|
ໃນຫຼາຍປີມານີ້, ອຸດສາຫະກຳວັດທະນະທຳຈີນປະກົດຕົວພະລັງຊີວິດຢ່າງຮຸ່ງເຮືອງ, ຜະລິດຕະກຳວັດທະນະທຳຈຳນວນໜຶ່ງທີ່ມີສີສັນພິເສດຂອງຈີນບໍ່ພຽງແຕ່ໄດ້ຮັບຄວາມນິຍົມກັນຫຼາຍຢູ່ພາຍໃນປະເທດຈີນ, ທັງໄດ້ອອກໄປສູ່ໂລກຢ່າງຕໍ່ເນື່ອງ, ແລະໄດ້ຮັບຄວາມສົນໃຈນຳຫຼາຍຢູ່ຕະຫຼາດຕ່າງປະເທດ. ຄຽງຄູ່ກັບເສດຖະກິດຈີນພັດທະນາແລະລະດັບໂລກາວິວັດຍົກສູງຂຶ້ນ, ໃນພາຍໜ້າ, ຜູ້ຊົມຢູ່ຕ່າງປະເທດຈະມີໂອກາດຫຼາຍກວ່າເກົ່າໄດ້ເບິ່ງຮູບເງົາຈີນ ອ່ານປື້ມຈີນແລະຊົມການສະແດງສິລະປະຂອງຈີນ. ຕໍ່ໄປເຊີນຟັງບົດແຈ້ງຂ່າວທີ່ກ່ຽວຂ້ອງ.
ທ້າຍປີກາຍນີ້, ປັກກິ່ງໄດ້ຈັດງານມະຫະກຳອຸດສາຫະກຳປະດິດຄຶດແຕ່ງວັດທະນະທຳສາກົນຄັ້ງທຳອິດ. ຫົວໜ່ວຍທີ່ເຂົ້າຮ່ວມການວາງສະແດງທັງຫຼາຍໄດ້ຜ່ານງານມະຫະກຳດັ່ງກ່າວນີ້ສະແດງຜະລິດຕະພັນວັດທະນະທຳທີ່ມີເອກະລັກພິເສດໃຫ້ສາທາລະນະຊົນພາຍໃນຈີນແລະຕ່າງປະເທດ, ເຮັດໃຫ້ຜູ້ຊົມໄດ້ເບິ່ງຈົນຕາລາຍ. ຢູ່ບ່ອນວາງສະແດງຂອງແຂວງຈີລິນ ພາກຕາເວັນອອກສຽງເໜືອຂອງຈີນ, ດົນຕີພິມບູຮານທີ່ກອງສິລະປະຂອງກຸ່ມວັດທະນະທຳຈົ່ງເຈິ່ງສະແດງນັ້ນໄດ້ດຶງດູດຜູ້ຊົມທັງຫຼາຍ. ທ່ານວາງກ່ວງມິງ ຜູ້ອຳນວຍການໃຫຍ່ຂອງກຸ່ມວັດທະນະທຳຈົ່ງເຈິ່ງບອກນັກຂ່າວວ່າ, ຫຼາຍອົງການສະແດງຂອງຕ່າງປະເທດສົນໃຈທີ່ສຸດນຳດົນຕີພື້ນເມືອງຈີນ. ທ່ານເວົ້າວ່າ:
"ເທື່ອນີ້, ພວກເຮົາໄດ້ຕາງໜ້າແຂວງຈີລິນເຂົ້າຮ່ວມການວາງສະແດງ, ຕົ້ນຕໍແມ່ນວາງສະແດງພີມບູຮານ ເຄື່ອງເສບດົນຕີຊົນຊາດຈີນ. ອົງການສະແດງຈຳນວນໜຶ່ງຂອງອາເມລິກາແລະເຢຍລະມັນເປັນຕົ້ນໄດ້ກ້າວເຖິງຂັ້ນຕົກລົງກັນເບື້ອງຕົ້ນກັບພວກເຮົາ, ເຊີນພວກເຮົາໄປສະແດງຢູ່ປະເທດເຫຼົ່ານີ້, ທັງດຳເນີນການສິດສອນຢູ່ແຫ່ງນັ້ນ."
