|
ຫວ່າງມໍ່ໆນີ້ໃນເວລາໃຫ້ສຳພາດຕໍ່ນັກຂ່າວCRI, ເຈົ້າໜ້າທີ່ກະຊວງທີ່ດິນແລະຊັບພະຍາກອນຂອງຈີນກ່າວວ່າ, ແຕ່ປີ2006ມານີ້, ຈີນໄດ້ເພີ່ມຄວາມແຮງໃນການສືບສວນຄະດີລະເມີດກົດໝາຍທີ່ດິນ, ອັນໄດ້ສະກັດກັ້ນຢ່າງບັງເກີດຜົນຕໍ່ປະກົດການທີ່ໃຊ້ທີ່ດິນແບບຊະຊາຍ. ພ້ອມກັນນັ້ນ, ກໍໃຊ້ມາດຕະການຮັບປະກັນສິດຜົນປະໂຫຍດຂອງຊາວກະສິກອນທີ່ຖືກເກນໃຊ້ທີ່ດິນຢ່າງບັງເກີດຜົນ. ໃນລາຍການບົດແຈ້ງຂ່າວເສດຖະກິດຂອງຈີນໃນມື້ນີ້, ເຊີນຟັງລາຍລະອຽດທີ່ກ່ຽວຂ້ອງ:
ຄຽງຄູ່ກັບເສດຖະກິດຈີນເຕີບໂຕຢ່າງວ່ອງໄວ, ແຫ່ງຕ່າງໆຂອງຈີນໄດ້ເກີດກະແສລົງທຶນ, ດິນປູກຝັງຢ່າງຫຼວງຫຼາຍທີ່ອ້ອມຂ້າງຕົວເມືອງຖືກໃຊ້ເປັນເຂດພັດທະນາແລະເຮືອນຢູ່ທີ່ກາຍເປັນສິນຄ້າ. ກະແສການ"ກວມທີ່ດິນ"ນີ້ໄດ້ສ້າງບັນຫາເສດຖະກິດແລະສັງຄົມຈຳນວນໜຶ່ງໃຫ້ຈີນ. ທ່ານໂກ່ວປາວຜີງ ຜູ່ຮັບຜິດຊອບຂອງກົມກວດການປະຕິບັດກົດໝາຍຂອງກະຊວງທີ່ດິນແລະຊັບພະຍາກອນຈີນກ່າວວ່າ:
"ການຄອບຄອງທີ່ດິນລະເມີດກົດໝາຍຕົ້ນຕໍແມ່ນການຄອບຄອງທີ່ດິນຢ່າງຫຼວງຫຼາຍແລ້ວຕັ້ງເຂດພັດທະນາຢ່າງລະເມີດກົດລະບຽບ. ປັດຈຸບັນ, ເນື້ອທີ່ເຂດພັດທະນາຂອງທົ່ວປະເທດຍັງຫຼາຍກວ່າຍອດເນື້ອທີ່ທີ່ໃຊ້ໃນການກໍ່ສ້າງຕົວເມືອງໃນປັດຈຸບັນ. ບາງອົງການປົກຄອງທ້ອງຖິ່ນຍັງໃຊ້ສິດເກນໃຊ້ທີ່ດິນຢູ່ທົ່ວທີບ, ເກນໃຊ້ທີ່ດິນຢ່າງຫຼວງຫຼາຍ, ເຮັດໃຫ້ສິດຜົນປະໂຫຍດຂອງຊາວກະສິກອນຖືກລ່ວງລ້ຳແລະສັງຄົມບໍ່ໝັ້ນຄົງ."
ຢູ່ບາງບ່ອນຂອງຈີນ, ດິນປູກຝັງຫຼວງຫຼາຍຖືກເກນໃຊ້ໃນນາມຕ່າງໆ, ຊາວກະສິກອນສ່ວນໜຶ່ງທີ່ເສຍດິນປູກຝັງໄດ້ຮັບການທົດແທນດ້ານເສດຖະກິດພັດຕໍ່າຫຼາຍ. ທ່ານໂກ່ວປາວຜີງຊີ້ອອກວ່າ, ເຈົ້າໜ້າທີ່ອົງການປົກຄອງທ້ອງຖິ່ນສ່ວນໜຶ່ງເພື່ອສ້າງ"ຜົນງານການເມືອງ"ແລ້ວຕັ້ງເຂດພັດທະນາຕ່າງໆທີ່ບໍ່ຈໍາເປັນຢ່າງຫຼັບຫູຫຼັບຕາ, ຫຼືສ້າງໂຄງການລົງທຶນແບບຊ້ຳເກົ່າ, ນີ້ແມ່ນສາເຫດຕົ້ນຕໍທີ່ຈີນປະກົດມີກະແສກວມທີ່ດິນໃນປັດຈຸບັນ.
