|
|
 |
| (GMT+08:00)
2007-07-11 17:20:54
|
 |
|
ຮອງນາຍົກລັດຖະມົນຕີຈີນແລະສິງກະໂປເປັນເຈົ້າພາບຄູ່ຈັດກອງປະຊຸມຄະນະກຳມະການປະສົມການຮ່ວມມືລະຫວ່າງສອງຝ່າຍ
cri
ຕາມຂ່າວສານຊິ່ນຮວາ: ວັນທີ 11 ກໍລະກົດນີ້, ກອງປະຊຸມຄະນະກຳມະການປະສົມການຮ່ວມມືລະຫວ່າງສອງຝ່າຍຈີນສິງກະໂປໄດ້ຈັດຂຶ້ນຢູ່ສິງກະໂປ, ທ່ານນາງອູອີ ຮອງນາຍົກລັດຖະມົນຕີຈີນແລະທ່ານວົງຄັນເຊັງ ຮອງນາຍົກລັດຖະມົນຕີສິງກະໂປເປັນປະທານຄູ່ຂອງກອງປະຊຸມ. ສອງຝ່າຍໄດ້ແລກປ່ຽນຄວາມເຫັນກັນກ່ຽວກັບການລົງເລິກການຮ່ວມມືທີ່ຕ່າງຝ່າຍຕ່າງມີຜົນປະໂຫຍດໃນຂົງເຂດຕ່າງໆ, ແລະໄດ້ຮັບໝາກຜົນອັນສຳຄັນ.
ທ່ານນາງອູອີຕັ້ງໜ້າຕີລາຄາການພົວພັນລະຫວ່າງສອງຝ່າຍຈີນກັບສິງກະໂປ, ແລະກ່າວວ່າ, ຝ່າຍຈີນຍ້ອງຍໍຊົມເຊີຍລັດຖະບານສິງກະໂປໄດ້ກ່າວຢ້ຳຢ່າງເປີດເຜີຍຫຼາຍເທື່ອວ່າ, ຍຶດໝັ້ນນະໂຍບາຍຈີນດຽວ, ຄັດຄ້ານບໍ່ໃຫ້ໄຕ້ຫວັນເປັນເອກະລາດ, ນີ້ໄດ້ສະໜອງການຮັບປະກັນທີ່ສຳຄັນໃຫ້ແກ່ການພັດທະນາການພົວພັນລະຫວ່າງສອງປະເທດຢ່າງປອດໃສແລະໝັ້ນທ່ຽງ. ທ່ານວົງຄັນເຊັງກ່າວວ່າ, ເວົ້າສຳລັບສິງກະໂປແລະປະເທດຕ່າງໆໃນພາກພື້ນແລ້ວ, ການເຕີບໂຕດ້ານເສດຖະກິດທີ່ມີຄວາມຊີວິດຊີວາຂອງຈີນແມ່ນມີຜົນ. ຈີນຍຶດໝັ້ນເດີນຕາມເສັ້ນທາງພັດທະນາໂດຍສັນຕິ, ພວມສົ່ງເສີມບົດບາດທີ່ນັບມື້ນັບສຳຄັນໃນວຽກງານພາກພື້ນແລະສາກົນ.
ສອງຝ່າຍໄດ້ບັນລຸຄວາມເຫັນເອກະສັນກັນກ່ຽວກັບການລົງເລິກການຮ່ວມມືຕ່າງຝ່າຍຕ່າງມີໃນຂົງເຂດຕ່າງໆດັ່ງນີ້, ເຊັ່ນ: ການເພີ່ມທະວີການຮ່ວມມືໃນຂົງເຂດໄຮເຕັກ, ເພີ່ມທະວີການພັດທະນາຊັບພະຍາກອນມະນຸດຕື່ມອີກ, ເປີດກວ້າງຂົງເຂດຮ່ວມມືກວດກາຄຸນນະພາບສິນຄ້າລະຫວ່າງສອງຝ່າຍ, ເພີ່ມທະວີການສ້າງກົນໄກແຈ້ງສະພາບການແລະປ້ອງກັນຄວບຄຸມພະຍາດຕິດແປດແລະການຮ່ວມມືກວດກາພະຍາດເຂົ້າອອກເມືອງ, ຕັ້ງໜ້າຊຸກຍູ້ການເຈລະຈາເຂດການຄ້າເສລີລະຫວ່າງຈີນກັບສິງກະໂປເປັນຕົ້ນ.
|
|
|