ພີມບູຮານແມ່ນເຄື່ອງເສບດົນຕີທີ່ບູຮານກວ່າໝູ່ຂອງຈີນ, ໄດ້ຮັບຄວາມນິຍົມກັນຫຼາຍຈາກປະຊາຊົນຈີນ. ທ່ານວາງກ່ວງມີງເວົ້າວ່າ, ຫຼາຍປີກ່ອນ, ກຸ່ມວັດທະນະທຳຈົ່ງເຈິ່ງໄດ້ດຳເນີນການຜະລິດ ຈຳໜ່າຍ ການສະແດງແລະການອົບຮົມຄູສອນພີມບູຮານ. ໃນຫຼາຍປີມານີ້, ຄະນະສະແດງຂອງກຸ່ມວັດທະນະທຳຈົ່ງເຈິ່ງເກືອບໄປຮອດທົ່ວເອີລົບ, ບໍ່ພຽງແຕ່ໄດ້ຈັດການສະແດງຢູ່ 30 ກວ່າປະເທດເຊັ່ນເຢຍລະມັນແລະອັງກິດເປັນຕົ້ນ, ຍັງໄດ້ຈັດຊຸດອົບຮົມຢູ່ທ້ອງຖີ່ນ, ສອນຄົນຕ່າງປະເທດຮຽນພີມບູຮານ.
ນັກທຸລະກິດທຽນສິນ ເມືອງພາກເໜືອຂອງຈີນທີ່ເຂົ້າຮ່ວມການວາງສະແດງໄດ້ນຳເອົາພີມບູຮານທີ່ໄດ້ຮັບການປັບປຸງໃໝ່ມາວາງສະແດງ. ທ່ານເຫີເວີນມ້າວ ຜູ້ຮັບຜິດຊອບຂອງພະແນກຜະລິດຕະກຳຂອງກົມວັດທະນະທຳນະຄອນທຽນສິນບອກນັກຂ່າວວ່າ, ພີມບູຮານທີ່ປັບປຸງໃໝ່ນີ້ສາມາດແກ້ໄຂບັນຫາລະດັບສຽງບໍ່ຄົບຂອງພີມບູຮານທີ່ດັ້ງເດີມ, ໄດ້ຣັບຄວາມສົນໃຈຫຼາຍຈາກຜູ້ມາວາງສະແດງ. ມື້ທຳອິດ, ເຂົາເຈົ້າກໍໄດ້ເຊັນສັນຍາຈອງຊື້ 9 ລ້ານກວ່າຢວນ.
ຕາມສະເໜີວ່າ, ໃນຫຼາຍປີມານີ້, ຜະລິດຕະພັນວັດທະນະທຳທີ່ມີເອກະລັກເຂດທຽນສິນໄດ້ທະຍອຍກັນອອກໄປຕ່າງປະເທດ, ລາຍການງີ້ວແລະກາຍຍະສິນທີ່ດີເລີດຫຼາຍໆລາຍການໄດ້ເອົາໄປສະແດງຢູ່ຕ່າງປະເທດ, ເຄື່ອງສິລະປະຊົນຊາດດັ້ງເດີມຈຳນວນໜຶ່ງເຊັ່ນ ຮູບພາບຊາວໜຸ່ມຢາງລິວແລະຄົນປັ້ນດິນສີເປັນຕົ້ນກໍໄດ້ຮັບຄວາມຊົມເຊີຍຈາກຕະຫຼາດຕ່າງປະເທດ. ທ່ານເຫີເວີນມ້າວແນະນຳວ່າ:
"ຮູບພາບຊາວໜຸ່ມຢາງລີວແລະຄົນປັ້ນດິນນາມສະກຸນຈ່າງ ແມ່ນເຄື່ອງສິລະປະຊົນຊາດ, ໂດຍສະເພາະແມ່ນສຳນັກຮູບພາບຊາວໜຸ່ມຢາງລີວໄດ້ເຮັດໃຫ້ການຄວັດໄມ້ກັບການແຕ້ມປະສານເຂົ້າກັນ, ຮູບພາບຂອງເຂົາເຈົ້າໄດ້ມີຜົນສະທ້ອນອັນແນ່ນອນໃນຕະຫຼາດສາກົນ, ປີໃດກໍມີຜະລິດຕະພັນຈຳນວນໜຶ່ງສົ່ງອອກຂາຍນອກ, ເຊັ່ນສົ່ງໄປຂາຍຢູ່ຍີ່ປຸ່ນ ສ.ເກົາຫລີແລະປະເທດອາຊີອາຄະເນ."
