|
CRIລາຍງານວ່າ:ກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນແລະສະພາປຶກສາການເມືອງປະຊາຊົນແຫ່ງຊາດຈີນໄດ້ອັດລົງໃນວັນທີ16ແລະວັນທີ15ມີນານີ້.ກອງປະຊຸມຂອງສອງສະພາດັ່ງກ່າວທີ່ຈັດຂຶ້ນປີລະເທື່ອໄດ້ໂຮມສູນສ່ອງແສງໃຫ້ເຫັນການເມືອງປະຊາທິປະຕິທີ່ມີສີສັນພິເສດຂອງຈີນ,ແມ່ນປ່ອງຢ້ຽມດີທີ່ສຸດເພື່ອເບິ່ງຊີວິດການເມືອງແລະທິດຂະຫຍາຍຕົວຂອງຈີນ.ສ່ວນການຊຸກຍູ້ສັງຄົມຈີນກ້າວໜ້າໄປຕາມທິດທີ່ຍຸດຕິທຳແລະມີປະຊາທິປະໄຕແມ່ນຂ່າວຄາວທີ່ເດັ່ນທີ່ສຸດທີ່ສົ່ງມາຈາກປ່ອງຢ້ຽມດັ່ງກ່າວໃນປີນີ້.
ກ່ອນກອງປະຊຸມຂອງສອງສະພາໄຂຂຶ້ນ,ໃນບົດຄວາມບົດໜຶ່ງ,ທ່ານເວິ່ນເຈ່ຍປາວ ນາຍົກລັດຖະມົນຕີຈີນຊີ້ອອກວ່າ,ໜ້າທີ່ສຳຄັນສອງຢ່າງຂອງສັງຄົມຈີນປັດຈຸບັນແມ່ນປົດປ່ອຍແລະພັດທະນາກຳລັງການຜະລິດແລະເຮັດໃຫ້ສັງຄົມມີຄວາມຍຸດຕິທຳແລະຄວາມເປັນທຳເທື່ອລະກ້າວ.ນີ້ແມ່ນເທື່ອທຳອິດທີ່ຂັ້ນນຳສູງສຸດຂອງຈີນຍົກຄວາມຍຸດຕິທຳແລະຄວາມເປັນທຳຂອງສັງຄົມໃຫ້ສູງເຖິງລະດັບດຽວກັນກັບການພັດທະນາກຳລັງການຜະລິດ,ອັນໄດ້ສະແດງໃຫ້ເຫັນລັກສະນະຂໍກະແຈແລະຄວາມສຳຄັນຂອງຄວາມຍຸດຕິທຳທີ່ມີຕໍ່ສັງຄົມຈີນປັດຈຸບັນ.
ສະນັ້ນ,ມັນຈິ່ງເປັນເລື່ອງແນ່ນອນທີ່ທ່ານເວິ່ນເຈ່ຍປາວຈິ່ງໄດ້ຖືການແກ້ໄຂບັນຫາຊີວິດການເປັນຢູ່ຂອງປະຊາຊົນທີ່ມີຜົນສະທ້ອນຕໍ່ຄວາມຍຸດຕິທຳຂອງສັງຄົມນັ້ນເປັນເນື້ອໃນຈຸດໜັກຂອງບົດລາຍງານວຽກງານລັດຖະບານໃນປີນີ້.ສ້າງລະບອບປະກັນຊີວິດລະດັບຕ່ຳສຸດຢູ່ຊົນນະບົດທົ່ວປະເທດ,ຕັ້ງໜ້າປະຕິບັດລະບອບຮ່ວມມືປິ່ນປົວແບບໃໝ່ຂອງຊົນນະບົດ,ເລັ່ງລັດສ້າງລະບອບປະກັນສັງຄົມທີ່ສອດຄ່ອງກັບຈຸດພິເສດຂອງຊາວກະສິກອນທີ່ເຮັດວຽກຢູ່ໃນຕົວເມືອງ,ການເງິນສູນກາງຈີນໄດ້ໃຊ້ງົບປະມານ9ຕື້500ລ້ານຢວນເພື່ອໃຊ້ເປັນເງິນອຸດໜູນການສຶກສາແລະທຶນສຶກສາ,ຍົກເວັ້ນຄ່າຮຽນແລະຄ່າຕ່າງໆໃນໄລຍະການສຶກສາພາກບັງຄັບຢ່າງຮອບດ້ານຢູ່ຊົນນະບົດ,ແລະອື່ນໆ.