ຖ້າວ່າປ່ອຍປະກົດການນີ້ແຜ່ລາມຕໍ່ໄປ, ຈະມີຜົນສະທ້ອນຕໍ່ການພັດທະນາຢ່າງແຂງແຮງຂອງເສດຖະກິດແລະສັງຄົມຂອງຈີນຢ່າງແນ່ນອນ. ສະນັ້ນ, ການຕັ້ງໜ້າໃຊ້ມາດຕະການຫຼຸດກະແສກວມທີ່ດິນແມ່ນສິ່ງທີ່ຕ້ອງເປັນໄປ. ໃນຫຼາຍປີມານີ້ຈີນເອົາການຄວບຄຸມການນຳໃຊ້ທີ່ດິນຢ່າງເຄັ່ງຄັດເປັນນະໂຍບາຍສຳຄັນຂອງການດັດສົມມະຫາພາກເສດຖະກິດ, ແລະໄດ້ວາງມາດຕະການຫຼາຍຢ່າງ, ເພື່ອເຮັດໃຫ້ຂະໜາດການນຳໃຊ້ທີ່ດິນດ້ານອຸດສາຫະກຳແລະໂຄງການທີ່ດິນແລະເຮືອນຢູ່ຢູ່ແຫ່ງຕ່າງໆໃຫ້ໜ້ອຍລົງ, ແລະໃຊ້ເຄື່ອງມືກົດໝາຍມາຕໍ່ຕ້ານປະກົດການທີ່ນຳໃຊ້ທີ່ດິນຢ່າງລະເມີດກົດໝາຍ.
ໃນເວລາໃຫ້ສຳພາດຕໍ່ນັກຂ່າວ, ທ່ານກ່າງຈ້າງຊົນ ຮອງຜູ່ກວດກາທີ່ດິນແຫ່ງຊາດຈີນກ່າວວ່າ:
"ເພື່ອເພີ່ມທະວີແລະປັບປຸງການດັດສົມມະຫາພາກຂອງຈີນໃຫ້ດີຂຶ້ນ, ພວກເຮົາໄດ້ສະເໜີໃຫ້ໝູນໃຊ້ນະໂຍບາຍທີ່ດິນເຂົ້າຮ່ວມການດັດສົມມະຫາພາກ. ພວກເຮົາເຮັດໃຫ້ສິດທີ່ລັດຖະບານກວດກາອະນຸມັດຕົວເມືອງໃຊ້ທີ່ດິນໃຫ້ຫຍໍ້ກວ່າເກົ່າແລ້ວ, ຕົ້ນຕໍໃຫ້ອົງການປົກຄອງຂັ້ນແຂວງກວດກາແລະຕິດຕາມຄຸ້ມຄອງ. ພາກສ່ວນຄຸ້ມຄອງຊັບພະຍາກອນທີ່ດິນຂອງລັດຖະບານຄວນເສີມສ້າງຄວາມສາມາດຕິດຕາມຄຸ້ມຄອງທີ່ດິນ."
