|
ໄຂ້ຫວັດສັດປີກຕາມຂ່າວCRI:ຫວ່າງມໍ່ໆນີ້,ທະນາຄານໂລກກັບຈີນໄດ້ເລີ່ມຮ່ວມມືກັນດຳເນີນໂຄງການ "ຈີນບຳລຸງສ້າງຄວາມສາມາດປ້ອງກັນຄວບຄຸມພະຍາດໄຂ້ຫວັດສັດປີກ",ໂດຍມີຈຸດປະ ສົງເພີ່ມທະວີການສ້າງຄວາມສາມາດຂອງຈີນໃນການປ້ອງກັນຄວບຄຸມໄຂ້ຫວັດສັດປີກແລະການແຜ່ລະບາດຢ່າງຂະໜາດໃຫຍ່ຂອງໄຂ້ຫວັດໃຫຍ່ມະນຸດທີ່ອາດຈະເກີດຂຶ້ນ ຍ້ອນໄຂ້ຫວັດສັດປີກ.ນີ້ກໍແມ່ນເທື່ອທຳອິດທີ່ທະນາຄານໂລກແລະຈີນດຳເນີນໂຄງການຮ່ວມມືກັນໃນດ້ານນີ້.
ການປະຕິບັດໂຄງການດັ່ງກ່າວເປັນໄລຍະສອງປີ,ຈະໃຊ້ງົບປະມານຈຳນວນ2ລ້ານກວ່າໂດລາທີ່ທະນາຄານໂລກຊ່ອຍເຫຼືອ,ດຳເນີນການຄົ້ນຄວ້າແລະອົບຮົມຢູ່10ເມືອງໃນແຂວງລຽວນີງແລະແຂວງອ່ານຮຸ່ຍຂອງຈີນ,ເພື່ອປັບປຸງນະໂຍບາຍປ້ອງກັນແລະຄວບຄຸມພະຍາດໄຂ້ຫວັດສັດປີກຂອງຈີນໃຫ້ສົມບູນຂຶ້ນ,ແລະເສີມສ້າງຄວາມສາມາດຂອງພະແນກກະສິກຳແລະສາທາລະນະສຸກຂັ້ນຮາກຖານໃນການຄົ້ນພົບ ບົ່ງມະຕິ ລາຍງານແລະຮັບມືກັບພະຍາດໄຂ້ຫວັດສັດປີກແລະການຕິດແປດໃສ່ມະນຸດ.
ໃນພິທີໄຂໂຄງການ,ທ່ານນາງລິວສຽວຢຸນ ຮອງຫົວໜ້າພະແນກຈີນຂອງທະນາຄານໂລກກ່າວວ່າ:"ຈີນໄດ້ລ້ຽງໄກ່25%ແລະເປັດ65%ຂອງໄກ່ເປັດທີ່ລ້ຽງໃນໂລກ,ໃນນັ້ນມີຫຼາຍກວ່າ60%ແມ່ນລ້ຽງປ່ອຍ;ຈີນມີປະຊາກອນຫຼາຍກວ່າໝູ່ໃນໂລກ;ແລະໃນເສັ້ນທາງທີ່ນົກຍ້າຍຖິ່ນ8ເສັ້ນທີ່ສຳຄັນໃນໂລກ,ມີ3ເສັ້ນຕ້ອງຜ່ານຈີນ;ລະດັບການບໍລິການປິ່ນປົວພະ ຍາດຂອງຈີນຍັງຕ້ອງຍົກໃຫ້ສູງຂຶ້ນ."
ຕາມສະຖິຕິ,ແລ້ວແຕ່ຕົ້ນປີ2004ຮອດທ້າຍປີ2006,ເຂດໃນຈີນໄດ້ເກີດພະຍາດໄຂ້ຫວັດສັດປີກ91ເທື່ອ,ມີສັດປີກທີ່ລ້ຽງຕາມບ້ານເກືອບ4ແສນໂຕເປັນພະຍາດ.ນອກນີ້,ຮອດເດືອນເມສາປີ2007,ຈີນໄດ້ບົ່ງມະຕິມີ23ຄົນຕິດພະຍາດໄຂ້ຫວັດສັດປີກ,ແຈກຢາຍຢູ່ຕາມ12ຕົວເມືອງແລະແຂວງ,ເຊັ່ນແຂວງຫູນານ ແຂວງອ່ານຮຸ່ຍແລະແຂວງລິວນີງເປັນ ຕົ້ນ.
