|
|
 |
| (GMT+08:00)
2007-07-19 18:50:31
|
 |
|
6 ເດືອນຕົ້ນປີນີ້ ການເຕີບໂຕຂອງເສດຖະກິດຈີນສ້າງສະຖິຕິໃໝ່
cri
Author: cai
ວັນທີ 19 ກໍລະກົດນີ້,ກົມສະຖິຕິແຫ່ງຊາດຈີນໄດ້ປະກາດຕົວເລກເສດຖະກິດມະຫາພາກຂອງຈີນໃນ 6 ເດືອນຕົ້ນປີນີ້.ຂໍ້ມູນສະແດງໃຫ້ເຫັນວ່າ,6 ເດືອນຕົ້ນປີນີ້,ລວມຍອດຜະລິດຕະພັນພາຍໃນຫຼື GDP ຂອງຈີນໄດ້ເພີ່ມຂຶ້ນ 11,5% ເມື່ອທຽບກັບໄລຍະດຽວກັນຂອງປີກາຍ,ໄດ້ສ້າງສະຖິຕິໃໝ່ໃນ 11 ປີມານີ້;ພ້ອມກັນນັ້ນ,ຍ້ອນລາຄາອາຫານສູງຂຶ້ນໄວໂພດ,ຕົວເລກດັດຊະນີຄ່າບໍລິໂພກຫຼື CPI ຂອງປະຊາຊົນຈີນໃນ 6 ເດືອນຕົ້ນປີນີ້ໄດ້ເພີ່ມຂຶ້ນ,ແລະຄວາມກົດດັນໃນອະນາຄົດຍ້ອນຄ່າບໍລິໂພກເພີ່ມຂຶ້ນກໍ່ຍັງມີຢູ່.
ວັນທີ 19 ກໍລະກົດນີ້,ຢູ່ປັກກິ່ງ,ຫ້ອງການຖະແຫຼງຂ່າວຂອງລັດຖະບານຈີນໄດ້ເຊີນທ່ານຫຼີສ້ຽວຊ່າວ ໂຄສົກຖະແຫຼງຂ່າວຂອງກົມສະຖິຕິແຫ່ງຊາດຈີນມາແຈ້ງສະພາບການໝູນເດີນຂອງເສດຖະກິດແຫ່ງຊາດໃນ 6 ເດືອນຕົ້ນປີນີ້.ທ່ານບອກວ່າ,ໃນ 6 ເດືອນຕົ້ນປີນີ້,ເສດຖະກິດຈີນສືບຕໍ່ຮັກສາການພັດທະນາຢ່າງໜັກແໜ້ນແລະວ່ອງໄວ,GDP ໄດ້ບັນລຸ 1 ໝື່ນຕື້ກວ່າຢວນ,ເພີ່ມຂຶ້ນ 11,5% ເມື່ອທຽບໃສ່ໄລຍະດຽວກັນໃນປີກາຍ.
ທ່ານຫຼີສ້ຽວຊ່າວກ່າວວ່າ,ນອກຈາກ"ເຄື່ອງເສີມພະລັງ"ສອງອັນຄືການຄ້າຂາອອກແລະການລົງທຶນແລ້ວ,ການປະກອບສ່ວນຂອງການບໍລິໂພກທີ່ມີຕໍ່ການເຕີບໂຕຂອງເສດຖະກິດຈີນກໍ່ໄດ້ເພີ່ມຂຶ້ນຢ່າງເດັ່ນຊັດ.ທ່ານກ່າວວ່າ:
"ແຕ່ກ່ອນ,ການເຕີບໂຕຂອງເສດຖະກິດຈີນທີ່ອາໄສການລົງທຶນຫຼາຍໂພດນັ້ນນັບແຕ່ຕົ້ນປີນີ້ມາ,ໄດ້ມີການປ່ຽນແປງບາງຢ່າງ,ຄືຄວາມຫຼຸດລື່ນກັນລະຫວ່າງການລົງທຶນກັບການບໍລິໂພກທີ່ເພີ່ມຂຶ້ນພວມຫຍັບເຂົ້າຫາກັນ,ຊຶ່ງກໍ່ໝາຍຄວາມວ່າ,ການບໍລິໂພກຊຸກຍູ້ເສດຖະກິດໃຫ້ເພີ່ມຂຶ້ນແຮງກວ່າເກົ່າ."
ທ່ານຫຼີສ້ຽວຊ່າວວິເຄາະວ່າ,ປະຊາຊົນມີລາຍໄດ້ເພີ່ມຂຶ້ນຢ່າງວ່ອງໄວ ຄວາມໝັ້ນໃຈດ້ານບໍລິໂພກຂອງປະຊາຊົນເພີ່ມຂຶ້ນ ແລະການບໍລິໂພກດ້ານລົດຍົນແລະເຮືອນຢູ່ເພີ່ມຂຶ້ນໄວແມ່ນສາເຫດຕົ້ນຕໍທີ່ເຮັດໃຫ້ການບໍລິໂພກໃນ 6 ເດືອນຕົ້ນປີນີ້ຂອງຈີນເພີ່ມຂຶ້ນ.ໃນນັ້ນ,ລາຍໄດ້ຂອງປະຊາຊົນໃນຕົວເມືອງແລະຊົນນະບົດລ້ວນແຕ່ໄດ້ເພີ່ມຂຶ້ນຫຼາຍກວ່າ 13%,ຊຶ່ງເພີ່ມຂຶ້ນຫຼາຍກວ່າທຸກປີທີ່ຜ່ານມາ.
