ້ເກີນໝື່ນຢວນຕໍ່ເດືອນ.ຢູ່ທົ່ວປະເທດຈີນ,ຈຳນວນຄົນທີ່ຄ້າຂາຍ ກັນທາງອິນເຕີເນັດໄດ້ລື່ນກາຍ 15 ລ້ານຄົນ.ເປັນຫຍັງຕັ້ງຮ້ານຄ້າອິນເຕີເນັດຈິ່ງໄດ້ກຳໄລດີປານນີ້,ເຈົ້າຂອງຮ້ານຜູ້ໜຶ່ງທີ່ຊື່ວ່າ "ສາວນ້ອຍ"ໄດ້ເລົ່າບົດຮຽນການຕັ້ງຮ້ານຂອງຕົນສູ່ນັກຂ່າວຟັງວ່າ:"ຕົ້ນຕໍແມ່ນຂ້ອຍຂາຍເຄື່ອງສຳອາງແລະຜະລິດຕະພັນເສີມສວຍບຳລຸງຜີວ,ຂ້ອຍຄິດວ່າ,ຜົນສຳເລັດຂອງຂ້ອຍນັ້ນແມ່ນຍ້ອນວ່າ,ພາຍຫລັງຕົກລົງຊື້ຂາຍກັນແລ້ວ,ຂ້ອຍກໍ່ຝາກຂອງໃຫ້ລູກຄ້າຢ່າງວ່ອງໄວທີ່ສຸດ,ເພື່ອໃຫ້ລູກຄ້າໄດ້ຮັບຂອງທັນໃຈ.ການຊື້ຂາຍທາງອິນເຕີເນັດ,ໃຜໆກໍ່ຢ້ານວ່າເມື່ອຈ່າຍເງິນແລ້ວບໍ່ໄດ້ຮັບສິນຄ້າ,ສະນັ້ນ,ການໄດ້ຮັບຂອງໄວເທົ່າໃດ,ລູກຄ້າກໍ່ຍິ່ງໄວ້ໃຈເຮົາເທົ່ານັ້ນ.ນີ້ແມ່ນວິທີທີ່ດີທີ່ສຸດທີ່ເຮັດໃຫ້ລູກຄ້າກາຍເປັນຂາປະຈຳ,ເຖິງວ່ານີ້ແມ່ນບັນຫາປີກຍ່ອຍ,ແຕ່ພັດໄດ້ຜົນທີ່ສຸດ."
ປະຈຸບັນ,ຍັງມີຄົນຈຳພວກໜຶ່ງຖືກເອິ້ນເປັນ "ວິດຄີ(WITKEY)",ກຸ່ມຄົນເຫົ່ຼານີ້ໄດ້ທຳລາຍແບບແຜນເຮັດວຽກເກົ່າ,ເຂົາເຈົ້າບໍ່ແມ່ນພະນັກງານບໍລິສັດທີ່ນັ່ງຢູ່ໃນຫ້ອງການນັ້ນອີກ,ຫາກເປັນກຸ່ມຄົນSOHOທີ່ເຮັດວຽກຢູ່ໃນເຮືອນ.
ຄຳວ່າ "ວິດຄີ"ທຳອິດແມ່ນສະເໜີອອກມາໃນເດືອນກໍລະກົດປີ 2005,ແມ່ນຮູບແບບທີ່ປ່ຽນຄວາມສາມາດ ຄວາມຮູ້ແລະສະຕິປັນຍາຂອງສ່ວນບຸກຄົນເປັນຊັບສົມບັດໂດຍຜ່ານການຕອບຄຳຖາມທາງອິນເຕີເນັດ.ວິທີຂອງມັນແມ່ນເອກະຊົນຫລືວິສາຫະກິດປະກາດເອກະສານໂຄງການຢ່ໃນອິນເຕີເນັດ,ສະແດງວ່າຕ້ອງການຜະລິດຕະພັນທີ່ມີຫົວຄິດປະດິດສ້າງແບບໃດ,ພ້ອມທັງປະກາດລາຄາ,ຈາກນັ້ນ, "ວິດຄີ"ທັງຫລາຍທີ່ຢູ່ແຫ່ງຕ່າງໆກໍ່ຈະຜ່ານຈາກການແຂ່ງຂັນປະມູນມາຮັບເອົາໂຄງການ.ໂຄງການຫົ່ຼານີ້,ອັນນ້ອຍສຸດແມ່ນຕັ້ງຊື່ໃຫ້ຜູ້ອື່ນ,ອັນໃຫຍ່ແມ່ນເຖິງຂັ້ນອອກແບບຜະລິດຕະພັນ,ມີຄົບໝົດທຸກຢ່າງ.ລາຍໄດ້ກໍ່ມີຫລາຍສິບຢວນຮອດເປັນໝື່ນຢວນຈົນຮອດແສນຢວນໂດຍອີງຕາມຄວາມຍາກງ່າຍຂອງໂຄງການ.
