|
|
 |
| (GMT+08:00)
2007-07-16 19:20:35
|
 |
|
ສ.ປ.ປ.ເກົາຫຼີປິດສິ່ງກໍ່ສ້າງນິວເຄຼຍຢູ່ເຢິງປຽນແມ່ນການເລີ່ມຕົ້ນອັນດີງາມໃນການປະຕິບັດຖະແຫຼງການຮ່ວມການເຈລະຈາ 6 ຝ່າຍ
cri
Author: cai
ວັນທີ 14 ກໍລະກົດນີ້,ນ້ຳມັນໜັກງວດທຳອິດ 6200 ໂຕນທີ່ສ.ເກົາຫຼີສະໜອງໃຫ້ສ.ປ.ປ.ເກົາຫຼີນັ້ນໄດ້ສົ່ງໄປຮອດສ.ປ.ປ.ເກົາຫຼີແລ້ວ,ວັນທີ 15 ກໍລະກົດນີ້,ໂຄສົກກະຊວງການຕ່າງປະເທດສ.ປ.ປ.ເກົາຫຼີຢືນຢັນວ່າ,ສ.ປ.ປ.ເກົາຫຼີໄດ້ປິດສິ່ງກໍ່ສ້າງນິວເຄຼຍທີ່ເຢິງປຽນໃນວັນທີ 14 ກໍລະກົດນີ້,ພະນັກງານອົງການພະລັງງານປະລະມານູສາກົນກໍ່ໄດ້ຢືນຢັນເລື່ອງນີ້ໃນວັນທີ 16 ກໍລະກົດນີ້.ຫາງສຽງເຫັນວ່າ,ສ.ປ.ປ.ເກົາຫຼີປິດສິ່ງກໍ່ສ້າງນິວເຄຼຍທີ່ເຢິງປຽນນັ້ນແມ່ນຄວາມຄືບໜ້າທີ່ສຳຄັນທີ່ສຸດນັບແຕ່ຈັດການເຈລະຈາ 6 ຝ່າຍກ່ຽວກັບບັນຫານິວເຄຼຍແຫຼມເກົາຫຼີເມື່ອເດືອນສິງຫາປີ 2003 ມານີ້,ແມ່ນການເລີ່ມຕົ້ນອັນດີງາມທີ່ຝ່າຍຕ່າງໆໃຊ້ບາດກ້າວປະສານງານເປັນເອກະພາບກັນ,ປະຕິບັດຖະແຫຼງການຮ່ວມໂດຍແບ່ງເປັນໄລຍະຕາມຫຼັກການ"ການເຄື່ອນໄຫວຕໍ່ການເຄື່ອນໄຫວ"ທີ່ກຳນົດໄວ້ໃນ"ເອກະສານຮ່ວມ 13 ກຸມພາ"ຂອງການເຈລະຈາ 6 ຝ່າຍ.
ຕາມເອກະສານ"ການເຄື່ອນໄຫວເບື້ອງຕົ້ນຂອງການປະຕິບັດຖະແຫຼງການຮ່ວມ"ທີ່ກອງປະຊຸມໄລຍະທີ 3 ຂອງການເຈລະຈາ 6 ຝ່າຍຮອບ 5 ທີ່ຈັດຂຶ້ນເມື່ອວັນທີ 13 ກຸມພາປີນີ້ໄດ້ຮັບຮອງນັ້ນ,ສ.ປ.ປ.ເກົາຫຼີຄວນຖືການປະລະນິວເຄຼຍເປັນເປົ້າໝາຍ,ປິດແລະຮັກສາສິ່ງກໍ່ສ້າງນິວເຄຼຍທີ່ເຢິງປຽນ,ລວມທັງສິ່ງກໍ່ສ້າງທີ່ຈະຊຳລະຕາມພາຍຫຼັງ,ແລະເຊີນພະນັກງານອົງການພະລັງງານປະລະມານູສາກົນກັບຄືນສູ່ສ.ປ.ປ.ເກົາຫຼີດຳເນີນການຕິດຕາມກວດກາທີ່ຈຳເປັນ.ພ້ອມກັນນັ້ນ,ຝ່າຍຕ່າງໆທີ່ກ່ຽວຂ້ອງກໍ່ໃຫ້ການຊ່ວຍເຫຼືອດ້ານເສດຖະກິດ ພະລັງງານແລະມະນຸດສະທຳທີ່ມີມູນຄ່າເທົ່າກັບນ້ຳມັນໜັກ 1 ລ້ານໂຕນໃຫ້ສ.ປ.ປ.ເກົາຫຼີ.
