|
ຕາມຂ່າວCRI:ວັນທີ 20 ເມສານີ້,ພິທີໄຂ"ສັບປະດາໂຄສະນາການປົກປ້ອງສິດຊັບສິນທາງປັນຍາ"ຈີນປີ 2007 ໄດ້ຈັດຂຶ້ນຢູ່ປັກກິ່ງ.ຫົວຂໍ້ຫຼັກຂອງກິດຈະກຳປີນີ້ແມ່ນ"ປົກປ້ອງສິດຊັບສິນທາງປັນຍາ,ຊຸກຍູ້ການພັດທະນາແບບຫົວຄິດປະດິດສ້າງ".
ໃນພິທີໄຂ,ທ່ານຈ່ຽງເຊິ່ງເຫວີຍ ຫົວໜ້າຫ້ອງການປົກປ້ອງສິດຊັບສິນທາງປັນຍາແຫ່ງຊາດຈີນກ່າວວ່າ,ການເພີ່ມທະວີການປົກປ້ອງສິດຊັບສິນທາງປັນຍາແມ່ນການຮັບປະກັນສຳຄັນຂອງການສ້າງປະເທດແບບປະດິດສ້າງຂອງຈີນ,ການໂຄສະນາຄວາມຮູ້ກ່ຽວກັບສິດຊັບສິນທາງປັນຍາໃຫ້ກວ້າງຂວາງນັ້ນແມ່ນວຽກງານພື້ນຖານອັນໜຶ່ງຂອງຈີນໃນການເພີ່ມທະວີການປົກປ້ອງສິດຊັບສິນທາງປັນຍາ.
ກິດຈະກຳເທື່ອນີ້ຈະດຳເນີນໄປຮອດວັນທີ 26 ເມສານີ້.ໃນໄລຍະນີ້,ພະແນກທີ່ກ່ຽວຂ້ອງຂອງຈີນຈະຈັດຕັ້ງກິດຈະກຳຍ່ອຍຕ່າງໆເຊັ່ນການເສັ່ງຄວາມຮູ້ ເວທີປາໄສທຸລະກິດແລະການທຳລາຍຜະລິດຕະພັນທີ່ລ່ວງລະເມີດສິດເປັນຕົ້ນ,ເພື່ອເພີ່ມສະຕິຕໍ່ການປົກປ້ອງສິດຊັບສິນທາງປັນຍາຂອງທົ່ວສັງຄົມຕື່ມອີກ.
ວັນທີ 26 ເມສາແມ່ນວັນສິດຊັບສິນທາງປັນຍາຂອງໂລກ,ແຕ່ປີ 2004 ເປັນຕົ້ນມາ,ແຕ່ລະປີ,ຈີນກໍ່ໄດ້ຈັດສັບປະດາໂຄສະນາກ່ຽວກັບວັນສິດຊັບສິນທາງປັນຍາຂອງໂລກ.
|
