|
ທີ່ນີ້ ວິທະຍຸສາກົນແຫ່ງປະເທດຈີນ,ສະບາຍດີທ່ານຜູ້ຟັງທີ່ໂຄລົບ,ຍິນດີຕ້ອນຮັບທ່ານເຂົ້າສູ່ລາຍການວັດທະນະທຳຈີນ.
ທ່ານຜູ້ຟັງ,ຫຼັງຈາກກ້າວເຂົ້າສູ່ສະຕະວັດທີ 21 ແລ້ວ,ຄຽງຄູ່ກັບຊີວິດສັງຄົມທີ່ຫັນເປັນຫຼາຍຢ່າງຫຼາຍແນວ,ການແຕ່ງວັນນະຄະດີຂອງຈີນກໍມີຄວາມຈະເລີນຮຸ່ງເຮືອງທີ່ມີຫຼາຍຢ່າງຫຼາຍແນວ. ນັກປະພັນທັງຫຼາຍທີ່ເກີດໃນຊຸມປີ 1950—60 ໄດ້ແຕ່ງບົດປະພັນອອກມາໃໝ່ເລື້ອຍໆ,ສ່ວນນັກປະພັນໜຸ່ມທັງຫຼາຍທີ່ເກີດໃນຊຸມປີ 1970—80 ກໍ່ໄດ້ແຕ່ງເລື່ອງທີ່ສ່ອງແສງໃຫ້ເຫັນສັງຄົມຈີນທີ່ພວມປະຕິຮູບດ້ວຍສາຍຕາໃໝ່,ບົດປະພັນຂອງເຂົາເຈົ້າມັກເຂົ້າສູ່ບັນຊີປຶ້ມທີ່ຂາຍດີເລື້ອຍໆ. ຕໍ່ໄປເຊີນຟັງເນື້ອໃນລະອຽດ.
ທ່ານຈ່າງປູ້ໄຕ້ ແມ່ນນັກປະພັນ ປີນີ້ອາຍຸ 55 ປີ,ຫວ່າງມໍ່ໆນີ້,ທ່ານພວມຂຸ້ນຢູ່ນຳການອອກແບບໜ້າປົກໃຫ້ນະວະນີຍາຍຂອງຕົນເອງ. ນະວະນີຍາຍຍາວເລື່ອງ"ເສົາໝາງ"ແປວ່າ"ພຸ່ມຫຍ້າ"ທີ່ແຕ່ງໂດຍທ່ານເອງໃກ້ຈະພິມຈຳໜ່າຍໂດຍສຳນັກງານພິມຈຳໜ່າຍຂອງຂອງນັກປະພັນແລ້ວ. ນະວະນິຍາຍເລື່ອງນີ້ມີຕົວໜັງສືຈີນ 4 ແສນໂຕ,ເອົາການປ່ຽນແປງຂອງສັງຄົມຈີນໃນເກືອບ 30 ປີມານີ້ເປັນເບື້ອງຫຼັງ, ເລົ່າປະສົບການໃນຊີວິດອັນຄົດລ້ຽວຂອງນັກວິທະຍາສາດຜູ່ໜຶ່ງແລະເຈົ້າໜ້າທີ່ທ້ອງຖິ່ນຜູ່ໜຶ່ງ. ນະວະນິຍາຍເລື່ອງນີ້ແມ່ນບົດປະພັນບົດໜຶ່ງທີ່ສະມາຄົມນັກປະພັນຈີນຈະສະໜັບສະໜູນເປັນພິເສດໃນປີນີ້.
