|
|
 |
| (GMT+08:00)
2007-01-03 20:44:03
|
 |
|
ມວນຊົນທຸກຍາກຂອງຈີນສະຫຼອງປີໃໝ່ພາຍໃຕ້ຄວາມເອົາໃຈໃສ່ຂອງລັດຖະບານ
cri
ຕາມຂ່າວສານຊິນຮວາ,ໃນໄລຍະບຸນປີໃໝ່ສາກົນ,ຜູ່ນຳຈີນແລະຜູ່ຮັບຜິດຊອບຂອງອົງການປົກຄອງທ້ອງຖິ່ນຕ່າງໆຂອງຈີນໄດ້ພາກັນໄປຢາມເຂດທຸກຍາກ,ຢື້ຢາມຖາມຂ່າວມວນຊົນທຸກຍາກຂອງຊົນນະບົດແລະຕົວເມືອງ,ມວນຊົນທຸກຍາກຂອງຈີນໄດ້ສະຫຼອງປີໃໝ່ພາຍໃຕ້ຄວາມເອົາໃຈໃສ່ຂອງລັດຖະບານ.
ສະຫະພັນກຳມະບານແຫ່ງຊາດຈີນໄດ້ເບີກເງິນ50ລ້ານຢວນເພື່ອໃຊ້ໃນການເຄື່ອນໄຫວສົ່ງຄວາມອົບອຸ່ນໃນໄລຍະປີໃໝ່ສາກົນແລະບຸນກຸດຈີນ,ແລະແຕ່ງຕັ້ງຄະນະໄປຢື້ຢາມຖາມຂ່າວຢູ່ແຫ່ງຕ່າງໆໃນທົ່ວປະເທດຈີນ.ຢູ່ແຂວງຈ່ຽງຊູ ພາກຕາເວັນອອກຂອງຈີນ,ກຳມະບານທຸກຂັ້ນໄດ້ຫ້າງຫາເງິນທຶນ70ລ້ານກວ່າຢວນ,ເຈາະຈົງຊ່ວຍເຫຼືອຄອບຄົວຂອງກຳມະກອນທີ່ທຸກຍາກ,ຢູ່ເຂດຕິເບດທີ່ຢູ່ເທິງພູພຽງຫິມະ,ການເຄື່ອນໄຫວສົ່ງຄວາມອົບອຸ່ນໃຫ້ແກ່ຜູ່ທຸກຍາກໃນໄລຍະບຸນປີໃໝ່ສາກົນ ບຸນກຸດຈີນແລະປີໃໝ່ຈັນທະຄະຕິຕິເບດພວມດຳເນີນຢູ່.ຢູ່ເຂດຊິນຈ່ຽງ ທາງພາກຕາເວັນຕົກສຽງເໜືອງຂອງຈີນ,ກ່ອນບຸນກູບານແລະບຸນປີໃໝ່ສາກົນ,ກຳມະບານເຂດປົກຄອງຕົນເອງເຜົ່າເວີຍອູເອີຊິນຈ່ຽງໄດ້ແຕ່ງຄະນະໄປຢ້ຽມຢາມເມືອງຄາສື ເມືອງອາເລີທ້າຍເປັນຕົ້ນ,ສົ່ງຄວາມຢື້ຢາມຖາມຂ່າວຂອງອົງການປົກຄອງໄປໃຫ້ມວນຊົນທ້ອງຖິ່ນດັ່ງກ່າວ.
ການເຄື່ອນໄຫວສົ່ງຄວາມອົບອຸ່ນໃຫ້ຜູ່ທຸກຍາກໃນໄລຍະປີໃໝ່ສາກົນແລະບຸນກຸດຈີນຂອງລັດຖະບານຈີນໃນປີ2007ມີຈຸດພິເສດທີ່ຕ່າງກັບທຸກປີທີ່ຜ່ານມາ,ນັ້ນກໍຄືຍິ່ງເນັ້ນໜັກປະສິດທິຜົນຕົວຈິງແລະດຳເນີນໃນໄລຍະຍາວນານ.ໃນການເຄື່ອນໄຫວສົ່ງຄວາມອົບອຸ່ນໃຫ້ຜູ່ທຸກຍາກປີນີ້,ສະຫະພັນກຳມະບານແຫ່ງຊາດຈີນໄດ້ເພີ່ມຄວາມແຮງໃນການອົບຮົມກຳມະກອນຜູ່ຕົກງານທີ່ທຸກຍາກ,ຮຽກຮ້ອງໃຫ້ກຳມະບານທ້ອງຖິ່ນຕ່າງໆຈັດເອົາ20%ຂອງເງິນທຶນສົ່ງຄວາມອົບອຸ່ນນັ້ນໃຊ້ໃນການອົບຮົມກຳມະກອນຜູ່ຕົກງານທີ່ທຸກຍາກ,ຊ່ວຍພວກເຂົາເຈົ້າພົ້ນຈາກຄວາມທຸກຍາກຢ່າງສິ້ນເຊີງ.
|
|
|
