|
|
 |
| (GMT+08:00)
2007-05-02 19:30:42
|
 |
|
ສະພາບຄວາມວຸ້ນວາຍຂອງອີຣັກຈະບໍ່ປ່ຽນແປງຍ້ອນມັສຣີຕາຍ
cri
Author: m
ວັນທີ 1 ພຶດສະພານີ້, ກະຊວງພາຍໃນຂອງອີຣັກປະກາດວ່າ, ມື້ດຽວກັນ, ອາບູ ອັນ ມັສຣີ ຜູ້ຮັບຜິດຊອບອົງການອານເຄດາຢູ່ອີຣັກເຊິ່ງເປັນສາຂາຂອງອົງການອານເຄດາຢູ່ອີຣັກຖືກຍິງຕາຍຢູ່ພາກເໜືອແບັກແດດ. ກ່ຽວກັບເລື່ອງນີ້, ຜູ້ເຫັນໄປໃນແງ່ດີຊີ້ອອກວ່າ, ນີ້ແມ່ນການຫຼົ້ມແຫຼວອີກເທື່ອໜຶ່ງທີ່ອົງການດັ່ງກ່າວປະສົບຫຼັງຈາກຈາຄາວີຜູ້ນຳຂອງເຂົາຖືກຍິງຕາຍໃນປີກາຍນີ້, ຈະບັ່ນທອນຄວາມສາມາດເຄື່ອນໄຫວຂອງອົງການດັ່ງກ່າວຢ່າງຫຼວງຫຼາຍ. ແຕ່ວ່າ, ບຸກຄົນວິເຄາະເຫັນວ່າ, ສະຖານະການຄວາມປອດໄພຂອງອີຣັກບໍ່ຫ່ອນຈະມີການປ່ຽນແປງທາດແທ້ຫຍັງຍ້ອນເລື່ອງນີ້.
ມັສຣີແມ່ນຊາວເອຢິບ, ເມື່ອສົງຄາມອີຣັກເກີດຂຶ້ນແລ້ວ, ເຂົາໄດ້ຕິດຕາມຈາຄາວີເຂົ້າອີຣັກ, ກາຍເປັນຜູ້ຊ່ອຍທີ່ເກັ່ງກວ່າໝູ່ຂອງຈາຄາວີ, ແລະໄດ້ກາຍເປັນຜູ້ນຳຂອງອົງການອານເຄດາຢູ່ອີຣັກຫຼັງຈາກຈາຄາວີຖືກທະຫານອາເມລິກາຖິ້ມລະເບີດຕາຍ. ທະຫານອາເມລິກາປະຈຳອີຣັກເຄີຍໃຫ້ເງິນລາງວັນ 5 ລ້ານໂດລາເພື່ອຈັບມັສຣີ.
ຂ່າວຕາຍຂອງມັສຣີທຳອິດແມ່ນກະຊວງພາຍໃນອີຣັກປະກາດຕໍ່ສື່ມວນຊົນໃນວັນທີ 1 ພຶດສະພານີ້. ຕາມຊາບວ່າ, ມັສຣີແມ່ນຖືກຍິງຕາຍໃນການປະທະກັນພາຍໃນຂອງພວກປະກອບອາວຸດເທື່ອໜຶ່ງ. ແຕ່ທະຫານອາເມລິກາປະຈຳອີຣັກບໍ່ໄດ້ຢືນຢັນວ່າມັສຣີຕາຍແລ້ວ.
ພ້ອມກັນນັ້ນ, ທາງອິນເຕີເນັດໄດ້ປະກົດມີຖະແຫຼງການທີ່ປະກາດໃນນາມ "ປະເທດອິສຣາມອີຣັກ", ຖະແຫຼງການປະຕິເສດບໍ່ຮັບຮອງວ່າມັສຣີຕາຍແລ້ວ. ຖະແຫຼງການກ່າວວ່າ, ປະຈຸບັນ, ມັສຣີແມ່ນປອດໄພແລະມີສຸຂະພາບແຂງແຮງ, ເຂົາຍັງຄົງບັນຊາການຕໍ່ສູ້ຕ້ານສັດຕູຢູ່.
ສິ່ງທີ່ຄວນເວົ້າເຖິງແມ່ນ, ໃນເດືອນຕຸລາປີກາຍນີ້ແລະເດືອນກຸມພາປີນີ້, ລ້ວນແຕ່ເຄີຍມີຂ່າວກ່າວວ່າ, ມັສຣີຖືກຍິງຕາຍແລ້ວ, ແຕ່ຕໍ່ມາ, ທະຫານອາເມລິກາປະຈຳອີຣັກແລະລັດຖະບານອີຣັກລ້ວນແຕ່ປະກາດວ່າ, ມັສຣີຍັງມີຊີວິດຢູ່. ເທື່ອນີ້, ມັສຣີຕາຍແທ້ຫຼືບໍ່, ຍັງບໍ່ທັນຮູ້ແຈ້ງເທື່ອ.
