|
|
 |
| (GMT+08:00)
2007-06-21 17:52:13
|
 |
|
ລັດຖະມົນຕີຊ່ອຍວ່າການກະຊວງການຕ່າງປະເທດອາເມລິກາເດີນທາງໄປຢ້ຽມຢາມສ.ປ.ປ.ເກົາຫຼີ
cri
Author: sayvanny
ຕາມຂ່າວ CRI : ວັນທີ 21 ມິຖຸນານີ້, ທ່ານຄຼິສໂຕເຟິ ຮີວ ລັດຖະມົນຕີຊ່ອຍວ່າການກະຊວງການຕ່າງປະເທດອາເມລິກາຫົວໜ້າຄະນະຜູ້ແທນອາເມລິກາທີ່ເຂົ້າຮ່ວມການເຈລະຈາຫົກຝ່າຍບັນຫານີວເຄຼຍແຫຼມເກົາຫຼີໄດ້ໄປຮອດນະຄອນຫລວງພຽງຢາງໂດຍຍົນພິເສດ, ເລີ່ມຢ້ຽມ ຢາມສ.ປ.ປ. ເກົາຫຼີ. ທ່ານຮີວແມ່ນເຈົ້າໜ້າທີ່ຊັ້ນສູງຜູ້ທຳອິດຂອງກະຊວງການຕ່າງປະເທດອາເມລິກາທີ່ໄປຢ້ຽມສ.ປ.ປ.ເກົາຫຼີແຕ່ເດືອນຕຸລາປີ 2002 ມານີ້.
ຢູ່ເດີ່ນບິນ, ທ່ານຮີວກ່າວວ່າ, ເທື່ອນີ້ທ່ານແມ່ນມາຢ້ຽມຢາມສປປເກົາຫລີຕາມຄຳເຊີນ. ໃນໄລຍະຢ້ຽມຢາມ, ທ່ານຈະປຶກສາຫາລືບັນຫາຊຸກຍູ້ຂະບວນວິວັດຂອງການເຈລະຈາຫົກຝ່າຍກັບບຸກຄົນສຳຄັນສ.ປ.ປ.ເກົາຫຼີ.
ກ່ອນນີ້, ວັນທີ 20 ມິຖຸນານີ້,ຢູ່ໂຕກຽວ, ທ່ານຮິວກ່າວວ່າ, ການເຈລະຈາຫົກຝ່າຍບັນຫານິວເຄຼຍແຫລມເກົາຫລີອາດຈະຈັດຄືນໃໝ່ໃນຕົ້ນເດືອນຫນ້າ.ຝ່າຍອາເມລິກາຈະປຶກສາຫາລືກັບຝ່າຍຈີນຢ່າງໃກ້ຊິດກ່ຽວກັບວັນຈັດການເຈລະຈາ 6 ຝາຍຄືນໃຫມ່.
ຂ່າວແຈ້ງອີກວ່າ, ຕອນເຊົ້າວັນທີ 21 ມິຖຸນາ , ທ່ານຢ່າງເຈຊື ລັດຖະມົນຕີວ່າການກະຊວງການຕ່າງປະເທດຈີນກໍ່ໄດ້ໂທລະສັບລົມກັບ ລັດຖະມົນຕີວ່າການກະຊວງການຕ່າງປະເທດແລະການຄ້າສາທາລະນະເກົາຫຼີ. ທ່ານຢາງເຈຊືກ່າວວ່າ, ຫວັງວ່າ, ຝ່າຍຕ່າງໆທີ່ກ່ຽວຂ້ອງຄົງຈະສືບຕໍ່ນຳໃຊ້ບາດກ້າວອັນຕັ້ງໜ້າ, ຊຸກຍູ້ການເຈລະຈາຫົກຝ່າຍແລະຂະບວນວິວັດເຮັດໃຫ້ແຫຼມເກົາຫຼີປອດນິວເຄຼຍ.
|
|
|