ນັກວິເຄາະຊີ້ອອກວ່າ,ສ.ປ.ປ.ເກົາຫຼີປິດແລະຮັກສາສິ່ງກໍ່ສ້າງນິວເຄຼຍທີ່ເຢິງປຽນ,ບໍ່ແມ່ນລະບຽບການທີ່ສັບສົນແນວໃດ,ສຳຄັນແມ່ນໄລຍະຕໍ່ໄປຈະດຳເນີນແນວໃດ,ນີ້ກໍ່ແມ່ນບັນຫາທີ່ກອງປະຊຸມຫົວໜ້າຄະນະຂອງການເຈລະຈາ 6 ຝ່າຍທີ່ຈະຈັດຂຶ້ນໃນວັນທີ 18 ເດືອນນີ້ຈະຫາລືກັນ.
ກ່ອນອື່ນ,ຕາມ"ເອກະສານຮ່ວມ 13 ກຸມພາ",ໃນໄລຍະຕໍ່ໄປ,ສ.ປ.ປ.ເກົາຫຼີຄວນຫາລືບັນຊີລະອຽດຂອງແຜນການນິວເຄຼຍທັງໝົດຂອງຕົນກັບຝ່າຍອື່ນໆ;ສ.ປ.ປ.ເກົາຫຼີລາຍງານແຜນການນິວເຄຼຍທັງໝົດຂອງຕົນຢ່າງຮອບດ້ານ,ແລະຍົກເລີກບົດບາດຂອງສິ່ງກໍ່ສ້າງນິວເຄຼຍທີ່ມີຢູ່ໃນປະຈຸບັນທັງໝົດເຊິ່ງລວມທັງເຄື່ອງປະຕິກອນກົ່ວດຳແລະໂຮງງານຊຳລະຕາມຫຼັງ.ສ່ວນສ.ປ.ປ.ເກົາຫຼີມີແຜນການກັ່ນເອົາຢູເຣນຽມຂຸ້ນຫຼືບໍ່ ສ.ປ.ປ.ເກົາຫຼີໄດ້ກັ່ນເອົາປຼູຕົນທີ່ໃຊ້ຜະລິດອາວຸດນິວເຄຼຍໄດ້ນັ້ນຫຼາຍສ່ຳໃດແລ້ວ ວິທີເຮັດໃຫ້ສິ່ງກໍ່ສ້າງນິວເຄຼຍເສຍບົດບາດພ້ອມດ້ວຍການແບ່ງປັນກັນເສຍຄ່າໃຊ້ຈ່າຍແນວໃດເປັນຕົ້ນ,ລ້ວນແຕ່ອາດຈະມີການປ່ຽນແປງໃນໄລຍະຕໍ່ໄປ.
ສອງ,ຝ່າຍຕ່າງໆທີ່ກ່ຽວຂ້ອງຈະສາມາດປະຕິບັດ"ເອກະສານຮ່ວມ 13 ກຸມພາ"ຢ່າງຮອບດ້ານແລະສະໝ່ຳສະເໝີກັນໄດ້ຫຼືບໍ່ກໍ່ແມ່ນບັນຫາທີ່ເຮັດໃຫ້ຫຼາຍຝ່າຍສົນໃຈນຳ. ສ.ປ.ປ.ເກົາຫຼີໄດ້ກ່າວວ່າ,ຕາມຫຼັກການ"ການເຄື່ອນໄຫວຕໍ່ການເຄື່ອນໄຫວ",ຝ່າຍຕ່າງໆກໍ່ຄວນເລັ່ງລັດທຳການກະກຽມໃຫ້ດີເພື່ອປະຕິບັດຄຳໝັ້ນສັນຍາຂອງໃຜລາວ.ຖ້າຝ່າຍຕ່າງໆບໍ່ປະຕິບັດຄຳໝັ້ນສັນຍາຂອງຕົນຢ່າງທັນການ,ລວມທັງການສົ່ງນ້ຳມັນໜັກອີກ 9 ແສນ 5 ໝື່ນໂຕນແລ້ວ,ເຖິງວ່າສ.ປ.ປ.ເກົາຫຼີໄດ້ປິດສິ່ງກໍ່ສ້າງນິວເຄຼຍແລ້ວນັ້ນ,ກໍ່ຈະມີເຫດຜົນຟື້ນຟູການເຄື່ອນໄຫວນິວເຄຼຍຄືນໃໝ່.