ແຕ່ເດືອນມັງກອນຫາເດືອນພະຈິກປີ2006, ຈີນໄດ້ສຳຫຼວດກວດກາຄະດີລະເມີດກົດໝາຍທີ່ດິນ7ໝື່ນ7ພັນ4ຮ້ອຍລາຍ, ຊຳລະທີ່ດິນທີ່ຖືກໃຊ້ໄປທາງອື່ນຢ່າງລະເມີດກົດໝາຍ1ໝື່ນກວ່າເຮັກຕາ, ໄດ້ລົງໂທດເຈົ້າໜ້າທີ່ທ້ອງຖິ່ນຈຳນວນໜຶ່ງທີ່ລະເມີດວິໄນແລະລະເມີດກົດໝາຍຢ່າງເຄັ່ງຄັດ. ພ້ອມກັນນັ້ນ, ກະຊວງທີ່ດິນແລະຊັບພະຍາກອນຈີນຍັງໄດ້ຄວບຄຸມຂະໜາດໃຊ້ທີ່ດິນໃນດ້ານການກໍ່ສ້າງຢ່າງເຄັ່ງຄັດ, ຮຽກຮ້ອງໃຫ້ໂຄງການກໍ່ສ້າງທີ່ໃຊ້ດິນປູກຝັງທັງໝົດລ້ວນແຕ່ຕ້ອງຂໍອະນຸມັດພາຍຫຼັງຜູ່ຊ່ຽວຊານຊັນນະສູດແລ້ວ. ພ້ອມກັນນັ້ນ, ຈີນຍັງໄດ້ຫຼຸດການໃຊ້ທີ່ດິນບໍ່ສົມເຫດສົມຜົນ6000ກວ່າເຮັກຕາ, ອະນຸມັດທີ່ດິນກໍ່ສ້າງໃໝ່ໜ້ອຍກວ່າປີ2005 15,6%. ທ່ານຫຼີ້ຢວນ ລັດຖະມົນຕີຊ່ອຍວ່າການກະຊວງທີ່ດິນແລະຊັບພະຍາກອນຂອງຈີນກ່າວວ່າ, ປັດຈຸບັນ, ການກະທຳທີ່ກວມທີ່ດິນຢ່າງຫຼວງຫຼາຍພວມໄດ້ຮັບການສະກັດກັ້ນຢ່າງບັງເກີດຜົນ.
ໃນເວລາກວດກາອະນຸມັດຢ່າງເຄັ່ງຄັດຕໍ່ການນຳໃຊ້ທີ່ດິນ, ຈີນຍັງໄດ້ຊຸກຍູ້ການປະຕິຮູບລະບອບການນຳໃຊ້ທີ່ດິນຂອງຊາດທີ່ມີການທົດແທນໃຫ້ລົງສູ່ລວງເລິກ, ເຮັດໃຫ້ການຂາຍທີ່ດິນເຂົ້າສູ່ລະບຽບແບບແຜນ, ເພີ່ມການເກັບຄ່າໃຊ້ທີ່ດິນ, ແລະເອົາທຶນດັ່ງກ່າວໃຊ້ໃນການສະໜັບສະໜູນການພັດທະນາກະສິກຳ.
ທ່ານຫຼີ້ຢວນ ລັດຖະມົນຕີຊ່ອຍວ່າການກະຊວງທີ່ດິນແລະຊັບພະຍາກອນຂອງຈີນຊີ້ອອກວ່າ:
"ພວກເຮົາຈະຍົກສູງມາດຖານທົດແທນການເກນໃຊ້ທີ່ດິນ, ເອົາຊາວກະສິກອນທີ່ເສຍທີ່ດິນຜູກພັນກັບການປະກັນສັງຄົມ, ປະຕິບັດຕາມຄວາມຮຽກຮ້ອງທີ່(ຮັບປະກັນລະດັບຊີວິດການເປັນຢູ່ຂອງຊາວກະສິກອນທີ່ຖືກເກນໃຊ້ທີ່ດິນຕໍ່, ເຮັດໃຫ້ການດຳລົງຊີວິດໄລຍະຍາວມີການຮັບປະກັນ, ໃຊ້ມາດຕະການຕ່າງໆຢ່າງແທ້ຈິງໃນດ້ານປັບປຸງລະບຽບການການໃຊ້ທີ່ດິນໃຫ້ສົມບູນຂຶ້ນ, ເຮັດໃຫ້ມາດຖານທົດແທນຫັນເຂົ້າສູ່ລະບຽບກວ່າເກົ່າ, ເປີດກວ້າງຊ່ອງທາງຈັດວາງຊາວກະສິກອນທີ່ເສຍທີ່ດິນແລະແກ້ໄຂຂໍ້ຂັດແຍ່ງກັນທີ່ເກີດຂຶ້ນຍ້ອນການເກນໃຊ້ທີ່ດິນຢ່າງທັນເວລາເປັນຕົ້ນ."