ແຕ່ວ່າ,ພ້ອມກັນນັ້ນ,ທ່ານຫຼີສ້ຽວຊ່າວກ່າວວ່າ,ປະຈຸບັນ,ໃນການໝູນເດີນຂອງເສດຖະກິດຈີນ,ແມ່ນມີຄວາມຂັດແຍ້ງກັນດ້ານອົງປະກອບແລະໂຄງປະກອບຈຳນວນໜຶ່ງຍັງພົ້ນເດັ່ນຢູ່,ໂດຍສະເພາະແມ່ນລາຄາເຂົ້າ ຊີ້ນແລະສັດປີກພ້ອມດ້ວຍອາຫານປະເພດຊີ້ນແລະໄຂ່ໄດ້ແພງຂຶ້ນຫຼາຍ,ຄວາມກົດດັນຈາກການປະຢັດພະລັງງານແລະຫຼຸດຜ່ອນການລະບາຍອາຍພິດເຮືອນແກ້ວຍັງແຮງຫຼາຍ.ໂດຍສະເພາະແມ່ນໃນ 6 ເດືອນຕົ້ນປີນີ້,ຕົວເລກຄ່າໃຊ້ສອຍຂອງຈີນໄດ້ເພີ່ມຂຶ້ນ 3,2% ເມື່ອທຽບໃສ່ໄລຍະດຽວກັນໃນປີກາຍ,ໄດ້ເຮັດໃຫ້ເສດຖະກິດຈີນປະເຊີນໜ້າກັບຄວາມກົດດັນດ້ານເງິນເຟີ້ຫຼາຍຂຶ້ນ.
ທ່ານຫຼີສຽວຊ່າວຄາດຄະເນວ່າ,ໃນໄລຍະໜຶ່ງຕໍ່ໄປ,ຕົວເລກຄ່າບໍລິໂພກຂອງປະຊາຊົນຈີນຍັງອາດຈະເພີ່ມຂຶ້ນອີກ.
"ປະຈຸບັນ,ການເຫຼືອລົ້ນຂອງທຶນຍັງພົ້ນເດັ່ນຢູ່,ລາຄາເຮືອນຍັງພວມເພີ່ມຂຶ້ນ,ຕົວເລກດັດຊະນີບັດຫຸ້ນສ່ວນກໍ່ຍັງປັ່ນປ່ວນຢູ່,ໃຕ້ສະພາບການດັ່ງກ່າວ,ຕາບໃດການທີ່ຄວບຄຸມລາຄາອາຫານໄວ້ບໍ່ໄດ້,ລາຄາເຮືອນກໍ່ແພງຂຶ້ນແພງຂຶ້ນແລະສົ່ງຜົນກະທົບຕໍ່ກັນແລ້ວ,ກໍ່ຈະພາໃຫ້ມີຄວາມສ່ຽງທີ່ລາຄາຈະຖີບສູງຂຶ້ນ,ຄວາມກົດດັນຍ້ອນຄ່າບໍລິໂພກຂອງປະຊາຊົນແພງຂຶ້ນກໍ່ຍັງແຮງຫຼາຍ.ຕໍ່ເລື່ອງນີ້,ພວກເຮົາຈະຖືເບົາບໍ່ໄດ້."
ທ່ານຫຼີສ້ຽວຊ່າວກ່າວວ່າ,ໃນ 6 ເດືອນຕົ້ນປີນີ້,ຈີນໄດ້ປະກາດນະໂຍບາຍສັບຊ້ອນມະຫາພາກຢ່າງເປັນລະບົບ,ໃນນັ້ນ,ລວມທັງການໃຫ້ເງິນອຸດໜູນແກ່ຊາວກະສິກອນ ຄວບຄຸມບໍ່ໃຫ້ການລົງທຶນໃນຂະແໜງອະສັງຫາລິມະຊັບເພີ່ມຂຶ້ນໄວໂພດ ປັບອັດຕາທຶນສຳຮອງເງິນຝາກໃຫ້ສູງຂຶ້ນ 5 ເທື່ອລຽນຕິດແລະຍົກອັດຕາດອກເບ້ຍພື້ນຖານຂອງເງິນຝາກແລະເງິນກູ້ໃຫ້ສູງຂຶ້ນ 2 ເທື່ອ.ມາດຕະການເຫຼົ່ານີ້ລ້ວນແຕ່ໄດ້ຊຸກຍູ້ໃຫ້ເສດຖະກິດເຕີບໂຕຢ່າງວ່ອງໄວຢ່າງບັງເກີດຜົນ.ໃນໄລຍະຕໍ່ໄປ,ຈີນຈະເພີ່ມທະວີແລະສັບຊ້ອນຄວບຄຸມມະຫາພາກໃຫ້ດີຂຶ້ນຢ່າງບໍ່ຢຸດຢັ້ງ,ອອກແຮງປັບປຸງອົງປະກອບເສດຖະກິດ,ຫັນປ່ຽນຮູບການເຕີບໂຕ,ພະຍາຍາມເຮັດໃຫ້ເສດຖະກິດແຫ່ງຊາດພັດທະນາທັງດີທັງໄວ.
|
|
|
