|
ຕາມຂ່າວສານຊິນຮວາ,ວັນທີ20ມີນານີ້,ຢູ່ທີ່ປັກກິ່ງ,ທ່ານຊາວກ່າງສວນ ລັດຖະມົນຕີວ່າການກະຊວງປ້ອງກັນປະເທດຈີນໄດ້ພົບປະເຈລະຈາກັບທ່ານດວງໃຈພິຈິດ ຮອງນາຍົກລັດຖະມົນຕີທັງເປັນລັດຖະມົນວ່າການກະຊວງປ້ອງກັນປະເທດລາວທີ່ມາຢ້ຽມຢາມ,ທ່ານທັງສອງໄດ້ແລກປ່ຽນຄວາມເຫັນກ່ຽວກັບສະພາບຄວາມປອດໄພຂອງສາກົນແລະພາກພື້ນ,ການພົວພັນລະຫວ່າງສອງກອງທັບແລະບັນຫາອື່ນໆທີ່ຕ່າງໃຫ້ຄວາມສົນໃຈນຳກັນ.
ທ່ານຊາວກ່າງສວນກ່າວວ່າ,ຈີນລາວແມ່ນປະເທດໃກ້ຄຽງທີ່ມີໄມຕີຈິດຕໍ່ກັນແລະມີພູຜາແມ່ນ້ຳຕິດຈອດກັນ.ການພົວພັນລະຫວ່າງສອງປະເທດທີ່ໄວ້ເນື້ອເຊື່ອໃຈກັນ ປະຕິບັດຕໍ່ກັນຢ່າງສະເໝີພາບ,ສະໜັບສະໜູນເຊິ່ງກັນແລະກັນ,ແລະຮ່ວມມືກັນດ້ວຍຄວາມຈິງໃຈນັ້ນໄດ້ຂະຫຍາຍຕົວຢ່າງຮອບດ້ານ,ການຮ່ວມມືຢ່າງມີໄມຕີຈິດໃນຂົງເຂດຕ່າງໆໄດ້ຮັບໝາກຜົນຢ່າງເດັ່ນຊັດ.ການພົວພັນໄມຕີຈິດລະຫວ່າງສອງກອງທັບກໍໄດ້ເພີ່ມທະວີຂຶ້ນຢ່າງບໍ່ຢຸດຢັ້ງ.ຝ່າຍຈີນຍິນດີພ້ອມກັນກັບຝ່າຍລາວຮັກສາແລະເພີ່ມທະວີການໄປມາຫາສູ່ກັນລະຫວ່າງຊັ້ນສູງພ້ອມດ້ວຍການແລກປ່ຽນແລະການຮ່ວມມືດ້ານວິຊາການລະຫວ່າງສອງກອງທັບ.ໃຊ້ການກະທຳຕົວຈິງເພື່ອຊຸກຍູ້ການພົວພັນລະຫວ່າງສອງປະເທດແລະສອງກອງທັບໃຫ້ຂະຫຍາຍຕົວຢ່າງບໍ່ຢຸດຢັ້ງ.
ທ່ານດວງໃຈພິຈິດກ່າວວ່າ,ການຂະຫຍາຍການພົວພັນລະຫວ່າງສອງປະເທດແລະສອງກອງທັບລາວຈີນບໍ່ພຽງແຕ່ສອດຄ່ອງກັບຜົນປະໂຫຍດພື້ນຖານຂອງປະຊາຊົນສອງຊາດເທົ່ານັ້ນ,ຍັງມີຜົນດີຕໍ່ສັນຕິພາບແລະສະຖຽນລະພາບຂອງພາກພື້ນກໍຄືຂອງໂລກອີກດ້ວຍ.ທ່ານຍັງກ່າວຢ້ຳວ່າປະເທດລາວຈະຍຶດໝັ້ນນະໂຍບາຍຈີນດຽວ,ເດັດດ່ຽວສະໜັບສະໜູນພາລະກິດອັນຍິ່ງໃຫຍ່ແຫ່ງການທ້ອນໂຮມປະເທດຊາດເຂົ້າເປັນເອກະພາບກັນຂອງຈີນ.
|