ໃນງານມະຫະກຳ, ເພງພື້ນເມືອງ ການເຕັ້ນລຳ ແລະງີ້ວຄົນໄມ້ຊັກດ້ວຍສາຍທີ່ມີເອກະລັກທ້ອງຖິ່ນອັນເຂັ້ມຂຸ້ນຂອງແຂວງສ້ານຊີ່ກໍໄດ້ດຶງດູດສາຍຕາຂອງຜູ້ຊົມທັງຫຼາຍ. ນັກທຸລະກິດການສະແດງທີ່ຮ່ວມງານສົນໃຈທີ່ສຸດນຳຜະລິດຕະພັນວັດທະນະທຳແຂວງສ້ານຊີ່, ນັກທຸລະກິດການສະແດງອາເມລິກາແຫ່ງໜຶ່ງກໍໄດ້ສະເໜີວ່າຈະເອົາງີ້ວຄົນໄມ້ຊັກດ້ວຍສາຍໄປສະແດງຢູ່ອາເມລິກາ.
ໃນງານມະຫະກຳຜະລິດຕະກຳການປະດິດຄຶດແຕ່ງວັດທະນະທຳປັກກິ່ງ, ຍັງມີຜະລິດຕະພັນວັດທະນະທຳທີ່ມີສີສັນພິເສດຂອງຈີນທີ່ຕ່າງກັນຫຼາຍໆປະເພດ, ໄດ້ສະແດງໃຫ້ເຫັນພະລັງຊີວິດຈະເລີນຮຸ່ງເຮືອງຂອງອຸດສາຫະກຳວັດທະນະທຳຂອງຈີນ. ງານມະຫະກຳທີ່ປັກກິ່ງເປັນເຈົ້າພາບຈັດຂຶ້ນນັ້ນໄດ້ກາຍເປັນສະຖານທີ່ອັນດີງາມທີ່ຊຸກຍູ້ໃຫ້ວັດທະນະທຳຈີນຍ່າງໄປສູ່ໂລກ. ນອກຈາກຈັດງານມະຫະກຳຊະນິດນີ້ມາວາງສະແດງຜະລິດຕະພັນວັດທະນະທຳຈີນແລ້ວ, ໃນບາງທ້ອງຖິ່ນຂອງຈີນຍັງໄດ້ວາງນະໂຍບາຍແລະມາດຕະການຕ່າງໆມາອຸປະຖຳການພັດທະນາຂອງອຸດສາຫະກຳວັດທະນະທຳ. ຕົວຢ່າງຄື: ປັກກິ່ງໄດ້ໃຫ້ທຶນຊ່ອຍເຫຼືອແກ່ວິສາຫະກິດປະດິດຄຶດແຕ່ງວັດທະນະທຳນຳເຂົ້າຜູ້ຊ່ຽວຊານຕ່າງປະເທດ, ຫຼຸດຫຼືຍົກເວັ້ນອາກອນລາຍໄດ້ ແລະອາກອນທຸລະກິດຕໍ່ວິສາຫະກິດປະດິດຄຶດແຕ່ງວັດທະນະທຳ. ແຕ່ປີ 2006 ເປັນຕົ້ນມາ, ອົງການປົກຄອງນະຄອນປັກກິ່ງຍັງໄດ້ສ້າງ"ທຶນຈຳເພາະກ່ຽວກັບການພັດທະນາອຸດສາຫະກຳປະດິດຄຶດແຕ່ງວັດທະນະທຳ", ແຕ່ລະປີລົງທຶນ 500 ລ້ານຢວນ, ໃຊ້ສຳລັບການສະໜັບສະໜູນວິສາຫະກິດທີ່ກ່ຽວຂ້ອງດຳເນີນການສະແດງສິລະປະ, ພິມຈຳໜ່າຍແລະການຄ້າສິດປະພັນ, ການຜະລິດແລະແລກປ່ຽນຮູບເງົາແລະລະຄອນໂທລະພາບ, ການຄົ້ນຄວ້າຜະລິດກາຕູນແລະເກມເນັດເປັນຕົ້ນ.
