|
ທ່ານເວີ່ນເຈ່ຍປາວກ່າວວ່າ, ຈະແກ້ໄຂບັນຫາພະລັງງານໃຫ້ເໝາະສົມຕ້ອງສ້າງທັດສະນະຄວາມປອດໄພດ້ານພະລັງງານໃໝ່
cri
Author: m
ຕາມຂ່າວ CRI: ວັນທີ 15 ມັງກອນນີ້, ຢູ່ເມືອງເຊບູຂອງຟິລິບປິນ, ທ່ານເວີ່ນເຈ່ຍປາວ ນາຍົກລັດຖະມົນຕີຈີນກ່າວວ່າ, ຈະແກ້ໄຂບັນຫາພະລັງງານໃຫ້ດີກໍຕ້ອງສ້າງທັດສະນະຄວາມປອດໄພດ້ານພະລັງງານໃໝ່ແລະປະຕິບັດການຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ, ພັດທະນາຫຼາຍດ້ານ, ແລະພ້ອມກັນຮັບປະກັນ.
ໃນເວລາກ່າວຄຳປາໄສໃນກອງປະຊຸມສຸດຍອດອາຊີຕາເວັນອອກຄັ້ງທີ 2 , ທ່ານເວີ່ນເຈ່ຍປາວກ່າວວ່າ, ໃນຂົງເຂດຄວາມປອດໄພດ້ານພະລັງງານ, ຕ້ອງເພີ່ມທະວີການສົນທະນາແລະການປະສານງານກັນດ້ານນະໂຍບາຍລະຫວ່າງປະເທດບໍລິໂພກນ້ຳມັນເຊື້ອໄຟແລະລະຫວ່າງປະເທດບໍລິໂພກກັບປະເທດຜະລິດນ້ຳມັນເຊື້ອໄຟ, ພ້ອມກັນຮັກສາຄວາມໝັ້ນທ່ຽງຂອງຕະຫຼາດພະລັງງານພາກພື້ນຕົນ. ຍົກປະສິດທິພາບພະລັງງານໃຫ້ສູງຂຶ້ນແລະປະຢັດພະລັງງານ, ເພີ່ມທະວີການຄົ້ນຄວ້າແລະເຜີຍແຜ່ພະລັງງານສະອາດ, ພະລັງງານທົດແທນ, ແລະເຕັກນິກພະລັງງານໃໝ່, ສ້າງລະບົບສະໜອງພະລັງງານໃນອະນາຄົດຂອງພາກພື້ນທີ່ສະອາດ, ປອດໄພ, ລາຄາຖືກແລະໝັ້ນຄົງ. ຕ້ອງຜ່ານການຮ່ວມມືສາກົນລະຫວ່າງສອງຝ່າຍແລະຫຼາຍຝ່າຍ, ພ້ອມກັນຮັກສາຄວາມປອດໄພທາງການຂົນສົ່ງພະລັງງານ.
ທ່ານເວີ່ນເຈ່ຍປາວກ່າວອີກວ່າ, ຈີນເອົາໃຈໃສ່ຄວາມປອດໄພດ້ານພະລັງງານແລະການຮ່ວມມືດ້ານພະລັງງານໃນລະດັບສູງ, ຍິນດີຕັ້ງໜ້າດຳເນີນການຮ່ວມມືກັບຕ່າງປະເທດເພື່ອພ້ອມກັນຮັກສາຄວາມໝັ້ນທ່ຽງຂອງຕະຫຼາດພະ ລັງງານ.
|
|
