|
ກອງປະຊຸມສຸດຍອດອາຊີຕາເວັນອອກຄັ້ງທີ 2 ໄຂຂຶ້ນແລ້ວ
cri
Author: min
ຕາມຂ່າວ CRI: ວັນທີ 15 ມັງກອນນີ້, ກອງປະຊຸມສຸດຍອດອາຊີຕາເວັນອອກຄັ້ງທີ 2 ໄດ້ໄຂຂຶ້ນຢູ່ເຊບູຂອງຟິລິບປິນ, ຜູ້ນຳ 10 ປະເທດອາຊຽນແລະຈີນ, ຍີ່ປຸ່ນ, ສ. ເກົາຫຼີ, ໂອສຕຼາລີ, ອິນເດຍແລະນູແວັນເຊລັງໄດ້ເຂົ້າຮ່ວມກອງປະຊຸມ.
ຜູ້ນຳປະເທດຕ່າງໆທີ່ຮ່ວມໄດ້ຫາລືກັນກ່ຽວກັບບັນຫາຄວາມປອດໄພດ້ານພະລັງງານໃນພາກພື້ນແລະບັນຫານິວເຄຼຍແຫຼມເກົາຫຼີ. ທ່ານເວີ່ນເຈ່ຍປາວ ນາຍົກລັດຖະມົນຕີຈີນທີ່ຮ່ວມປະຊຸມຈະບັນລະຍາຍເຈດຈຳນົງຂອງຝ່າຍຈີນກ່ຽວກັບການເພີ່ມທະວີການຮ່ວມມືໃນຂົງເຂດຕ່າງໆ, ເຊັ່ນ ຄວາມປອດໄພດ້ານພະລັງງານ, ການເງິນ, ການສຶກສາ, ໄຂ້ຫວັດສັດປີກແລະການຫຼຸດຜ່ອນໄພພິບັດທາງທຳມະຊາດເປັນຕົ້ນ. ສຸດທ້າຍ, ກອງປະຊຸມຈະລົງນາມໃນ "ຖະແຫຼງການເຊບູກ່ຽວກັບຄວາມປອດໄພດ້ານພະລັງງານຂອງອາຊີຕາເວັນອອກ".
ວັນທີ 15 ມັງກອນນີ້, ກ່ອນຈະເຂົ້າຮ່ວມກອງປະຊຸມສຸດຍອດອາຊີຕາເວັນອອກຄັ້ງທີ 2 , ໃນເວລາ, ທ່ານເວີ່ນເຈ່ຍປາວ ນາຍົກລັດຖະມົນຕີຈີນ, ທ່ານໃຫ້ສຳພາດຕໍ່ນັກຂ່າວວ່າ, ການຮ່ວມມືອາຊີຕາເວັນອອກຄວນຖື "ກອງປະຊຸມອາຊຽນກັບ ປະເທດຄູ່ເຈລະຈາ" ເປັນພື້ນຖານ, ຖື "ກອງປະຊຸມອາຊຽນ ບວກ 3" ເປັນກົນໄກຕົ້ນຕໍ, ຖືກອງປະຊຸມສຸດຍອດອາຊີຕາເວັນອອກເປັນເນື້ອໃນເພີ່ມຕື່ມທີ່ສຳຄັນ, ເສີມຂະຫຍາຍບົດບາດນຳທາງຂອງປະເທດອາຊຽນຢ່າງເຕັມສ່ວນ, ພະຍາຍາມເພື່ອບັນລຸເປົ້າໝາຍສ້າງປະຊາຄົມອາຊີຕາເວັນອອກ.
ທ່ານເວີ່ນເຈ່ຍປາວກ່າວອີກວ່າ, ມາຮອດປະຈຸບັນ, ການຮ່ວມມືຂອງອາຊີຕາເວັນອອກແມ່ນຖືການຮ່ວມມືເສດຖະກິດການຄ້າເປັນຫຼັກ, ແຕ່ໃນຫຼາຍປີມານີ້, ໄດ້ຂະຫຍາຍໄປຮອດຂົງເຂດວັດທະນະທຳແລະຄວາມປອດໄພແລ້ວ. ການຮ່ວມມືຂອງອາຊີຕາເວັນອອກແມ່ນມີເນື້ອໃນຫຼາຍດ້ານ, ແບບເປີດກວ້າງ, ແລະບໍ່ຮັດແຄບຕໍ່ປະເທດອື່ນ, ການຮ່ວມມືຂອງອາຊີຕາເວັນອອກກໍ່ສາມາດປະສານສົມທົບກັບການຮ່ວມມືກັບປະເທດອື່ນໆໃນໂລກ.
|
|