ນາງເສີນອີທີ່ມີເຮືອນຢູ່ເຂດເຟີງຖາຍນະຄອນຫລວງປັກກິ່ງແມ່ນ "ວິດຄີ"ອາຊີບທາງອິນເຕີເນັດທີ່ມີຊື່ສຽງ.ເມື່ອເຄິ່ງປີກ່ອນ,ນາງຍັງແມ່ນແມ່ເຮືອນຜູ້ໜຶ່ງ.ແຕ່ພາຍໃນເວລາເຄິ່ງປີ,ນາງເສີນອີໄດ້ແຂ່ງຂັນປະມູນ 10 ກວ່າໂຄງການຢູ່ໃນອິນເຕີເນັດ,ໄດ້ລາຍໄດ້ໜຶ່ງໝື່ນກວ່າຢວນ.ນາງເວົ້າວ່າ:"ຕົ້ນຕໍແມ່ນຂ້ອຍອອກແບບ ເຮັດເຄື່ອງໝາຍຂອງວິສາຫະກິດ,ຍັງມີເວັບໄຊແລະກາຕູນອີກ.ເວລາຂ້ອຍຫາກໍ່ເຂົ້າເວັບໄຊວັດຄີ,ລາຍໄດ້ອາດຈະມີແຕ່ສອງສາມພັນຢວນເທົ່ານັ້ນ,ແຕ່ເມື່ອມີລູກຄ້ານັບມື້ນັບຫລາຍ,ລາຍໄດ້ຕໍ່ເດືອນກໍ່ນັບມື້ນັບຫລາຍຂຶ້ນ."
ເມື່ອໄດ້ພັດທະນາມາເປັນເວລາໜຶ່ງປີແລ້ວ,ປະຈຸບັນ,ຢູ່ປະເທດຈີນມີເວັບໄຊວິດຄີປະເພດຕ່າງໆປະມານ 40 ກວ່າແຫ່ງ, ຈຳນວນວິດຄີລື່ນກາຍ 6 ແສນຄົນ,ໃນນັ້ນລວມທັງຊ່າງອອກແບບ ພະນັກງານໂປແກມ ຜູ້ຂຽນແລະຜູ້ວາງແຜນ ນັກສຶກສາຈົນກະທັ້ງມີຄົນພິການ.
ບໍ່ວ່າຈະແມ່ນການຄ້າຂາຍທາງອິນເຕີເນັດຫລືແມ່ນກຸ່ມຄົນວິດຄີ,ຄວາມນິຍົມດຳເນີນທຸລະກິດທາງອິນເຕີເນັດພວມຄ່ອຍໆນິຍົມກັນຢູ່ປະເທດຈີນ,ຊາວເນັດທັງຫລາຍທີ່ດຳເນີນທຸລະກິດທາງອິນເຕີເນັດເຫົ່ຼານີ້ບໍ່ພຽງແຕ່ຕົນເອງໄດ້ມີລາຍໄດ້ເທົ່ານັ້ນ,ແລະກໍ່ໄດ້ສ້າງຊັບສົມບັດໃຫ້ແກ່ສັງຄົມ.ເຊື່ອວ່າ,ຄຽງຄູ່ກັບການເຜີຍແຜ່ອິນເຕີເນັດໄດ້ຢ່າງບໍ່ຢຸດຢັ້ງ,ແລະເຕັກນິກອິນເຕີເນັດສຸກງອມຂຶ້ນເລື້ອຍໆ,ມັນຈະສ້າງຜົນສະທ້ອນຍິ່ງຫລາຍກວ່າເກົ່າຕໍ່ຊີວິດການເປັນຢູ່ຂອງຄົນຈີນ.
ເອົາລະ,ທ່ານຜູ້ຟັງ,ລາຍການວິທະຍາສາດການສຶກສາກັບສາທາລະນະສຸກກໍຂໍສ້ຽງສຸດລົງເທົ່ານີ້.ຂອບໃຈທ່ານທີ່ຮັບຟັງ.ສະບາຍດີ.
|
|
|
