|
ຕາມຂ່າວCRI:ວັນທີ30ກໍລະກົດນີ້,ນາງຄອນໂດລີຊາ ໄລສ໌ ລັດຖະມົນຕີວ່າການກະຊວງການຕ່າງປະເທດອາເມລິກາຖະແຫຼງວ່າ,ອາເມລິກາມີແຜນຈະສະໜອງຄວາມຊ່ວຍເຫຼືອທາງການທະຫານທີ່ມີມູນຄ່າສູງໃຫ້ແກ່ປະເທດອ່າວເປີເຊຍ ເຊັ່ນອາລາບີຊາອູດິດເປັນຕົ້ນ ພ້ອມດ້ວຍອິດສະລະແອນແລະເອຢິບ,ເພື່ອຮັບມືກັບອິດທິກຳລັງຝ່າຍຕ່າງໆ ຄືກຸ່ມອານໄກດາແລະພັກເຮສບູນລາຂອງລີບັງ.ໃນມື້ດຽວກັນ,ອີຣານລີບັງແລະເຢຍລະມັນຕ່າງໄດ້ຕິຕຽນແຜນການດັ່ງກ່າວຂອງອາເມລິກາ.
ນາງໄລສ໌ເວົ້າວ່າ,ອາເມລິກາຈະສະໜອງຄວາມຊ່ວຍເຫຼືອທາງການທະຫານທີ່ມີມູນຄ່າ30ຕື້ໂດລາໃຫ້ແກ່ອິດສະລະແອນແລະ13ຕື້ໂດລາໃຫ້ແກ່ເອຢິບພາຍໃນ10ປີຕໍ່ໜ້າ.ນອກນີ້,ອາເມລິກາຍັງຈະປຶກສາຫາລືກັບ6ປະເທດອ່າວເປີເຊຍ ຄືອາລາບີຊາອູດິດແລະປະເທດອື່ນໆກ່ຽວກັບຄວາມຊ່ວຍເຫຼືອທາງການທະຫານ.ຂ່າວແຈ້ງຕື່ມວ່າ,ອາເມລິກາມີແຜນຈະຈຳໜ່າຍອາວຸດທີ່ມີມູນຄ່າຢ່າງໜ້ອຍ20ຕື້ໂດລາໃຫ້ປະເທດອ່າວເປີເຊຍເຫຼົ່ານີ້.
ທ່ານໂມຮາມັດ ອາລີ ໂຮເຊນີ ໂຄສົກກະຊວງການຕ່າງປະເທດອີຣານກ່າວວ່າ,ອາເມລິກາຈຳໜ່າຍອາວຸດໃຫ້ແກ່ປະເທດອ່າວເປີເຊຍຈະທຳລາຍຄວາມປອດໄພແລະສະຖຽນລະພາບຂອງເຂດຕາເວັນອອກກາງ.ທ່ານຟູອັດ ຊີນີໂອຣາ ນາຍົກລັດຖະມົນຕີລີບັງຖະແຫຼງວ່າ,ການກະທຳດັ່ງກ່າວສະແດງໃຫ້ເຫັນຕື່ມອີກວ່າ,ອາເມລິກາເຂົ້າຂ້າງອິດສະລະແອນ,ມີແຕ່ຈະຊ່ວຍໃຫ້ທ່າອ່ຽງລັດທິຫົວຮຸນແຮງຂອງເຂດຕາເວັນອອກກາງເຕີບໃຫຍ່ຂຶ້ນທໍ່ນັ້ນ.ທ່ານກ່າວວ່າ,ການໃຊ້ວິທີທາງການທະຫານບໍ່ສາມາດແກ້ໄຂການປະທະກັນລະຫວ່າງອາຣັບກັບອິດສະລະແອນໄດ້ແລະບໍ່ສາມາດບັນລຸເປົ້າໝາຍສັນຕິພາບແລະຄວາມປອດໄພຂອງພາກພື້ນແຫ່ງນີ້ໄດ້.ບຸກ ຄົນສຳຄັນບາງທ່ານໃນວົງການການເມືອງເຢຍລະມັນກໍກ່າວວ່າ,ແຜນການຂອງອາເມລິກາທີ່ຈຳໜ່າຍອາວຸດໃຫ້ແກ່ເຂດອ່າວເປີເຊຍແມ່ນມີສາຍຕາສັ້ນແລະບໍ່ຮັບຜິດຊອບ.
|
