|
ອີຣານຮຽກຮ້ອງອີຣັກກັ້ນກາງບໍ່ໃຫ້ອາເມລິກາແຊກແຊງການພົວພັນລະຫວ່າງອີຣານກັບອີຣັກ
cri
Author: MO
ຕາມຂ່າວCRI: ວັນທີ 12 ມັງກອນ, ກະຊວງການຕ່າງປະເທດອີຣານກ່າວວ່າ, ລັດຖະບານອີຣັກບໍ່ຄວນອະນຸຍາດໃຫ້ອາເມລິກາສືບຕໍ່ແຊກແຊງການພົວພັນລະຫວ່າງອີຣານກັບອີຣັກ.
ກະຊວງການຕ່າງປະເທດອີຣານໄດ້ອອກຖະແຫຼງການສະບັບໜຶ່ງຂຽນວ່າ, ມື້ດຽວກັນ, ເຈົ້າໜ້າທີ່ຜູ້ໜຶ່ງຂອງກະຊວງການຕ່າງປະເທດອີຣານທີ່ຮັບຜິດຊອບວຽກງານອ່າວເປີເຊຍໄດ້ພົບປະເອກອັກຄະລັດຖະທູດອີຣັກປະຈຳອີຣານ, ໄດ້ປະທ້ວງຢ່າງຮຸນແຮງທີ່ສຸດຕໍ່ອາເມລິກາຈັບເຈົ້າໜ້າທີ່ການທູດຂອງອີຣານປະຈຳອີຣັກ, ກ່າວວ່າ, ຫວັງໃຫ້ເຈົ້າໜ້າທີ່ອີຣັກໃຊ້ມາດຕະການປ່ອຍເຈົ້າໜ້າທີ່ການທູດທີ່ຖືກກັກຕົວເຫຼົ່ານີ້ຢ່າງວ່ອງໄວ, ແລະກ່າວປະນາມທະຫານອາເມລິກາປະຈຳອີຣັກ.
ວັນທີ 12 ມັງກອນ, ທ່ານແມັກໂຄມາກ ໂຄສົກກະຊວງການຕ່າງປະເທດອາເມລິກາກ່າວວ່າ, ຊາວອີຣານ 5 ຄົນທີ່ທະຫານອາເມລິກາຈັບໃນວັນທີ 11 ມັງກອນນັ້ນບໍ່ມີຖານະການທູດ, ຕຶກທີ່ທະຫານອາເມລິກາປະຈຳອີຣັກຫຼອນໂຈມຕີນັ້ນກໍບໍ່ແມ່ນສະຖານກົງສູນອີຣານ, ພຽງແຕ່ແມ່ນຕຶກຫຼັງໜຶ່ງທີ່ຊາວອີຣານໃຊ້ຢູ່ບົນດິນແດນອີຣັກເທົ່ານັ້ນ.
ມື້ດຽວກັນ, ທ່ານສະໂນ ໂຄສົກທຳນຽບຂາວອາເມລິກາອອກຖະແຫຼງການກ່າວວ່າ, ອາເມລິກາບໍ່ມີແຜນການກໍ່ສົງຄາມຕໍ່ອີຣານແລະຊີເຣຍ.
ຕອນຮຸ່ງເຊົ້າວັນທີ 11 ມັງກອນ, ທະຫານອາເມລິກາປະຈຳອີຣັກໄດ້ຫຼອນໂຈມຕີສະຖານກົງສູນອີຣານທີ່ຕັ້ງຢູ່ອາບິນ ເມືອງພາກເໜືອອີຣັກ, ໄດ້ຈັບຕົວ 5 ຄົນໃນສະຖານກົງສູນ, ແລະຮິບເອົາຄອມພິວເຕີແລະເອກະສານຈຳນວນໜຶ່ງ.
|
|