ບົດປະພັນທີ່ໄດ້ຮັບການສະໜັບສະໜູນເປັນພິເສດຈາກສະມາຄົມນັກປະພັນຈີນເຊັ່ນດຽວກັນນັ້ນຍັງມີເກືອບຮ້ອຍເລື່ອງ. ໃນບົດປະພັນເຫຼົ່ານີ້ມີທັງ ນະວະນິຍາຍ,ກາບກອນ,ບົດສາລະຄະດີພິເສດ,ທັງມີບົດທິດສະດີວັນນະຄະດີ. ເລີ່ມແຕ່ປີ 2004 ເປັນຕົ້ນມາ,ສະມາຄົມນັກປະພັນຈີນໄດ້ລົງທຶນຮ້ອຍລ້ານຢວນຕໍ່ປີ ເພື່ອສົ່ງເສີມໃຫ້ນັກປະພັນແຕ່ງບົດປະພັນທີ່ດີໆອອກມາ. ທ່ານຈ່າງປູ້ໄຕ້ເຫັນວ່າ,ການປະຕິຮູບແລະການໄຂປະຕູສູ່ພາຍນອກໄດ້ນຳເອົາການປ່ຽນແປງອັນມະຫາສານມາໃຫ້ສັງຄົມຈີນ. ແລະການປ່ຽນແປງເຫຼົ່ານີ້ກໍໄດ້ນຳເອົາຜົນສະທ້ອນມາໃຫ້ຊີວິດແລະຈິດໃຈຂອງສ່ວນບຸກຄົນ, ທັງໝົດເຫຼົ່ານີ້ລ້ວນແຕ່ໄດ້ສ່ອງແສງຢູ່ໃນບົດວັນນະຄະນະດີ. ທ່ານເວົ້າວ່າ:
"ຂ້າພະເຈົ້າທີ່ເປັນນັກປະພັນແລະນັກກະວີ,ເມື່ອຫວນຄືນ 5 ປີທີ່ຜ່ານມານີ້ຮູ້ສຶກວ່າ,ນັກປະພັນທັງຫຼາຍຂອງຈີນພວມສ້າງສາສັງຄົມທີ່ກົມກຽວກັນ,ໃນດ້ານສົ່ງເສີມຈິດໃຈປະຊາຊາດຈີນນັ້ນ, ພວກເຂົາເຈົ້າໄດ້ແຕ່ງບົດປະພັນທີ່ດີເລີດອອກມາບໍ່ໜ້ອຍ,ການປະພັນໄດ້ມີຫຼາຍຢ່າງຫຼາຍແນວແລະຈະເລີນຮຸ່ງເຮືອງຂຶ້ນ,ຕ່າງປະກອບຄຳຄິດຄຳເຫັນຂອງໃຜລາວ,ສະແຫວງຫາບຸກຄະລິກລັກສະນະຂອງຕົນເອງ,ຄວນເວົ້າວ່າ,ນັກປະພັນທັງຫຼາຍໄດ້ສືບທອດນ້ຳໃຈຮັບຜິດຊອບຕໍ່ສັງຄົມແລະສະຕິຕໍ່ພາລະກຳທາງປະຫວັດສາດທີ່ເຄັ່ງຂຶມ,ບົດປະພັນສ່ວນຫຼາຍມີລັກສະນະຂອງຍຸກສະໄໝແລະລັກສະນະປະຊາຊົນ."