ໃນໄລຍະປະຊຸມ,ຫົວຂໍ້ຕ່າງໆທີ່ພົວພັນເຖິງຄວາມຍຸດຕິທຳແລະຄວາມເປັນທຳທາງສັງຄົມ,ເຊັ່ນ ການພັດທະນາຊົນນະບົດ ການສຶກສາ ລາຄາເຮືອນຢູ່ສູງຂຶ້ນ ບັນຫາປະຕິຮູບການປິ່ນປົວເປັນຕົ້ນໄດ້ກາຍເປັນຈຸດສຸມໃນການປຶກສາຫາລືກັນຂອງຜູ້ແທນປະຊາຊົນແລະກຳມະການສະພາປຶກສາການເມືອງ.
ກອງປະຊຸມປະຈຳປີນີ້ຂອງສະພາຜູ້ແທນປະຊາຊົນແຫ່ງຊາດຈີນໄດ້ສຳຫຼວດພິຈາລະນາແລະຮັບຮອງກົດໝາຍທີ່ສຳຄັນສອງສະບັບ,ຄື ກົດໝາຍວ່າດ້ວຍສິດຊັບສິນແລະກົດໝາຍວ່າດ້ວຍອາກອນລາຍໄດ້ຂອງວິສາຫະກິດ, ໄດ້ຕອບສະໜອງຢ່າງແຂງແຮງຕໍ່ສຽງທີ່ຮຽກຮ້ອງໃຫ້ມີຄວາມຍຸດຕິທຳເຊິ່ງນັບມື້ນັບດັງຂຶ້ນຢູ່ສັງຄົມຈີນໃນຫຼາຍປີມໍ່ໆມານີ້.ກົດໝາຍວ່າດ້ວຍສິດຊັບສິນໄດ້ສະໜອງການປົກປ້ອງໃຫ້ແກ່ຊັບສິນສ່ວນຕົວແລະຊັບສິນສ່ວນລວມຢ່າງສະເໝີພາບກັນ,ມີຫວັງຈະສ້າງລະບຽບເສດຖະກິດບົນພື້ນຖານສິດຊັບສິນ.ສ່ວນກົດໝາຍວ່າດ້ວຍອາກອນລາຍໄດ້ຂອງວິສາຫະກິດ ໄດ້ທ້ອນໂຮມລະບອບອາກອນລາຍໄດ້ຂອງວິສາຫະກິດຈີນແລະວິສາຫະກິດຕ່າງປະເທດທີ່ຢູ່ໃນສະພາບບໍ່ສະເໝີພາບກັນຢ່າງຍາວນານນັ້ນເຂົ້າເປັນເອກະພາບກັນ,ໄດ້ອຳນວຍສະພາບແວດລ້ອມແຫ່ງການແຂ່ງຂັນໃນຕະຫຼາດທີ່ຍຸດຕິທຳກວ່າເກົ່າໃຫ້ແກ່ວິສາຫະກິດທັງໝົດຢູ່ຈີນ.ໃນນັ້ນ,ຮ່າງກົດໝາຍວ່າດ້ວຍສິດຊັບສິນແມ່ນຮ່າງກົດໝາຍທີ່ຖືກພິຈາລະນາຫຼາຍກວ່າໝູ່ໃນປະຫວັດການສ້າງກົດໝາຍຂອງຈີນ.ໃນຂະບວນການດັ່ງກ່າວ,ຄະນະປະຈຳສະພາປະຊາຊົນແຫ່ງຊາດຈີນໄດ້ເຜີຍແຜ່ຮ່າງກົດໝາຍທັງໝົດຕໍ່ທົ່ວສັງຄົມ,ໄດ້ຮັບຄວາມເຫັນ1ໝື່ນກວ່າສະບັບຈາກປະຊາຊົນ.ຄວນເວົ້າວ່າ,ຂະບວນການຈາກການຮ່າງຮອດການຮັບຮອງກົດໝາຍວ່າດ້ວຍສິດຊັບສິນນີ້ເອງ,ກໍໄດ້ສະແດງໃຫ້ເຫັນວ່າລະດັບປະຊາທິປະໄຕຂອງຈີນໄດ້ສູງຂຶ້ນ.
