|
ທ່ານເຈິ່ງຊິ້ງຮົງກ່າວວ່າ, ເຂດປົກຄອງຕົນເອງມົງໂກໃນໄດ້ເປັນແບບຢ່າງໃຫ້ຈີນໃນການປະຕິບັດລະບົບປົກຄອງຕົນເອງເຂດຊົນເຜົ່າສ່ວນໜ້ອຍ
cri
ຕາມຂ່າວສານຊິ່ນຮວາ: ທ່ານເຈິ່ງຊິ້ງຮົງ ຮອງປະທານປະເທດຈີນກ່າວວ່າ, ການພັດທະນາຂອງເຂດປົກຄອງຕົນເອງມົງໂກໃນເຊິ່ງເປັນເຂດຊົນເຜົ່າປົກຄອງຕົນເອງເຂດທຳອິດຂອງຈີນ, ໄດ້ເປັນແບບຢ່າງໃຫ້ຈີນໃນການປະຕິບັດລະບົບປົກຄອງຕົນເອງເຂດຊົນເຜົ່າສ່ວນໜ້ອຍ.
ວັນທີ 29 ກໍລະກົດນີ້, ງານສິລະປະຈັດພິເສດເພື່ອສະຫຼອງເຂດປົກຄອງຕົນເອງມົງໂກໃນສ້າງຕັ້ງຂຶ້ນຄົບຮອບ 60 ປີໄດ້ຈັດຂຶ້ນຢູ່ປັກກິ່ງ. ກ່ອນຈັດງານ, ທ່ານເຈິ່ງຊີ້ງຮົງໄດ້ພົບປະຜູ້ແທນສະຫາຍອາວຸໂສທີ່ເຄີຍເຮັດວຽກຢູ່ເຂດມົງໂກໃນ. ທ່ານເຈິ່ງຊິ້ງຮົງກ່າວວ່າ, ໃນ 60 ປີທີ່ເຂດປົກຄອງຕົນເອງສ້າງຕັ້ງຂຶ້ນມານີ້, ໄດ້ມີການປ່ຽນແປງຢ່າງໃຫຍ່. ສະພາບການອັນດີງາມຂອງເຂດມົງໂກໃນໃນປະຈຸບັນ, ແມ່ນຕັດແຍກອອກຈາກຄວາມພະຍາຍາມແລະການປະກອບສ່ວນໃນໄລຍະຍາວນານຂອງບັນດາສະຫາຍອາວຸໂສບໍ່ໄດ້. ທ່ານຫວັງໃຫ້ບັນດາສະຫາຍອາວຸໂສສືບຕໍ່ເອົາໃຈໃສ່ແລະສະໜັບສະໜູນການພັດທະນາຂອງເຂດມົງໂກໃນ, ເພື່ອສືບຕໍ່ອຸທິດສະຕິບັນຍາແລະກຳລັງວັງຊາຂອງຕົນດ້ວຍຮູບການຕ່າງໆເພື່ອສ້າງເຂດມົງໂກໃນໃຫ້ສວຍງາມ, ຮັ່ງມີ, ຈະເລີນແລະກົມກຽວກວ່າເກົ່າ.
ປີນີ້, ເຂດປົກຄອງຕົນເອງມົງໂກໃນຂອງຈີນໄດ້ສ້າງຕັ້ງຂຶ້ນຄົບຮອບ 60 ປີແລ້ວ, ໃນ 60 ປີມານີ້, ພາລະກິດຕ່າງໆຂອງສັງຄົມເຂດປົກຄອງຕົນເອງມົງໂກໃນໄດ້ຮັບການພັດທະນາຢ່າງຫຼວງຫຼາຍ. ປະຈຸບັນ, ເຂດມົງໂກໃນໄດ້ກາຍເປັນແຫຼ່ງຜະລິດຜະລິດຕະພັນກະສິກຳ, ຜະລິດຕະພັນສັດ, ພະລັງງານແລະວັດຖຸດິບອຸປະກອນອັນສຳຄັນຂອງຈີນແລ້ວ.
|
|
