ຕາມຂ່າວCRI:ວິກິດການທາງດ້ານການເງິນທີ່ເກີດຂຶ້ນຢູ່ອາຊີເມື່ອປີ1997ເຮັດໃຫ້ເສດຖະກິດອາຊີຖືກກະທົບຢ່າງຮ້າຍແຮງ.ໃນໂອກາດທີ່ວິກິດການທາງດ້ນການເງິນອາຊີເກີດຂຶ້ນຄົບຮອບ10ປີ,ນັກເສດຖະສາດຫຼາຍທ່ານຂອງປະເທດອາຊີຫຼືອົງການສາກົນໄດ້ຕອບສຳພາດຂອງນັກຂ່າວວິທະຍຸພວກເຮົາ,ຕີລາຄາສູງຕໍ່ຈີນທີ່ໄດ້ມີບົດບາດອັນສຳຄັນໃນການແກ້ໄຂຄວາມຫຍຸ້ງຍາກໃນວິກິດການທາງດ້ານການເງິນອາຊີ.ຕໍ່ໄປເຊີນຟັງບົດແຈ້ງຂ່າວຂອງນັກຂ່າວວິທະຍຸCRIທີ່ປະຈຳຢູ່ຕ່າງປະເທດ.
ໃນເວລາກ່າວເຖິງບົດບາດຂອງຈີນໃນວິກິດການທາງດ້ານການເງິນອາຊີ,ທ່ານສົມພົບ ມະນາຣັງສານ ຮອງສາດສະດາຈານພະແນກເສດຖະສາດຂອງມະຫາວິທະຍາໄລຈຸລາລົງກອນໄທຊີ້ອອກວ່າ,ຈີນໄດ້ເຮັດໃຫ້ສະຖານະການບໍ່ຊຸດຮ້າຍລົງຕື່ມອີກ.ທ່ານເວົ້າວ່າ:"ກໍຄືສິ່ງທີ່ຮູ້ໂດຍທົ່ວໄປ,ບົດບາດອັນສຳຄັນອັນໜຶ່ງຂອງຈີນແມ່ນບໍ່ປ່ຽນແປງລາຄາຂອງເງິນຢວນ,ອັນນີ້ໄດ້ຊ່ວຍຮັກສາຄວາມໝັ້ນທ່ຽງຂອງເສດຖະກິດໂລກ.ຄົນທັງຫຼາຍຮັບຮູ້ໂດຍທົ່ວໄປວ່າ,ຖ້າວ່າໃນຄາວນັ້ນອັດຕາແລກປ່ຽນເງິນຢວນຈີນປ່ຽນແປງຢ່າງໃຫຍ່,ເສດຖະ ກິດໂລກ ໂດຍສະເພາະແມ່ນເສດຖະກິດອາຊີຍ່ອມຈະຖືກກະທົບຢ່າງຮ້າຍແຮງຂຶ້ນຕື່ມ."
ທ່ານໂກບາຢາຊິ ເຄອິອິຊີໂຣ ນັກຄົ້ນຄວ້າຜູ່ທີໜຶ່ງຂອງສະຖາບັນຄົ້ນຄວ້າເສດຖະກິດແລະອຸດສາຫະກຳຍີ່ປຸ່ນເຫັນວ່າ:"ໃນຄາວນັ້ນ,ລັດຖະບານຈີນໄດ້ຖະແຫຼງວ່າຈະບໍ່ຫຼຸດຄ່າເງິນຢວນ,ສະນັ້ນ,ນັກລົງທຶນຈຳນວນໜຶ່ງຂອງເອີລົບແລະອາເມລິກາຈິ່ງຮູ້ສຶກໄວ້ວາງໃຈ,ໄດ້ຄວບຄຸມບໍ່ໃຫ້ເງິນຕາຂອງທົ່ວພາກພື້ນອາຊີໄຫຼໄປສູ່ພາຍນອກຕື່ມອີກ.ຊຶ່ງມີຜົນດີທີ່ສຸດສຳລັບການປ້ອງກັນບໍ່ໃຫ້ວິກິດການທາງດ້ານການເງິນຂອງອາຊີແຜ່ລາມຕື່ມອີກ."
ທ່ານຫວງຮ້ານມິງ ຫົວໜ້ານັກຄົ້ນຄວ້າຂອງສະຖາບັນຄົ້ນຄວ້າອາຊີຕາເວັນອອກຂອງມະຫາວິທະຍາໄລແຫ່ງຊາດສິງກະໂປກໍເຫັນວ່າ,ຈີນໄດ້ເປັນເຈົ້າການທີ່ມີຜົນດີທີ່ສຸດໃນເວລາອາຊີເກີດວິກິດການທາງດ້ານການເງິນ.
