|
ຕາມຂ່າວCRI:ວັນທີ3ມີນານີ້,ກອງປະຊຸມປະຈຳປີຂອງຄະນະກຳມະການແຫ່ງຊາດສະພາປຶກສາການເມືອງປະຊາຊົນຈີນໄດ້ໄຂຂຶ້ນຢູ່ທີ່ປັກກິ່ງ.
ຕອນບ່າຍວັນທີ3ມີນາ,ກຳມະການ2100ກວ່າທ່ານຂອງສະພາປຶກສາການເມືອງປະຊາຊົນແຫ່ງຊາດຈີນໄດ້ເຕົ້າໂຮມກັນຢູ່ຫໍສະພາປະຊາຊົນປັກກິ່ງ,ເຂົ້າຮ່ວມກອງປະຊຸມຄັ້ງທີ5ຂອງຄະນະກຳມະການແຫ່ງຊາດສະໄໝທີ10ຂອງສະພາປຶກສາການເມືອງປະຊາຊົນຈີນ,ນີ້ແມ່ນກອງປະຊຸມຄັ້ງສຸດທ້າຍຂອງຄະນະກຳມະການແຫ່ງຊາດສະພາປຶກສາການເມືອງປະຊາຊົນຈີນສະໄໝທີ10.ໃນເວລາສາມໂມງຕົງຕອນບ່າຍມື້ນີ້,ກອງປະຊຸມຄັ້ງນີ້ໄດ້ໄຂຂຶ້ນຢ່າງຄຶກຄື້ນ.
ໃນພິທີໄຂກອງປະຊຸມ,ທ່ານເຈຍຊີ້ງລີນ ປະທານສະພາປຶກສາການເມືອງແຫ່ງຊາດຈີນໄດ້ກ່າວບົດລາຍງານວຽກງານຕໍ່ກອງປະຊຸມ.ກ່ອນອື່ນ,ທ່ານໄດ້ຫວນຄືນໝາກຜົນວຽກງານຂອງສະພາປຶກສາການເມືອງປະຊາຊົນຈີນໃນປີ2006.ທ່ານເວົ້າວ່າ:"ປີ2006ແມ່ນປີທີ່ໄດ້ຮັບໝາກຜົນຢ່າງອຸດົມສົມບູນໃນການປະຕິຮູບ ໄຂປະຕູສູ່ພາຍນອກແລະການສ້າງສາສັງຄົມນິຍົມທັນສະໄໝຂອງຈີນ,ແລະກໍແມ່ນປີໜຶ່ງທີ່ວຽກງານສະພາປຶກສາການເມືອງປະຊາຊົນໄດ້ພັດທະນາຢ່າງຟົດຟື້ນ.ຄະນະກຳມະການແຫ່ງຊາດແລະຄະນະປະຈຳສະພາປຶກສາການເມືອງປະຊາຊົນແຫ່ງຊາດຈີນໄດ້ປະຕິບັດພາລະບົດບາດທີ່ປຶກສາຫາລືທາງການເມືອງ ຕິດຕາມກວດກາແບບປະຊາທິປະໄຕ ເຂົ້າຮ່ວມແລະປຶກສາຫາລືວຽກງານການປົກ ຄອງຢ່າງຕິດແທດຕົວຈິງ,ພະຍາຍາມເພີ່ມທະວີການສ້າງສາຕົນເອງ,ວຽກງານທຸກລາຍລ້ວນແຕ່ໄດ້ມີການຄືບໜ້າໃໝ່."
ແຕ່ປີກາຍນີ້ເປັນຕົ້ນມາ,ຍັດຕິທີ່ສະພາປຶກສາການເມືອງປະຊາຊົນແຫ່ງຊາດຈີນຈົດທະບຽນແລະນຳສະເໜີໃຫ້ພະແນກທີ່ກ່ຽວຂ້ອງຂອງລັດຖະບານຊຳລະແກ້ໄຂນັ້ນມີຕັ້ງ4999ສະບັບ,ຍັດຕິເຫຼົ່ານີ້ເມື່ອພະແນກທີ່ກ່ຽວຂ້ອງຂອງລັດຖະບານຄົ້ນຄວ້າສຶກສາແລະຮັບຮອງປະຕິບັດຕາມແລ້ວ,ກໍໄດ້ເສີມຂະຫຍາຍບົດບາດອັນສຳຄັນໃນການຊຸກຍູ້ເສດຖະກິດແຫ່ງຊາດແລະສັງຄົມໃຫ້ພັດທະນາຢ່າງຮອບດ້ານແລະກົມກຽວກັນ,ຊ່ອຍລັດຖະບານຈີນຕັດສິນນະໂຍບາຍຕາມຫຼັກວິຕະຍາສາດແລະແບບປະຊາທິປະໄຕ,ແລະຜ່ອນຄາຍຄວາມຂັດແຍ່ງຕ່າງໆໃນສັງຄົມ.ນອກນັ້ນ,ສະພາປຶກສາການເມືອງຍັງໄດ້ເສີມຂະຫຍາຍບົດບາດຂອງພັກຝ່າຍປະຊາທິປະໄຕຕ່າງໆແລະບຸກຄົນທີ່ບໍ່ສັງກັດພັກຝ່າຍໃດຕື່ມອີກ,ດຳເນີນວຽກງານສາມັກຄີແລະສຳພັນມິດຕະພາບກັບພີ່ນ້ອງຮ່ວມຊາດຮົງກົງ ມາກາວແລະໄຕ້ຫວັນພ້ອມດ້ວຍຊາວຈີນຕ່າງດ້າວ,ຕັ້ງໜ້າເປີດກວ້າງການໄປມາຫາສູ່ກັນກັບຕ່າງປະເທດ.
