|
ນັກເສດຖະສາດກ່າວວ່າ, ສະພາບເຕີບໂຕຂອງເສດຖະກິດຈີນມີການປ່ຽນແປງໃໝ່
cri
Author: m
ຕາມຂ່າວໜັງສືພິມເຢິນມິນຢື້ປ້າວສະບັບວັນທີ 9 ກຸມພານີ້: ຫວ່າງມໍ່ໆນີ້, ນັກເສດຖະສາດປັກກິ່ງກ່າວວ່າ, ໃນປີທີ່ຜ່ານໄປ, ສະພາບເຕີບໂຕຂອງເສດຖະກິດຈີນໄດ້ມີການປ່ຽນແປງໃໝ່, ເຮັດໃຫ້ຈີນມີຄວາມໝັ້ນໃຈຮັກສາໃຫ້ເສດຖະກິດເຕີບໂຕຢ່າງວ່ອງໄວໃນໄລຍະຍາວນານ.
ບັນດານັກເສດຖະສາດຊີ້ອອກວ່າ, ເສດຖະກິດຈີນໄດ້ຮັກສາລະດັບການເຕີບໂຕໄວກວ່າ 10% ເປັນເວລາ 4 ປີແລ້ວ, ພ້ອມກັນນັ້ນ, ລາຄາສິນຄ້າກໍໝັ້ນທ່ຽງ, ລາຍຮັບທາງການເງິນ, ຜົນກຳໄລຂອງວິສາຫະກິດກໍເພີ່ມຂຶ້ນຢ່າງຫຼວງຫຼາຍ, ການຄ້າຂາເຂົ້າຂາອອກເພີ່ມຂຶ້ນຢ່າງວ່ອງໄວ, ຄັງສຳຮອງເງິນຕາຕ່າງປະເທດລື່ນກາຍ 1000 ຕື້ໂດລາ. ນີ້ແມ່ນໄລຍະທີ່ເສດຖະກິດພັດທະນາດີທີ່ສຸດຫຼັງຈາກໄດ້ເປີດປະຕູສູ່ພາຍນອກມານີ້.
ນັກເສດຖະສາດວິເຄາະວ່າ, ການປ່ຽນແປງຂອງສະພາບການເຕີບໂຕຂອງເສດຖະກິດໃນປີທີ່ຜ່ານມາໄດ້ສະແດງໃຫ້ເຫັນວ່າ, ຈຸດໜັກຂອງເສດຖະກິດທີ່ເຕີບໂຕໄດ້ຍ້າຍໄປທາງພາກເໜືອ, ອຸດສາຫະກຳໜັກໄດ້ກາຍເປັນກຳລັງຊັກນຳຕົ້ນຕໍແຫ່ງການເຕີບໂຕຂອງເສດຖະກິດ, ພະລັງແຮງຂອງວິສາຫະກິດອຸດສາຫະກຳລະບອບຫຸ້ນສ່ວນໄດ້ເພີ່ມຂຶ້ນຢ່າງແຂງແຮງ.
ພ້ອມກັນນັ້ນ, ການພັດທະນາເສດຖະກິດສັງຄົມຂອງຈີນກໍ່ໄດ້ປະເຊີນ ກັບບັນຫາພົ້ນເດັ່ນຕ່າງໆ, ເຊັ່ນ: ເຮັດແນວໃດເພື່ອແກ້ໄຂການປະກອບອາຊີບໃຫ້ເໝາະສົມ, ການແຈກຢາຍ, ການຮັບປະກັນສັງຄົມ, ການສຶກສາ, ການປິ່ນປົວພະຍາດແລະສາທາລະນະສຸກເປັນຕົ້ນ. ນັກເສດຖະສາດກ່າວວ່າ, ວົງການເສດຖະສາດຈະເພີ່ມທະວີການຄົ້ນຄວ້າໃນດ້ານຕ່າງໆດັ່ງກ່າວ, ເພື່ອສ້າງສັງຄົມສັງຄົມນິຍົມທີ່ກົມກຽວກັນ.
|
|
