|
|
 |
| (GMT+08:00)
2007-06-28 12:20:46
|
 |
|
ສີ່ຝ່າຍທີ່ກ່ຽວຂ້ອງຂອງບັນຫາຕາເວັນອອກກາງແຕ່ງຕັ້ງທ່ານໂທນີ ແບຼເປັນທູດພິເສດບັນຫາຕາເວັນອອກກາງ
cri
Author: shuo
ຕາມຂ່າວCRI:ວັນທີ27ມິຖຸນານີ້,ຢູ່ສຳນັກງານໃຫຍ່ສະຫະປະຊາຊາດທີ່ນິວຢອກ,ສີ່ຝ່າຍທີ່ກ່ຽວຂ້ອງຂອງບັນຫາຕາເວັນອອກກາງ ຄື ສະຫະປະຊາຊາດ ສະຫະພາບເອີລົບ ອາເມ ລິກາແລະຣັດເຊຍອອກຖະແຫຼງການ,ປະກາດແຕ່ງຕັ້ງທ່ານໂທນີ ແບຼ ອະດີດນາຍົກລັດຖະມົນຕີອັງກິດເປັນທູດພິເສດຂອງບັນຫາຕາເວັນອອກກາງ.
ຖະແຫຼງການຂຽນວ່າ,ໃນຖານະເປັນທູດພິເສດ,ໜ້າທີ່ຕຳແໜ່ງຂອງທ່ານແບຼຈະລວມທັງ:ຮ່ວມມືຢ່າງແໜ້ນແຟ້ນກັບປະເທດບໍລິຈາກແລະອົງການທີ່ກ່ຽວຂ້ອງ,ສະແຫວງຫາການຊ່ວຍເຫຼືອຈາກສາກົນໃຫ້ປະຊາຊົນປາເລັດສະຕິນ;ສະແຫວງຫາການສະໜັບສະໜູນຈາກສາກົນເພື່ອຊ່ວຍລັດຖະບານປາເລັດສະຕິນເພີ່ມທະວີການປົກຄອງປະເທດໂດຍສະເພາະແມ່ນການສ້າງສາການປົກຄອງຕາມກົດໝາຍ;ວາງແຜນການຊຸກຍູ້ການພັດທະນາເສດຖະກິດຂອງປາເລັດສະຕິນ;ຕິດຕໍ່ພົວພັນກັບປະເທດທີ່ກ່ຽວຂ້ອງ,ຊ່ວຍບັນລຸເປົ້າໝາຍທີ່ວາງໂດຍສີ່ຝ່າຍທີ່ກ່ຽວຂ້ອງຂອງບັນຫາຕາເວັນອອກກາງ.
ໃນມື້ດຽວກັນ,ທ່ານເອຮຸດ ໂອນເມີດ ນາຍົກລັດຖະມົນຕີອິດສະລະແອນກ່າວວ່າ,ທ່ານແບຼຈະຊ່ວຍປາເລັດສະຕິນສ້າງຮາກຖານຂອງການສ້າງຕັ້ງປະເທດ,ອິດສະລະແອນຈະສະໜອງການຊ່ວຍເຫຼືອທຸກຢ່າງຕາມຄວາມສາມາດ.ທ່ານມາຣມຸດ ອາບາສ ປະທານອົງການອຳນາດແຫ່ງຊາດປາເລັດສະຕິນກ່າວວ່າ,ຈະຮ່ວມມືກັບທ່ານແບຼເພື່ອໃຫ້ຕາເວັນອອກກາງບັນລຸສັນຕິພາບ.ແຕ່ຂະບວນການອິສລາມຕໍ່ຕ້ານຂອງປາເລັດສະຕິນ ຄື ອົງການຮາມາສພັດກ່າວປະນາມທ່ານແບຼເຂົ້າຂ້າງອິດສະລະແອນໂດຍຕະຫຼອດ,ສະນັ້ນຈຶ່ງ ປະຕິເສດບໍ່ຮັບເອົາເຂົາເປັນທູດພິເສດບັນຫາຕາເວັນອອກກາງ.
ໃນມື້ດຽວກັນ,ທ່ານບຸສ ປະທານາທິບໍດີອາເມລິກາສະແດງຄວາມຊົມເຊີຍຕໍ່ທ່ານແບຼຖືກແຕ່ງຕັ້ງເປັນທູດພິເສດບັນຫາຕາເວັນອອກກາງ.
|
|
|
