ວັນທີ30ກໍລະກົດນີ້, ກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ40ໄດ້ຈັດຂຶ້ນຢູ່ມານີລາ, ໃນເວລາກອງປະຊຸມອັດລົງໄດ້ອອກຖະແຫຼງ ການຮ່ວມໂດຍກ່າວຢ້ຳຄວາມຕັດສິນໃຈທີ່ສ້າງປະຊາຄົມອາຊຽນ, ແລະສະເໜີໃຫ້ກຳນົດເອົາວັນທີ8ສິງຫາທຸກໆປີເປັນວັນອາຊຽນ.
ນາງໂກຼເຣຍ ມາຄາບາກັນ ອາໂລໂຢ ປະທານາທິບໍດີຟິລິບປິນໄດ້ກ່າວຄຳປາໄສໃນກອງປະຊຸມດັ່ງກ່າວ. ນາງຮຽກຮ້ອງໃຫ້ປະເທດສະມາຊິກຂອງອາຊຽນຈົ່ງກ້າວໄປສູ່ເປົ້າໝາຍທີ່ສ້າງປະຊາຄົມອາຊຽນໃນປີ2015ຢ່າງສຸດຄວາມສາມາດ, ເພື່ອສືບຕໍ່ຮັກສາອິດທິພົນໃນສະພາບແວດລ້ອມແຫ່ງໂລກາພິວັດທີ່ນັບມື້ນັບໄວເຂົ້າ. ນາງຊີ້ອອກວ່າ, ປະເທດຕ່າງໆໃນອາຊຽນຄວນຮັບຮູ້ເຖິງຄວາມສຳຄັນຂອງປະຊາຄົມອາຊຽນໃນການຮັບປະກັນບໍ່ໃຫ້ປະເທດຕ່າງໆຖືກປະຖິ້ມໃນສະໄໝໂລກາພິວັດ. ນາງກ່າວວ່າ, "ໃນກອງປະຊຸມສຸດຍອດອາຊຽນທີ່ຈັດຂຶ້ນຢູ່ເຊບູໃນຕົ້ນປີນີ້, ປະເທດສະມາຊິກໄດ້ຕົກລົງປ່ຽນເວລາກຳນົດສ້າງປະຊາຄົມອາຊຽນຈາກປີ2020ມາເປັນປີ2015, ເປົ້າໝາຍຂອງພວກຂ້າພະເຈົ້າແມ່ນເສີມຂະຫຍາຍທ່າແຮງບົ່ມຊ້ອນຢ່າງເຕັມສ່ວນ, ປ່ຽນພາກພື້ນນີ້ໃຫ້ເປັນພາກພື້ນໜຶ່ງທີ່ມີຊີວິດຊີວາຫຼາຍກວ່າໝູ່ຂອງໂລກ.
ນາງອາໂລໂຢຊີ້ອອກວ່າ, ນັບແຕ່ສ້າງຕັ້ງອາຊຽນເປັນເວລາ40ປີມານີ້,ໄດ້ກາຍເປັນກຳລັງໜຶ່ງທີ່ປົກປັກຮັກສາສັນຕິພາບ, ຄວາມຈະເລີນຮຸ່ງເຮືອງແລະການພັດທະນາຂອງພາກພື້ນແຫ່ງນີ້,ໜ້າທີ່ວຽກງານໃນຕໍ່ໜ້າແມ່ນປຶກສາຫາລືກັນວ່າຈະເຮັດແນວໃດເພື່ອສືບຕໍ່ເສີມຂະຫຍາຍບົດບາດດັ່ງກ່າວໃນໂລກທີ່ລັດທິພາກພື້ນແລະໂລກາພິວັດພັດທະນາກ້າວສູ່ລວງເລິກຢ່າງບໍ່ຢຸດຢັ້ງ.ນາງອາໂລໂຢເຫັນວ່າ,ຖ້າຢາກບັນລຸເປົ້າໝາຍດັ່ງກ່າວ,ອາຊຽນກໍຕ້ອງສືບຕໍ່ເພີ່ມທະວີການພົວພັນກັບປະເທດຄູ່ຮ່ວມມືສຳຄັນໃນພາກພື້ນ,ໂດຍສະເພາະແມ່ນສາມປະເທດອາຊີຕາເວັນອອກສຽງເໜືອທີ່ພວມເຊັນສົນທິສັນຍາການຄ້າເສລີກັບອາຊຽນຄືຈີນ,ຍີ່ປຸ່ນແລະສເກົາຫຼີ