ບົດວັນນະຄະດີທີ່ສະມາຄົມນັກປະພັນຈີນສະໜັບສະໜູນເປັນພິເສດພຽງແຕ່ແມ່ນສ່ວນໜ້ອຍຂອງບົດວັນນະຄະດີທີ່ຈີນພິມຈຳໜ່າຍຢ່າງຫຼວງຫຼາຍໃນແຕ່ລະປີທໍ່ນັ້ນ. ເວົ້າສະເພາະແຕ່ນະວະນິຍາຍເລື່ອງຍາວ,ໃນເກືອບ 4 ປີມານີ້,ນະວະນິຍາຍເລື່ອງຍາວທີ່ຈີນພິມຈຳໜ່າຍໃນແຕ່ລະປີມີປະມານ 800 ເລື່ອງ. ໃນຜູ້ແຕ່ງນະວະນິຍາຍ, ມີນັກປະພັນມືອາຊີບທີ່ຂຶ້ນຊື່ລືນາມມາຫຼາຍປີແລ້ວ,ທັງມີນັກປະພັນສະໝັກຫຼິ້ນຂອງທຸກໆຂະແໜງການ. ເນື້ອຫາຂອງນະວະນິຍາຍກໍມີຫຼາຍຢ່າງຫຼາຍແນວ. ຕົວຢ່າງມີເລື່ອງ"ຈ່າງຈູ່ເຈີ້ງ"ທີ່ມີເນື້ອຫາປະຫວັດສາດ, ເລື່ອງ"ລ້ຽງຈ້ຽນ"ແປວ່າຖອດດາບທີ່ມີເນື້ອຫາທາງການທະຫານ,ມີເລື່ອງ"ຮົງເມີຍ"ແປວ່າຖ່ານຫີນແດງທີ່ບັນລະຍາຍສະພາບດຳລົງຊີວິດຂອງກຳມະກອນບໍ່ຖ່ານຫີນ,ມີເລື່ອງ"ຊິນຊ່ຽງ"ທີ່ບັນລະຍາຍການປ່ຽນແປງຂອງຊີວິດຊົນນະບົດ,ຍັງມີເລື່ອງ"ທາງລົດໄຟໃຫຍ່ຊິງໄຫຕິເບດ"ທີ່ບັນທຶກເລື່ອງຈິງ. ທ່ານເປຊຽວ ນັກວິຈານວັນນະຄະດີທີ່ມີຊື່ສຽງເຫັນວ່າ,ສະພາບສັງຄົມຂອງຈີນໃນປັດຈຸບັນແມ່ນເໝາະທີ່ສຸດໃຫ້ນັກປະພັນທັງຫຼາຍເສີມຂະຫຍາຍຄວາມປີຊາສາມາດຂອງຕົນ. ທ່ານເວົ້າວ່າ:
"ແຕ່ກ້າວເຂົ້າສູ່ສະຕະວັດໃໝ່ມານີ້,ການປະພັນວັນນະຄະດີຂອງປະເທດພວກເຮົາມີຮັບການພັດທະນາຢ່າງຫຼວງຫຼາຍ,ສາມາດເວົ້າໄດ້ວ່າມີບົດປະພັນທີ່ດີເລີດອອກມາເລື້ອຍໆ,ນັກປະພັນອາວຸໂສ,ໄວກາງແລະໄວໜຸ່ມຫຼາຍໆຄົນໄດ້ຮັກສາຄວາມກະຕືລືລົ້ນທີ່ຟົດຟື້ນໃນການແຕ່ງເລື່ອງ,ນັກປະພັນຮຸ່ນໃໝ່ກໍຄ່ອຍໆສຸກງອມ,ສະພາບແວດລ້ອມການປະພັນດີກວ່າຍາມໃດໝົດ,ບົດປະພັນກໍຍິ່ງໃກ້ຊິດກັບຊີວິດຕົວຈິງ,ໄດ້ເອົາໃຈໃສ່ນຳສະພາບຄວາມເປັນຈິງໃນສັງຄົມທີ່ພວມປ່ຽນແປງ,ເອົາໃຈໃສ່ນຳສະພາບການດຳລົງຊີວິດຂອງສາມັນຊົນ,ເອົາໃຈໃສ່ນຳການເຕີບໃຫຍ່ແລະຄວາມທຸກສຸກຄວາມຮຽກຮ້ອງການຂອງເພດຍິງ. ໂດຍສະເພາະແມ່ນວັນນະຄະດີອິນເຕີເນັດຈະເລີນຂຶ້ນໄດ້,ເຮັດໃຫ້ວັນນະຄະດີເຂົ້າໃກ້ກັບມະຫາຊົນໃນສັງຄົມຕື່ມອີກ,ຜູ້ແຕ່ງທຳມະດາກໍສາມາດເຂົ້າຮ່ວມການປະພັນແລະການອ່ານວັນນະຄະດີດ້ວຍຮູບການອິນເຕີເນັດ."