"ຂ້າພະເຈົ້າເຫັນວ່າ,ປີ1998ໄດ້ກາຍເປັນຈຸດສູງສຸດຂອງວິກິດການ,ໃນຄາວນັ້ນ, ໂດລາຮົງກົງຖືກກະທົບໜັກ,ໂດລາສິງກະໂປແລະເງິນໄຕ້ຫວັນກໍຖືກກະທົບກະເທືອນເຊັ່ນດຽວກັນ.ຖ້າເງິນຢວນຂອງຈີນຫຼຸດລາຄາກໍຈະສ້າງຄວາມວຸ້ນວາຍ,ສະພາບວິກິດການຍິ່ງຈະໜັກໜ່ວງກວ່າເກົ່າ.ສະນັ້ນ,ມີນັກວິຊາການກ່າວວ່າ,ໃນວິກິດການທາງດ້ານການເງິນ,ຈີນໄດ້ເປັນເຈົ້າການດີທີ່ສຸດ."
ທ່ານກາຊີມາຕິນ ນັກເສດຖະສາດຜູ່ທີໜຶ່ງຂອງທະນາຄານໂລກປະຈຳພາກພື້ນອາຊີຕາເວັນອອກສຽງໃຕ້ໄດ້ເວົ້າເຖິງບົດບາດຂອງຈີນໃນວິກິດການທາງດ້ານການເງິນອາຊີວ່າ"ແມ່ນອຸທິດທີ່ມີລັກສະນະສະໜັບສະໜູນ"
ທ່ານກ່າວວ່າ, ຂ້າພະເຈົ້າເຫັນວ່າໃນ10ປີກ່ອນຈີນໄດ້ຊ່ອຍເຫຼືອປະເທດອາຊີອາຄະເນຫຼາຍທີ່ສຸດ. ໃນຄາວນັ້ນເງິນຕາຂອງປະເທດອ້ອມຂ້າງພາກັນຫຼຸດລາຄາ, ແຕ່ຈີນໄດ້ຍຶດໝັ້ນບໍ່ໃຫ້ເງິນຢວນຈີນຫຼຸດລາຄາ ນີ້ມິຄວາມສຳຄັນຫຼາຍແລະມີຜົນດີຫຼາຍຕໍ່ການຮັກສາຄວາມໝັ້ນຄົງດ້ານການເງິນຂອງພາກພື້ນນີ້.ນອກນັ້ນ,ການພັດທະນາເສດຖະກິດຂອງຈີນໃນຫຼາຍປີມໍ່ໆມານີ້ກໍມີຜົນດີຕໍ່ການຟື້ນຟູການເງິນຂອງປະເທດອ້ອມຂ້າງ.
ທ່ານຊາງຢົງຣີສາສະດາຈານພະແນກເສດຖະສາດຂອງມະຫາວິທະຍາໄລເຊອຸນແຫ່ງຊາດສ.ເກົາຫຼີເວົ້າວ່າ, ຂ້າພະເຈົ້າເຫັນວ່າ, ຈີນໄດ້ມີບົດບາດອັນສຳຄັນທີ່ສຸດໃນໄລຍະທີ່ປະເທດອາຊີຜ່ານຜ່າຄວາມຫຍຸ້ງຍາກຍ້ອນວິກິດການທາງດ້ານການເງິນ.ຖ້າວ່າໃນຄາວນັ້ນຈີນກໍຄືກັນກັບປະເທດອາຊີອື່ນໆ, ໃຫ້ເງິນຢວນຈີນຫຼຸດລາຄາ, ແລະເຂົ້າຮ່ວມການແຂ່ງຂັນສົ່ງອອກສິນຄ້າ, ເສດຖະກິດຂອງຫຼາຍປະເທດອາຊີຈະປະສົບຄວາມເສຍຫາຍຍິ່ງໜັກໜ່ວງ,ແລະຈະຟື້ນຟູຄືນໃໝ່ບໍ່ໄດ້ເລີຍ.ນອກນີ້,ໃນຄາວນັ້ນຈີນບໍ່ພຽງແຕ່ບໍ່ໄດ້ເຂົ້າຮ່ວມການແຂ່ງຂັນສົ່ງອອກສິນຄ້າ,ຫາກຍັງພັດທະນາເສດຖະກິດຢ່າງວ່ອງໄວ, ນຳເຂົ້າຜະລິດຕະພັນສົ່ງອອກຂອງປະເທດອາຊີ, ເຊິ່ງໄດ້ເປັນການຊ່ອຍເຫຼືອອັນໃຫຍ່ຫຼວງຕໍ່ການຟື້ນຟູເສດຖະກິດຂອງປະເທດອື່ນໆ.
|