ໃນກອງປະຊຸມທີ່ຈັດຂຶ້ນໃນມື້ດຽວກັນ,ລັດຖະມົນຕີວ່າການການຕ່າງປະເທດ ທີ່ຮ່ວມປະຊຸມໄດ້ສະແດງຄວາມຊົມເຊີຍຕໍ່ແຜນປະຕິບັດງານກ່ຽວກັບສົນທິສັນຍາເຂດປອດນີວເຄຼຍອາຊີຕາເວັນອອກສຽງໃຕ້ທີ່ໜ່ວຍງານລະດັບສູງອາຊຽນໄດ້ ຮັບຮອງໃນວັນທີ29ກໍລະກົດນີ້.ອີງຕາມແຜນປະຕິບັດງານສະບັບນີ້,ປະເທດສະມາຊິກຕ່າງໆຂອງອາຊຽນຈະໃຊ້ການກະທຳທີ່ເປັນເອກະພາບກັນຕື່ມອີກພາຍໃຕ້ຂອບຂອງສົນທິສັນຍາດັ່ງກ່າວ.ເພີ່ມທະວີການຮ່ວມມືກັບອົງການພະລັງງານປະລະມານູສາກົນ,ແລະຍົກສູງຄວາມສາມາດຂອງຕົນໃນການຕິດຕາມກວດການີວເຄຼຍ.ແຜນການດັ່ງກ່າວຍັງຫວັງໃຫ້ປະເທດອາຊຽນສ້າງກົນໄກເຕືອນໄພອຸບັດຕິເຫດນີວເຄຼຍແລະວາງແຜນການສຸກເສິນຂອງພາກພື້ນ,ພ້ອມທັງເຮັດໃຫ້ການນຳໃຊ້ພະລັງງານນີວເຄຼຍທາງສັນຕິຂອງພາກພື້ນແຫ່ງນີ້ມີລະບຽບແບບແຜນ,ເຮັດໃຫ້ສາມາດປະຕິບັດຕາມຂໍ້ກຳນົດທີ່ກ່ຽວຂ້ອງແລະມາດຕະຖານຄວາມປອດໄພຂອງອົງການພະລັງງານສາກົນ.ແຜນການດຳເນີນງານຍັງຊີ້ອອກວ່າ,ປະເທດອາຊຽນຈະພິຈາລະນາເຂົ້າຮ່ວມສົນທິສັນຍາສາກົນຫຼາຍກວ່າເກົ່າເຊິ່ງລວມທັງສົນທິສັນຍາເກືອດຫ້າມການທົດລອງນີວເຄຼຍຢ່າງຮອບດ້ານ,ສົນທິສັນຍາວ່າດ້ວຍຄວາມປອດໄພດ້ານນີວເຄຼຍແລະອະນຸສັນຍາຂອງອົງການພະລັງງານປະລະມານູສາກົນ.
ໃນບັນຫາສິດແລະຜົນປະໂຫຍດຂອງແຮງງານເຄື່ອນຍ້າຍທີ່ກ່ຽວພັນເຖິງຊີວິດການເປັນຢູ່ຂອງປະຊາຊົນປະເທດອາຊຽນ,ກອງປະຊຸມລັດຖະມົນຕີຕ່າງປະເທດຄັ້ງນີ້ໄດ້ຜ່ານເອກະສານສອງສະບັບທີ່ກຳນົດວິທີປະຕິບັດ"ຖະແຫຼງການປົກປ້ອງແລະຊຸກຍູ້ຜົນປະໂຫຍດຂອງແຮງງານເຄື່ອນຍ້າຍຂອງອາຊຽນ",ພ້ອມດ້ວຍການ ແນະນຳການເຄື່ອນໄຫວຂອງປະເທດອາຊຽນທີ່ສະໜອງຄວາມຊ່ວຍເຫຼືອດ້ານກົງສູນໃຫ້ແກ່ພົນລະເມືອງຂອງປະເທດອາຊຽນຢູ່ປະເທດທີສາມໃນກໍລະນີສຸກເສີນ.
ນອກນີ້,ລັດຖະມົນຕີການຕ່າງປະເທດຂອງປະເທດອາຊຽນຕ່າງໆກໍໄດ້ກ້າວເຖິງຂັ້ນມີຄວາມຮັບຮູ້ຄືກັນສະບັບໜຶ່ງ,ຄື ຈັດເອົາເນື້ອໃນທີ່ມີລັກສະນະຫຼັກການກ່ຽວກັບການສ້າງຄະນະກຳມະການສິດທິມະນຸດອາຊຽນເຂົ້າໃນຮ່າງກົດບັດອາຊຽນ.ທ່ານອານເບີໂຕ ໂຣມູໂລ ປະທານກອງປະຊຸມລັດຖະມົນຕີວ່າການກະຊວງການຕ່າງປະເທດຟິລິບປິນກ່າວວ່າ,ຮ່າງກົດບັດສະບັບນີ້ຈະຍື່ນໃຫ້ຜູ້ນຳປະເທດອາຊຽນ ຕ່າງໆຄົ້ນຄວ້າພິຈາລະນາ,ແລະຫວັງວ່າຈະໄດ້ຮັບການຮັບຮອງໃນກອງປະຊຸມສຸດຍອດອາຊຽນທີ່ຈະຈັດຂຶ້ນຢູ່ສິງກະໂປໃນທ້າຍປີນີ້.
|