ແຕ່ວ່າ, ນັກວິເຄາະຊີ້ອອກວ່າ, ມັສຣີຕາຍແລ້ວຫຼືບໍ່ນັ້ນມັນບໍ່ສຳຄັນ. ເຖິງແມ່ນວ່າເທື່ອນີ້ລາວຕາຍແລ້ວ, ສະຖານະການຄວາມປອດໄພຂອງອີຣັກທີ່ນັບມື້ນັບຊຸດຮ້າຍລົງກໍ່ບໍ່ຫ່ອນຈະຜ່ອນຍານ.
ກ່ອນອື່ນ, ຄືກັນກັບຈາຄາວີ, ເຖິງວ່າມັສຣີຕາຍແລ້ວ, ກໍ່ບໍ່ໝາຍຄວາມວ່າ "ອົງການອານເຄດາຢູ່ອີຣັກ" ໄດ້ຖືກດັບສູນແລ້ວ, ອົງການນີ້ຈະແຕ່ງຕັ້ງຜູ້ນຳຜູ້ໃໝ່. ກໍ່ຄືທ່ານຣິອັນ ໂຄຼເຄິ ເອກອັກຄະລັດຖະທູດອາເມລິກາປະຈຳອີຣັກເວົ້ານັ້ນວ່າ, ເຖິງວ່າມັສຣີຕາຍແລ້ວ, ການເຄື່ອນໄຫວຂອງອົງການອານເຄດາຢູ່ອີຣັກກໍ່ເດັດຂາດຈະບໍ່ຢຸດຕິລົງ.
ສອງ, ປະຈຸບັນ, ນອກຈາກການເຄື່ອນໄຫວຂອງອົງການຫົວຈັດເຊັ່ນອົງການອານເຄດາຢູ່ອີຣັກໜັກໜ່ວງຂຶ້ນແລ້ວ, ການປະທະກັນລະຫວ່າງຝ່າຍສາສະໜາຕ່າງໆຂອງອີຣັກກໍ່ກຳລັງເລື່ອນຂັ້ນ, ນີ້ແມ່ນປັດໄຈອັນສຳຄັນອີກອັນໜຶ່ງທີ່ເຮັດໃຫ້ສະຖານະການຄວາມປອດໄພຂອງອີຣັກນັບມື້ນັບຊຸດຮ້າຍລົງ. ສະນັ້ນ, ເຖິງວ່າການເຄື່ອນໄຫວຂອງອົງການຫົວຈັດໄດ້ຫຼຸດໜ້ອຍລົງຫຼືຢຸດຕິລົງໃນຊົ່ວຄາວ, ການປະທະກັນລະຫວ່າງຝ່າຍສາສະໜາຕ່າງໆຂອງອີຣັກກໍ່ບໍ່ຫ່ອນຈະສິ້ນສຸດລົງ. ການຕາຍຂອງມັສຣີຈະປ່ຽນແປງສະພາບຕົວຈິງນີ້ບໍ່ໄດ້.
ນອກນັ້ນ, ກອງທະຫານຕ່າງປະເທດປະຈຳຢູ່ອີຣັກແມ່ນສາເຫດອັນສຳຄັນອີກອັນໜຶ່ງຂອງສະພາບຄວາມວຸ້ນວາຍຂອງອີຣັກໃນປະຈຸບັນ, ສະນັ້ນ, ທະແນມແຕ່ທະຫານຕ່າງປະເທດສືບຕໍ່ປະຈຳຢູ່ອີຣັກ, ສະຖານະການຄວາມປອດໄພຂອງອີຣັກກໍ່ບໍ່ຫ່ອນຈະດີຂຶ້ນຢ່າງເດັ່ນຊັດ.
ສາມາດເຫັນໄດ້ວ່າ, ມັສຣີຕາຍແລ້ວຫຼືຍັງມີຊີວິດຢູ່ກໍ່ບໍ່ຫ່ອນຈະກະທົບກະເທືອນເຖິງສະພາບການໃຫຍ່ຂອງອີຣັກ, ສະຖານະການຄວາມປອດໄພຂອງອີຣັກຍັງເຫັນໄປໃນແງ່ດີບໍ່ໄດ້.
|
|
|
