|
|
 |
| (GMT+08:00)
2007-06-21 17:49:55
|
 |
|
ຮົງກົງກັບຄືນສູ່ປະເທດຊາດ 10 ປີ ເສດຖະກິດພັດທະນາເປັນຢ່າງດີ
cri
Author: cai
ໃນຖານະທີ່ເປັນສູນກາງການເງິນ ການຄ້າແລະການຂົນສົ່ງທາງທະເລທີ່ສຳຄັນໃນພາກພື້ນອາຊີປາຊີຟິກ,ນັບແຕ່ຮົງກົງກັບຄືນສູ່ປະເທດຊາດເປັນເວລາ 10 ປີມານີ້,ການພັດທະນາຂອງເສດຖະກິດແຫ່ງນີ້ແມ່ນຈຸດສຸມທີ່ຄົນທັງຫຼາຍສົນໃຈຕະຫຼອດມາ.ກ່ຽວກັບເລື່ອງນີ້,ນັກຂ່າວວິທະຍຸ CRI ໄດ້ສຳພາດທ່ານຖາງອີງນຽນ ຫົວໜ້າພະແນກການເງິນເຂດບໍລິຫານພິເສດຮົງກົງ.
ທ່ານຖາງອີງນຽນບອກນັກຂ່າວວ່າ,ພາຍຫຼັງຮົງກົງກັບຄືນສູ່ປະເທດຊາດເມື່ອປີ 1997 ແລ້ວ,ລັດຖະບານສູນກາງໄດ້ສະໜັບສະໜູນຢ່າງສຸດຂີດ,ປະຊາຊົນຮົງກົງໄດ້ພະຍາຍາມພ້ອມກັນ,ແລະຍັງມີພີ່ນ້ອງຮ່ວມຊາດ 1 ຕື້ 300 ລ້ານຄົນເອົາໃຈໃສ່ແລະຊ່ວຍເຫຼືອ,ໃນຫຼາຍປີມານີ້,ເສດຖະກິດຂອງຮົງກົງໄດ້ຟື້ນຟູຢ່າງຮອບດ້ານ.
"ໃນ 3 ປີທີ່ຜ່ານມາ,ເສດຖະກິດໄດ້ເຕີບໂຕສະເລ່ຍ 7,6% ຕໍ່ປີ,ນີ້ເວົ້າສຳລັບການເຕີບໂຕດ້ານເສດຖະກິດແລ້ວແມ່ນຫາຍາກທີ່ສຸດ.ໃນເວລາຂ້າພະເຈົ້າດຳລົງຕຳແໜ່ງຫົວໜ້າພະແນກການເງິນເມື່ອເດືອນສິງຫາປີ 2003,ອັດຕາຫວ່າງງານແມ່ນ 8,6%,ຊຶ່ງເປັນສະຖິຕິສູງສຸດໃນປະຫວັດສາດ,ຫວ່າງມໍ່ໆນີ້,ໄດ້ຫຼຸດລົງເຫຼືອແຕ່ 4,3%,ແມ່ນສະຖິຕິຕ່ຳສຸດໃນ 5 ປີມານີ້,ສະນັ້ນ,ໃນຫຼາຍດ້ານກໍ່ໄດ້ມີການເຕີບໂຕຫຼາຍສົມຄວນ."
ແຕ່ວ່າ,ໄລຍະທາງຂອງຮົງກົງໃນ 10 ປີມານີ້ບໍ່ແມ່ນທຳມະດາ,ໃນໄລຍະນີ້ໄດ້ປະສົບກັບການທ້າທາຍບໍ່ໜ້ອຍ.ທ່ານຖາງອີງນຽນກ່າວວ່າ,ໃນ 10 ປີມານີ້,ການທ້າທາຍໃຫຍ່ກວ່າໝູ່ທາງເສດຖະກິດທີ່ຮົງກົງໄດ້ປະສົບນັ້ນກໍ່ແມ່ນວິກິດການການເງິນຂອງອາຊີ.ໃຕ້ຄວາມກົດດັນອັນມະຫາສານ,ລະບົບເສດຖະກິດຂອງຮົງກົງບໍ່ໄດ້ພັງທະລາຍ,ແລະກໍ່ບໍ່ມີທະນາຄານໃດລົ້ມລະລາຍ.ໃນໄລຍະນີ້,ນອກຈາກຄວາມພະຍາຍາມຂອງອົງການປົກຄອງເຂດບໍລິຫານພິເສດຮົງກົງເອງແລ້ວ,ທ່ານຖາງອີງນຽນໄດ້ກ່າວເຖິງການສະໜັບສະໜູນຂອງລັດຖະບານສູນກາງເປັນພິເສດ.