ປັດຈຸບັນ, ຜະລິດຕະພັນວັດທະນະທຳຈີນໄດ້ຮັບການຮັບຮອງຈາກປະຊາຄົມໂລກເປັນເທື່ອລະກ້າວ. ທ່ານລີຫວຍລ້ຽງ ຫົວໜ້າສະຖາບັນຄົ້ນຄວ້າການຄ້າວັດທະນະທຳກັບຕ່າງປະເທດຂອງມະຫາວິທະຍາສາດສື່ມວນຊົນຈີນຮູ້ສຶກຢ່າງເລິກເຊິ່ງ, ທ່ານເວົ້າວ່າ:
"ໃນງານມະຫະກຳປຶ້ມສາກົນຟຼານຟອກຄັ້ງທີ 58 ຂອງເຢຍລະມັນທີ່ຈັດຂຶ້ນໃນປີກາຍນີ້, ການຄ້າຂາຍປື້ມແລະລິຂະສິດຂອງຈີນໄດ້ປຽບເປັນຄັ້ງທຳອິດ, ພວກເຮົາໄດ້ສົ່ງອອກລິຂະສິດຂອງປື້ມ 600 ກວ່າລາຍ. ນີ້ແມ່ນມີຄວາມໝາຍປະຫວັດສາດ, ແມ່ນເລື່ອງທີ່ເປັນໜ້າຍ້ອງຍໍ."
ເຖິງວ່າໃນຫຼາຍປີມານີ້, ຜະລິດຕະພັນວັດທະນະທຳຈີນໄດ້ຄ່ອຍໆພົ້ນເດັ່ນອອກຢູ່ຕະຫຼາດສາກົນ, ແຕ່ກຳລັງແກ່ງແຍ່ງສັງລວມຍັງບໍ່ແຂງແຮງປາຍໃດ. ທ່ານລີຫວຍລ້ຽງເຫັນວ່າ, ສາເຫດແມ່ນຍ້ອນການໝູນເດີນຜະລິດຕະພັນວັດທະນະທຳຈີນເປັນແບບການຄ້າເລີ່ມດຳເນີນອ່າວຊ້າ. ທ່ານສະເໜີໃຫ້ວິສາຫະກິດຈີນຕ້ອງອອກແຮງໃນສອງດ້ານຄືເນື້ອໃນແລະຊ່ອງທາງ, ບໍ່ພຽງແຕ່ເຮັດໃຫ້ເນື້ອໃນດີເລີດຂອງວັດທະນະທຳຈີນເຊື່ອມໂຍງເຂົ້າໃນຜະລິດຕະພັນ, ພ້ອມທັງເຮັດໃຫ້ຜະລິດຕະພັນສອດຄ່ອງກັບຄວາມນິຍົມຊົມເບິ່ງຂອງຄົນຕ່າງປະເທດ, ສອດຄ່ອງກັບຈຸດພິເສດແລະກົດເກນຂອງຕະຫຼາດສາກົນ, ເຮັດແນວນີ້, ຈຶ່ງສາມາດເຮັດໃຫ້ຜະລິດຕະພັນວັດທະນະທຳຈີນໄດ້ຮັບຜົນງານຈຳໜ່າຍທີ່ດີຫຼາຍ.
ທ່ານຜູ້ຟັງ, ທີ່ຟັງມານັ້ນແມ່ນບົດແຈ້ງຂ່າວທີ່ພາດຫົວເລື່ອງວ່າ: ຜະລິດຕະພັນວັດທະນະທຳຈີນຍ່າງໄປສູ່ໂລກ. ລາຍການແຈ້ງຂ່າວເສດຖະກິດພາກນີ້ຂໍຈົບລົງທໍ່ນີ້, ສະບາຍດີ.
|