ນັກວິຈານຜູ້ນີ້ເຫັນວ່າ,ເສດຖະກິດຕະຫຼາດເຂົ້າກ່ຽວພັນແລະການເຜີຍແຜ່ຂອງອິນເຕີເນັດໄດ້ເຮັດໃຫ້ການແຕ່ງບົດວັນນະຄະນດີຂອງຈີນຈະເລີນຮຸ່ງເຮືອງກວ່າຍາມໃດໝົດ,ແລະປະກົດມີຫຼາຍຢ່າງຫຼາຍແນວ. ເນື້ອຫາແລະວິທີປະພັນທີ່ຄົນທົ່ວໄປບໍ່ເຫັນດີຫຼືຮັບເອົາບໍ່ໄດ້ໃນ 10 ປີກ່ອນນັ້ນ ດຽວນີ້ກໍມີຄົນຂຽນຫຼາຍທີ່ສຸດ.
ໃນບໍ່ເທົ່າໃດປີມານີ້,ບົດປະພັນວັນນະຄະດີທີ່ມີເນື້ອຫາກ່ຽວກັບຊີວິດການເປັນຢູ່ຂອງເຂດຊົນເຜົ່າສ່ວນໜ້ອຍຂອງຈີນໄດ້ມີຜົນສະທ້ອນຫຼາຍຂຶ້ນເລື້ອຍໆໃນໝູ່ຜູ້ອ່ານ,ເຊິ່ງໄດ້ສະແດງໃຫ້ເຫັນເນື້ອໃນວັດທະນະທຳອັນເລິກເຊິ່ງແລະລົດນິຍົມຊີວິດການເປັນຢູ່ທີ່ອຸດົມສົມບູນຂອງຈີນ,ຕົວຢ່າງຄືເລື່ອງ"ໂຂ່ງຊ່ານ"ແປວ່າ"ພູໂຂ່ງທີ່ຖືວິຖີຊີວິດການເປັນຢູ່ຂອງຊົນນະບົດເຜົ່າຕິເບດເປັນເນື້ອຫາທີ່ແຕ່ງໂດຍນັກປະພັນອ່າໄລ,ເລື່ອງ"ລາງທູເທີງ"ແປວ່າ"ສັນຍາລັກຂອງກວາມເຊື່ອຖືໝາໄນໃນສະໄໝບູຮານ"ທີ່ຖືວັດທະນະທຳເຜົ່າມົງໂກນເປັນເບື້ອງຫຼັງ, ແຕ່ງໂດຍທ່ານຈ່ຽງຢົງແລະເລື່ອງອື່ນໆລ້ວນແຕ່ໄດ້ຮັບຜົນສຳເລັດອັນມະຫາສານ.
ນອກຈາກນະວະນິຍາຍແລ້ວ,ການປະພັນກາບກອນຍຸກປັດຈຸບັນຂອງຈີນກໍຄຶກຄັກຫຼາຍ,ໄດ້ປະກົດມີນັກກະວີຜູ້ດີເລີດຢ່າງຫຼວງຫຼາຍ. ເວັບໄຊ້ກາບກອນສະເພາະກໍແຮ່ງຫຼາຍ. ໃນດ້ານແຕ່ງບົດລະຄອນ,ການແຕ່ງບົດຮູບເງົາແລະບົດໂທລະພາບກໍຟົດຟື້ນຂຶ້ນຫຼາຍຍ້ອນຄວາມຕ້ອງທີ່ນັບມື້ນັບເພີ່ມຂຶ້ນຂອງສະຖານີໂທລະພາບພັນກວ່າແຫ່ງໃນທົ່ວປະເທດ.