ໂດຍປະເຊີນກັບການຂົ່ມຂູ່ຂອງພະຍາດໄຂ້ຫວັດສັດປີກ,ຈີນໄດ້ດຳເນີນວຽກງານສັກຢາວັກແຊງໃຫ້ສັດປີກແບບລວມສູນ,ປ້ອງກັນແລະຄວບຄຸມພະຍາດຢູ່ຊາຍແດນ,ທ້ອງຖິ່ນຕ່າງໆກໍໄດ້ໃຊ້ມາດຕະການຕ່າງໆເຊັ່ນວາງແຜນລ່ວງໜ້າເພື່ອປ້ອງກັນຄວບຄຸມບໍ່ໃຫ້ຄົນແລະສັດຕິດແປດພະຍາດໄຂ້ຫວັດສັດປີກ.ມາດຕະການເຫຼົ່ານີ້ບໍ່ພຽງແຕ່ມີຜົນດີຕໍ່ຈີນໃນການປ້ອງກັນແລະຄວບຄຸມພະຍາດຢູ່ປະເທດຕົນເທົ່ານັ້ນ,ຍັງໄດ້ສະໜອງຂໍ້ມູນທີ່ມີຜົນດີໃຫ້ແກ່ປະເທດຕ່າງໆໃນໂລກນຳອີກ.
ແຕ່ຜູ່ຊ່ຽວຊານຊີ້ອອກວ່າ,ອົງການປົກຄອງຮາກຖານຂອງຈີນຍັງຕ້ອງການການສະໜັບສະໜູນດ້ານການເງິນແລະເຕັກນິກເພື່ອເພີ່ມຄວາມສາມາດຕິດຕາມກວດກາແລະກອບກູ້ປິ່ນປົວສັດແລະຄົນທີ່ຕິດພະຍາດໄຂ້ຫວັດສັດປີກ.ຈີນໄດ້ຮ່ວມກັບອົງການອາຫານແລະກະເສດຂອງສະຫະປະຊາຊາດຫຼືຟາວດຳເນີນໂຄງການຮ່ວມມືເຕັກນິກໂດຍດ່ວນເພື່ອຊ່ວຍເຫຼືອຈີນດຳເນີນການແລກປ່ຽນ ຜູ່ຊ່ຽວຊານແລະອົບຮົມພະນັກງານປິ່ນປົວພະຍາດໄຂ້ຫວັດສັດປີກ.
ຕາມແຜນການແລ້ວ,ໂຄງການຮ່ວມມືລະຫວ່າງທະນາຄານໂລກກັບຈີນເທື່ອນີ້ຈະໃຫ້ກະຊວງກະສິກຳແລະກະຊວງສາທາລະນະສຸກຂອງຈີນເປັນຜູ່ຮັບຜິດຊອບປະຕິບັດຕົວຈິງ.ທ່ານລີ້ຈ້ຽນກົວະ ຮອງຫົວໜ້າຫ້ອງການຮັບມືເຫດການສາທາລະນະສຸກສຸກເສີນຂອງກະຊວງສາທາລະນະສຸກຈີນບອກວ່າ"ພວກຂ້າພະເຈົ້າຈະເພີ່ມການແລກປ່ຽນຂໍ້ມູນຂ່າວສານແລະເຕັກນິກປ້ອງກັນຄວບຄຸມໄຂ້ຫວັດສັດປີກກັບອົງການອະນາໄມໂລກແລະປະຊາຄົມໂລກ.ສ້າງກົນໄກຮ່ວມມືທີ່ດີ,ກະຊວງສາທາລະນະສຸກແລະກະຊວງກະສິກຳຈະຈັດການຟຶກຊ້ອມປະສົມແລະຕິດຕາມຊີ້ນຳຮ່ວມ,ເພື່ອຕິດຕາມກວດກາແລະປະເມີນສະພາບການປະຕິບັດໂຄງການຮ່ວມມືຢ່າງເປັນປະຈຳ.ພ້ອມກັນນັ້ນ,ກໍ່ຈະບູລະນະກົນໄກຊົມໃຊ້ຂໍ້ມູນຂ່າວສານຮ່ວມກັນໃຫ້ສົມບູນຂຶ້ນ,ເພື່ອໃຫ້ສອງກະຊວງດັ່ງກ່າວຮ່ວມກັນຊົມໃຊ້ຂໍ້ມູນຕົວເລກກ່ຽວກັບການຕິດຕາມກວດກາສະພາບພະຍາດໄຂ້ຫວັດສັດປີກແລະຕົວຢ່າງຕິດແປດພະຍາດໄຂ້ຫວັດສັດປີກໃຫ້ມີປະສິດທິພາບກວ່າເກົ່າ "
|