ໃນກອງປະຊຸມສອງສະພາຄັ້ງນີ້,ຜູ້ແທນສະພາປະຊາຊົນແລະກຳມະການສະພາປຶກສາການເມືອງໄດ້ປະກອບຄຳຄິດຄຳເຫັນຕ່າງກັນໂດຍປິ່ນອ້ອມຫຼາຍບັນຫາ,ສະເໜີຍັດຕິທີ່ກ່ຽວກັບເນື້ອໃນດ້ານຕ່າງໆ ຄືການເຮັດໃຫ້ຊາວກະສິກອນມີລາຍໄດ້ເພີ່ມຂຶ້ນ ການຕ້ານການຜູກຂາດ ການຊຸກຍູ້ປະຊາທິປະໄຕໃນຂັ້ນຮາກຖານແລະການກະກຽມງານກິລາໂອລິມປິກປັກກິ່ງເປັນຕົ້ນ.ພາຫະນະເຜີຍແຜ່ທີ່ທັນສະໄໝກໍເຮັດໃຫ້ການມີສ່ວນຮ່ວມແບບປະຊາທິປະໄຕອຸດົມສົມບູນກວ່າເກົ່າ,ຜູ້ແທນສະພາປະຊາຊົນແລະກຳມະການສະພາປຶກສາການເມືອງໄດ້ທ້ອນໂຮມປະຊາມະຕິຢູ່ເທິງອິນເຕີເນັດ,ຊາວອິນເຕີເນັດໄດ້ຖາມບັນຫາ1ແສນ2ໝື່ນຂໍ້ຕໍ່ນາຍົກລັດຖະມົນຕີ.
ຜູ້ແທນສະພາປະຊາຊົນແລະກຳມະການສະພາປຶກສາການເມືອງກໍໄດ້ຕິຕຽນບາງພາກສ່ວນລັດຖະບານແລະບາງອົງການປົກຄອງທ້ອງຖິ່ນເຮັດວຽກບໍ່ດີພໍ,ບັງຄັບໃຫ້ເຈົ້າໜ້າທີ່ຊັ້ນສູງຫຼາຍຄົນສະແດງຄວາມຂໍອະໄພຫຼືຮັບສາລະພາບຜິດຕໍ່ປະຊາຊົນຢ່າງເປີດເຜີຍຍ້ອນຂໍ້ຂາດຕົກບົກຜ່ອງແລະຄວາມບໍ່ດີພໍໃນວຽກງານຂອງຕົນ.ທັງໝົດເຫຼົ່ານີ້ລ້ວນແຕ່ສະແດງໃຫ້ເຫັນວ່າ,ກອງປະຊຸມສອງສະພານັບມື້ນັບສົມບູນຂຶ້ນ,ແລະຊຸກຍູ້ການເມືອງປະຊາທິປະໄຕທີ່ມີສີສັນພິເສດຂອງຈີນກ້າວໄປໜ້າຢ່າງໝັ້ນທ່ຽງ.
|