ປີ2007ແມ່ນປີສຳຄັນທີ່ຈີນລົງເລິກປະຕິບັດພັດທະນະທັດວິທະຍາສາດ,ຕັ້ງໜ້າຊຸກຍູ້ການສ້າງສາສັງຄົມສັງຄົມນິຍົມທີ່ກົມກຽວກັນ.ໃນຫົກເດືອນທ້າຍປີ2007,ພັກກອມມູນິດຈີນ ພັກກຳອຳນາດຂອງຈີນຈະຈັດກອງປະຊຸມຜູ້ແທນທົ່ວປະເທດຄັ້ງທີ17,ນີ້ແມ່ນເຫດການສຳຄັນໃນຊີວິດການເມືອງຂອງຈີນ.ເມື່ອຈ້ອງມອງວຽກງານຂອງສະພາປຶກສາການເມືອງປະຊາຊົນຈີນໃນປີນີ້,ທ່ານເຈຍຊິ້ງລິນ ປະທານສະພາປຶກສາການເມືອງປະຊາຊົນແຫ່ງຊາດຈີນກ່າວວ່າ:
"ໃນປີ2007ນີ້,ພວກເຮົາຕ້ອງຍຶດໝັ້ນແລະບູລະນະລະບອບຫຼາຍພັກຮ່ວມມືກັນແລະລະບອບປຶກສາການເມືອງທີ່ນຳໂດຍພັກກອມມູນິດຈີນ,ປັບປຸງແລະເສີມສ້າງແນວໂຮມເອກະພາບຮັກຊາດທີ່ກວ້າງຂວາງທີ່ສຸດ,ກຳສອງຫົວຂໍ້ໃຫຍ່ຄືສາມັກຄີແລະປະຊາທິປະໄຕ,ປະຕິບັດພາລະບົດບາດປຶກສາການເມືອງ,ຕິດຕາມກວດກາແບບປະຊາທິປະໄຕເຂົ້າຮ່ວມແລະຫາລືວຽກງານການປົກຄອງຢ່າງຈິງຈັງ,ສຳເລັດວຽກງານທຸກດ້ານໃນປີສຸດທ້າຍຂອງສະພາຊຸດນີ້ດ້ວຍຄວາມຮັບຜິດຊອບການເມືອງໃນລະດັບສູງແລະດ້ວຍສະພາບຈິດໃຈທີ່ດີເລີດ."
ທ່ານເຈຍຊິ້ງລິນກ່າວວ່າ,ການຊຸກຍູ້ການພັດທະນາເສດຖະກິດສັງຄົມໃຫ້ເຂົ້າສູ່ໂຄຈອນພັດທະນາແບບວິທະຍາສາດ,ຊຸກຍູ້ເສດຖະກິດແຫ່ງຊາດໃຫ້ພັດທະນາໄດ້ທັງດີທັງໄວນັ້ນແມ່ນຈຸດໜັກຂອງການປະຕິບັດພາລະບົດບາດແລະເສີມຂະຫຍາຍບົດບາດຂອງສະພາປຶກສາການເມືອງໃນປີນີ້.ກຳມະການສະພາປຶກສາການເມືອງທັງຫຼາຍຈະປະກອບຄຳຄິດຄຳເຫັນໂດຍສະເພາະກ່ຽວກັບບັນຫາຕ່າງໆເຊັ່ນເພີ່ມທະວີແລະບູລະນະການດັດສົມຄວບຄຸມມະຫາພາກ,ສັບຊ້ອນອົງປະກອບເສດຖະກິດແລະຫັນປ່ຽນຮູບການເຕີບໂຕຂອງເສດຖະກິດ,ເພີ່ມທະວີການປະຢັດພະລັງງານແລະຊັບພະຍາກອນແລະອະນຸລັກສິ່ງແວດລ້ອມ,ແກ້ໄຂບັນຫາຊີວິດການເປັນຢູ່ຂອງປະຊາຊົນ.
ໃນໄລຍະໄຂກອງປະຊຸມເປັນເວລາ12ມື້ເທື່ອນີ້,ກຳມະການທັງຫຼາຍຈະປະກອບຄຳຄິດຄຳເຫັນກ່ຽວກັບທິດທາງນະໂຍບາຍການປະຕິຮູບແລະການພັດທະນາຂອງຈີນແລະບັນຫາຈຸດສຸມທີ່ມວນຊົນສົນໃຈນຳ.ນອກນີ້,ກຳມະການທັງຫຼາຍຍັງຈະເຂົ້າຮ່ວມກອງປະຊຸມຄັ້ງທີ5ຂອງສະພາຜູ່ແທນປະຊາຊົນແຫ່ງຊາດຈີນສະໄໝທີ10ທີ່ຈະໄຂຂຶ້ນໃນວັນທີ5ມີນານີ້.
|