ເຖິງວ່າມີນັກປະພັນແລະບົດປະພັນຫຼວງຫຼາຍ,ແຕ່ນັກວິຈານຈຳນວນໜຶ່ງກໍເຫັນວ່າ,ຢູ່ເທິງເວທີວັນນະຄະນດີຈີນຍັງມີບັນຫາຈຳນວນໜຶ່ງ,ເຊັ່ນບົດປະພັນທີ່ປະກາດແລະພິມຈຳໜ່າຍໃນແຕ່ລະປີມີຫຼວງຫຼາຍ,ແຕ່ບົດປະພັນທີ່ຖືກໃຈຄົນເປັນພິເສດບໍ່ຫຼາຍປານໃດ. ໃນເວລາໃຫ້ສຳພາດຕໍ່ນັກຂ່າວ,ທ່ານເປຊຽວ ນັກວິຈານວັນນະຄະດີເວົ້າວ່າ:
"ຂ້າພະເຈົ້າເຫັນວ່າ,ວັນນະຄະດິຍຸກປັດຈຸບັນຍັງຕ້ອງພະຍາຍາມໃນດ້ານຄຸນນະພາບດ້ານຈິດໃຈ,ສ່ອງແສງການປ່ຽນແປງຂອງຍຸກສະໄໝໃຫ້ຫຼາຍ,ເອົາໃຈໃສ່ສ່ອງແສງອາລະຍະທຳແລະຊີວິດສັງຄົມຢູ່ສະເພາະໜ້າ,ແລະອອກແຮງລົງເລິກຄົ້ນຄວ້າແລະສະແດງຈິດໃຈຂອງຊາດແລະຂອງມະນຸດ."
ນັກວິຈານຜູ້ນີ້ເຫັນວ່າ,ກຳລັງຂອງເສດຖະກິດຕະຫຼາດເຮັດໃຫ້ການປະພັນວັນນະຄະດີຂອງຈີນໃນຍຸກປັດຈຸບັນມີການເຫັນແກ່ຜົນປະໂຫຍດໃນບາງດ້ານ. ເວທີວັນນະຄະດີຂອງຈີນຍັງມີຈິດໃຈຟ້າວຟັ່ງຮີບຮ້ອນຢ່າງເດັ່ນຊັດ,ນັກປະພັນບາງຄົນແຕ່ງບົດປະພັນທີ່ບໍ່ມີຄຸນະພາບຫຼືລົດນິຍົມຕ່ຳຊ້າ,ອັນໄດ້ທຳລາຍສິລະປະຂອງວັນນະຄະດີ. ແຕ່ກໍປະຕິເສດບໍ່ໄດ້ວ່າ,ການປະຕິຮູບແລະໄຂປະຕູສູ່ພາຍນອກໄດ້ເພີ່ມພະລັງຊີວິດທີ່ບໍ່ເຄີຍມີມາກ່ອນເຂົ້າໃນການແຕ່ງວັນນະຄະດີ,ການປ່ຽນແປງອັນໃຫຍ່ຫຼວງໃນດ້ານຕ່າງໆຂອງຊີວິດສັງຄົມໄດ້ສ່ອງແສງຢູ່ໃນບົດປະພັນວັນນະຄະດີ,ເຊິ່ງສະແດງໃຫ້ເຫັນຄວາມຫຼາກຫຼາຍຂອງການປະພັນແລະການຂະຫຍາຍຕົວຂອງວັນນະຄະດີ.
ທ່ານຜູ້ຟັງທີ່ໂຄລົບ,ທີ່ຟັງມານັ້ນແມ່ນບົດເລື່ອງ: ການປະພັນວັນນະຄະດີຂອງຈີນນັບມື້ນັບອຸດົມສົມບູນຂຶ້ນ,ລາຍການວັດທະນະທຳຈີນພາກນີ້ກໍຂໍຈົບລົງພຽງທໍ່ນີ້,ຂອບໃຈທ່ານທີ່ຮັບຟັງ,ສະບາຍດີ.
|
