|
ທ່ານເຈິ່ງເພີຍອຽນ ຮອງນາຍົກລັດຖະມົນຕີຈີນກ່າວວ່າ ວິສາຫະກິດຂະໜາດກາງແລະນ້ອຍຕ້ອງຍຶດໝັ້ນເດີນຕາມເສັ້ນທາງພັດທະນາທີ່ຖືກຫຼັກວິທະຍາສາດ
cri
Author: cai
ຕາມຂ່າວສານຊີນຮວາ:ວັນທີ 19 ກໍລະກົດນີ້,ຢູ່ປັກກິ່ງ,ທ່ານເຈິ່ງເພີຍອຽນ ຮອງນາຍົກລັດຖະມົນຕີຈີນກ່າວວ່າ,ວິສາຫະກິດຂະໜາດກາງແລະນ້ອຍຂອງຈີນຕ້ອງຍຶດໝັ້ນເດີນຕາມເສັ້ນທາງພັດທະນາທີ່ຖືກຫຼັກວິທະຍາສາດ.
ໃນເວລາໄປຊົມງານວາງສະແດງໝາກຜົນການປະດິດສ້າງກັບການພັດທະນາຂອງວິສາຫະກິດຂະໜາດກາງແລະນ້ອຍທົ່ວປະເທດຈີນ,ທ່ານເຈິ່ງເພີຍອຽນກ່າວວ່າ,ວິສາຫະກິດຂະໜາດກາງແລະນ້ອຍຕ້ອງເລັ່ງລັດການຜະລິດແລະການປະດິດສ້າງ,ເດີນຕາມເສັ້ນທາງພັດທະນາແບບຍືນຍົງ,ພະຍາຍາມຍົກສູງປະສິດທິພາບຂອງການນຳໃຊ້ຊັບພະຍາກອນ,ເພີ່ມທະວີການອະນຸລັກສິ່ງແວດລ້ອມແລະການປົວແປງມົນລະພິດ,ປັບປຸງເງື່ອນໄຂປ້ອງກັນການອອກແຮງງານແລະການຜະລິດຢ່າງປອດໄພ,ປະຕິບັດໜ້າທີ່ສັງຄົມຢ່າງດີກວ່າເກົ່າ.ຕ້ອງເລັ່ງລັດອັດວິສາຫະກິດຂະໜາດນ້ອຍທີ່ສິ້ນເປືອງພະລັງງານຫຼາຍແລະສ້າງມົນລະພິດຕໍ່ສິ່ງແວດລ້ອມຫຼາຍ.
ງານວາງສະແດງໝາກຜົນການປະດິດສ້າງກັບການພັດທະນາຂອງວິສາຫະກິດຂະໜາດກາງແລະນ້ອຍຂອງຈີນຄັ້ງປະຖົມມະເລີກທີ່ຈັດຂຶ້ນໃນວັນທີ 19 ກໍລະກົດນີ້,ໄດ້ສະແດງໃຫ້ເຫັນໝາກຜົນຂອງວິສາຫະກິດຂະໜາດກາງແລະນ້ອຍແລະເສດຖະກິດທີ່ບໍ່ແມ່ນກຳມະສິດສ່ວນລວມຂອງຈີນ.ປະຈຸບັນ,ຢູ່ຈີນ,ວິສາຫະກິດຂະໜາດກາງແລະນ້ອຍກວມ 99% ຂອງວິສາຫະກິດຈີນ,ມູນຄ່າຜະລິດຕະພັນຂອງວິສາຫະກິດຂະໜາດກາງແລະນ້ອຍເຫຼົ່ານີ້ໄດ້ກວມຍອດມູນຄ່າຜະລິດຕະພັນພາຍໃນຫຼື GDP ຂອງຈີນປະມານ 60%.ວິສາຫະກິດຂະໜາດກາງແລະນ້ອຍໄດ້ກາຍເປັນກຳລັງສຳຄັນທີ່ຊຸກຍູ້ເສດຖະກິດຂອງຈີນໃຫ້ພັດທະນາ.
|
|