ສາມ,ບັນຫານິວເຄຼຍແຫຼມເກົາຫຼີສັບສົນທີ່ສຸດ,ມັນທັງກ່ຽວພັນເຖິງການໃຫ້ແຫຼມເກົາຫຼີປອດນິວເຄຼຍ,ທັງກ່ຽວພັນເຖິງການພົວພັນລະຫວ່າງປະເທດທີ່ກ່ຽວຂ້ອງຫັນເປັນປົກກະຕິ,ຍັງກ່ຽວພັນເຖິງຈະສ້າງສັນຕິພາບຖາວອນແລະກົນໄກຄວາມປອດໄພຢູ່ອາຊີຕາເວັນອອກສຽງເໜືອແນວໃດໃນຕໍ່ໜ້ານີ້,ພ້ອມດ້ວຍການຮ່ວມມືດ້ານເສດຖະກິດແລະພະລັງງານລະຫວ່າງປະເທດທີ່ກ່ຽວຂ້ອງ.ປະຈຸບັນ,ຝ່າຍທີ່ກ່ຽວຂ້ອງໂດຍສະເພາະແມ່ນຝ່າຍຕົ້ນຕໍຂອງບັນຫານິວເຄຼຍແຫຼມເກົາຫຼີຄືສ.ປ.ປ.ເກົາຫຼີກັບອາເມລິກາຍັງຂາດຄວາມໄວ້ເນື້ອເຊື່ອໃຈກັນ.ວັນທີ 14 ກໍລະກົດນີ້,ຢູ່ພຽງຢາງ,ໂຄສົກຄະນະກຳມະການແຫ່ງຊາດທົ່ວປະເທດທີ່ສະໜັບສະໜູນສັນຕິພາບຂອງສ.ປ.ປ.ເກົາຫຼີກ່າວວ່າ,ບັນຫານິວເຄຼຍແຫຼມເກົາຫຼີຈະແກ້ໄຂໄດ້ຫຼືບໍ່"ແມ່ນຊີ້ຂາດຢູ່ນຳຝ່າຍອາເມລິກາຈະປ່ຽນແປງນະໂຍບາຍຕໍ່ສ.ປ.ປ.ເກົາຫຼີຫຼືບໍ່",ແລະຮຽກຮ້ອງໃຫ້ອາເມລິກາສະໜອງຫຼັກຖານທີ່ເຂົາບໍ່ໄດ້ຈັດວາງອາວຸດນິວເຄຼຍຢູ່ສ.ເກົາຫຼີ.
ຄືດັ່ງທ່ານໂມຮາເມັດ ເອວ ບາຣາເດ ຜູ້ອຳນວຍການໃຫຍ່ອົງການພະລັງງານປະລະມານູສາກົນໄດ້ເວົ້າໃນເວລາຢ້ຽມຢາມສ.ເກົາຫຼີໃນອາທິດແລ້ວນີ້,ປະຈຸບັນແມ່ນໂອກາດສຳຄັນໃນການແກ້ໄຂບັນຫານິວເຄຼຍແຫຼມເກົາຫຼີ,ແຕ່ວ່າສ.ປ.ປ.ເກົາຫຼີປະລະນິວເຄຼຍແມ່ນຂະບວນການອັນສັບສົນແລະຫຍຸ້ງຍາກທີ່ສຸດ,ບັນຫານິວເຄຼຍແຫຼມເກົາຫຼີກໍ່ຍາກທີ່ຈະໄດ້ຮັບການແກ້ໄຂໃນເວລາສັ້ນ,ຫວັງວ່າ,ຝ່າຍຕ່າງໆຈະສາມາດຮັກສາຄວາມອົດທົນໃນເລື່ອງນີ້.ຫາງສຽງເຫັນວ່າ,ໃຕ້ສະຖານະການໃນປະຈຸບັນ,ຄວນຖະໜອມແລະຮັກສາທ່ວງທ່າຕັ້ງໜ້າທີ່ໄດ້ປະກົດອອກມາໃນການເຈລະຈາ 6 ຝ່າຍ,ປະຕິບັດຄຳໝັ້ນສັນຍາຂອງໃຜລາວ,ຊຸກຍູ້ການເຈລະຈາ 6 ຝ່າຍໃຫ້ຂະຫຍາຍໄປໜ້າຢ່າງບໍ່ຢຸດຢັ້ງ.
|
|
|