ໂດຍສະເພາະແມ່ນໃນເດືອນມິຖຸນາປີ 2003,ພະຍາດອັກເສບປອດຮຸນແຮງຫຼືຊາສ໌ຫາກໍ່ຜ່ານໄປ,ໃນເວລາເສດຖະກິດຮົງກົງປະສົບຄວາມຫຍຸ້ງຍາກນັ້ນ,ລັດຖະບານສູນກາງກັບອົງການປົກຄອງເຂດບໍລິຫານພິເສດຮົງກົງກໍ່ໄດ້ເຊັນເອກະສານ CEPA ຫຼື"ການຈັດວາງກ່ຽວກັບການສ້າງການພົວພັນເສດຖະກິດການຄ້າທີ່ແໜ້ນແຟ້ນກວ່າເກົ່າລະຫວ່າງແຜ່ນດິນໃຫຍ່ຈີນກັບຮົງກົງ".ຖືວ່າແຜ່ນດິນໃຫຍ່ຈີນກັບຮົງກົງໄດ້ສ້າງການພົວພັນການຄ້າເສລີຢ່າງເປັນທາງການ,ນີ້ກໍ່ເປັນຂີດໝາຍສະແດງໃຫ້ເຫັນວ່າ,ການແລກປ່ຽນແລະການຮ່ວມມືດ້ານເສດຖະກິດການຄ້າລະຫວ່າງແຜ່ນດິນໃຫຍ່ຈີນກັບຮົງກົງແລະມາກາວຂອງຈີນໄດ້ກ້າວເຂົ້າສູ່ໄລຍະປະຫວັດສາດໃໝ່ແລ້ວ.ຕໍ່ເລື່ອງນີ້,ທ່ານຖາງອີງນຽນມີຄວາມຮູ້ສຶກຢ່າງເລິກເຊິ່ງ.ທ່ານກ່າວວ່າ:
"ເມື່ອມີການຈັດວາງແນວນີ້ແລ້ວ,ພວກເຮົາສາມາດຊຸກຍູ້ນັກທ່ອງທ່ຽວຂອງແຜ່ນດິນໃຫຍ່ໄປທ່ຽວຮົງກົງ,ມາຜູ້ດຽວກໍ່ໄດ້,ນີ້ໄດ້ຊຸກຍູ້ການຄ້າເສລີເຊິ່ງກັນແລະກັນ."
ຫຼາຍຄົນຍັງໄດ້ສົນໃຈວ່າ,ໃນ 3 ປີມານີ້,ອັດຕາເຕີບໂຕຂອງຮົງກົງໄດ້ມີທ່າອ່ຽງຫຼຸດລົງໜ້ອຍໜຶ່ງ,ນີ້ໝາຍຄວາມວ່າເສດຖະກິດຂອງຮົງກົງບໍ່ແຂງແຮງບໍ່?ທ່ານຖາງອີງນຽນເຫັນວ່າ,ບໍ່ຈຳເປັນມີຄວາມເປັນຫ່ວງຄືແນວນັ້ນເລີຍ.
"ການເຕີບໂຕໄວເປັນເວລາຍາວນານເວົ້າສຳລັບລະບົບເສດຖະກິດທີ່ເປັນເສດຖະກິດຕະຫຼາດແລ້ວ,ມັນອາດຈະນຳເອົາຄວາມກົດດັນອື່ນໆຈຳນວນໜຶ່ງມາໃຫ້,ສຳຄັນແມ່ນຄວາມກົດດັນດ້ານໄພເງິນເຟີ້.ສະນັ້ນ,ຂ້າພະເຈົ້າກໍ່ບໍ່ຢາກໃຫ້ພວກເຮົາສາມາດຮັກສາການເຕີບໂຕໄວຢ່າງຍາວນານ."
ທ່ານຖາງອີງນຽນຍັງກ່າວວ່າ,ການເຮັດແນວໃດເພື່ອຮັກສາໃຫ້ເສດຖະກິດຂອງຮົງກົງພັດທະນາແບບຍືນຍົງຢ່າງຍາວນານຈຶ່ງແມ່ນຂໍກະແຈທີ່ສຳຄັນທີ່ສຸດ.ດ້ວຍເຫດນີ້,ຮົງກົງຍັງຕ້ອງວາງແຜນໄລຍະຍາວບາງຢ່າງ. ໃນຂະນະທີ່ປະສານສົມທົບກັບປະເທດຊາດໃຫ້ດີກວ່າເກົ່ານັ້ນ,ກໍ່ຍັງຕ້ອງນຳໃຊ້ທ່າແຮງຂອງຮົງກົງທີ່ອວ່າຍໜ້າໄປສູ່ທົ່ວໂລກ,ນຳໃຊ້ນັກວິຊາການທີ່ດີເລີດຂອງແຜ່ນດິນໃຫຍ່ໃຫ້ດີກວ່າເກົ່າ,ໃຫ້ແຜ່ນດິນໃຫຍ່ແລະຮົງກົງຊົມໃຊ້ທ່າແຮງຮ່ວມກັນແລະຕ່າງຝ່າຍຕ່າງມີຜົນປະໂຫຍດ.
|
|
|