ຢູ່ຫຼາຍທ້ອງຖິ່ນຂອງຈີນ, ຊາວກະສິກອນທີ່ເສຍຜົນປະໂຫຍດຈາກການເກນໃຊ້ທີ່ດິນໄດ້ຈັດເຂົ້າໃນລະບອບປະກັນສັງຄົມເທື່ອລະກ້າວແລ້ວ, ຊີວິດຂອງພວກເຂົາເຈົ້າໃນອະນາຄົດມີສິ່ງຄ້ຳປະກັນແລ້ວ. ພ້ອມກັນນັ້ນ, ຈີນຍັງໄດ້ອົບຮົມຊາວກະສິກຳໂດຍບໍ່ເສຍຄ່າໃຊ້ຈ່າຍ, ເຮັດໃຫ້ພວກເຂົາເຈົ້າມີຄວາມສາມາດແລະໂອກາດທີ່ເຮັດວຽກຢູ່ຕົວເມືອງ. ໃນບ້ານຫຼົງເຫີເມືອງຫົວຊື້ນະຄອນຈ່ຽງອີ່ນແຂວງຈ່ຽງຊູທີ່ພາກໃຕ້ຂອງຈີນ, ຊາວບ້ານຫຸ້ຍຈ້ຽນຜີງ ໄດ້ເງິນຄຸ້ມກັນສັງຄົມທີ່ລັດຖະບານຈ່າຍໃຫ້ຊາວກະສິກອນທີ່ເສຍທີ່ດິນໃນແຕ່ລະເດືອນ, ປັດຈຸບັນມີ150ຢວນຕໍ່ເດືອນ. ແລະຈະເພີ່ມຂຶ້ນໃນຕໍ່ໄປ. ຫຸ້ຍຈ້ຽນຜີງພໍໃຈຫຼາຍຕໍ່ເລື່ອງນີ້:
"ຮອດອາຍຸ 60 ປີກໍໄດ້200ຢວນຕໍ່ເດືອນ, ຄ້າຍຄືກັບກຳມະກອນທີ່ອອກກິນເບັ້ຍບຳນານໃນຕົວເມືອງ, ພວກເຮົາບໍ່ເຄີຍຄິດວ່າຈະມີເລື່ອງແບບນີ້ເລີຍ."
ໃນນະຄອນຈ່ຽງອີ່ນ, ມີຊາວກະສິກອນຄືກັບຫຸ້ຍຈ້ຽນຜີງເກືອບ2ແສນຄົນ, ອົງການປົກຄອງໄດ້ລົງທຶນຫຼາຍຕື້ຢວນເພື່ອເລື່ອງນີ້.
ຈີນພວມປັບປຸງລະບອບກວດການທີ່ດິນແຫ່ງຊາດໃຫ້ສົມບູນ, ໄດ້ຕັ້ງກົມກວດກາທີ່ດິນຢູ່9ເຂດຈຸດໜັກເຊັ່ນປັກກິ່ງ ຊຽງໄຮ້ເປັນຕົ້ນ, ເພື່ອສືບຕໍ່ຄວບຄຸມທີ່ດິນກໍ່ສ້າງຢ່າງເຄັ່ງຄັດ, ຮັກສາດິນປູກຝັງຂອງຊົນນະບົດ. ອົງການດັ່ງກ່າວຈະເຈາະຈົງກວດກາສະພາບການທີ່ອົງການປົກຄອງທ້ອງຖິ່ນປະຕິບັດລະບອບຮັກສາດິນປູກຝັງແລະສະພາບການທີ່ປະຕິບັດມາດຖານຕ່ຳສຸດກ່ຽວກັບການຂາຍທີ່ດິນໃຊ້ໃນອຸດສາຫະກ. ພ້ອມກັນນັ້ນ, ຈີນຍັງຈະສືບຕໍ່ປະຕິບັດລະບອບຮັບຜິດຊອບການຄຸ້ມຄອງທີ່ດິນຢ່າງເຄັ່ງຄັດ, ເອົາອັດຕາຄົ້ນພົບແລະອັດຕາສະກັດກັ້ນການກະທຳທີ່ໃຊ້ທີ່ດິນຜິດກົດໝາຍເປັນຕົວເລກຄາດໝາຍສຳຄັນໃນການກວດສອບເຈົ້າໜ້າທີ່ທ້ອງຖິ່ນ.
ທ່ານຜູ່ຟັງທີ່ຟັງມານັ້ນແມ່ນບົດແຈ້ງຂ່າວເລື່ອງ:ຈີນຄວບຄຸມການເກນໃຊ້ທີ່ດິນຢ່າງເຄັ່ງຄັດ ຮັບປະກັນສິດຜົນປະໂຫຍດຂອງຊາວກະສິກອນທີ່ຖືກເກນໃຊ້ທີ່ດິນ. ລາຍການບົດແຈ້ງຂ່າວເສດຖະກິດຂອງຈີນກໍຈົບລົງພຽງທໍ່ນີ້.
|
