ຕາມຂ່າວCRI:ຈີນຈະດຳເນີນການປັບປຸງຢ່າງຮອບດ້ານຕໍ່ບັນຫາຄຸນນະພາບຂອງຜະລິດຕະພັນແລະຄວາມປອດໄພຂອງອາຫານໃນ4ເດືອນຕໍ່ໜ້າ,ໜ່ວຍງານທີ່ນຳໂດຍທ່ານນາງອູອີ ຮອງນາຍົກລັດຖະມົນຕີຈີນຈະຮັບຜິດຊອບຊີ້ນຳວຽກງານຂອງພາກສ່ວນທີ່ກ່ຽວຂ້ອງຂອງລັດຖະບານຈີນ,ເຊິ່ງສະແດງໃຫ້ເຫັນວ່າ ລັດຖະບານຈີນຈະອອກແຮງປັບປຸງບັນຫາຄຸນນະພາບຂອງຜະລິດຕະພັນແລະຄວາມປອດໄພຂອງອາຫານ,ເພື່ອຮັກສາສັດທາທີ່ມີຕໍ່ຜະລິດຕະພັນທີ່ຜະລິດຢູ່ຈີນ.
ຫວ່າງມໍ່ໆນີ້,ຫຼາຍສື່ມວນຊົນຕ່າງປະເທດໄດ້ລາຍງານບັນຫາຄຸນນະພາບຂອງຜະ ລິດຕະພັນແລະຄວາມປອດໄພຂອງອາຫານທີ່ຜະລິດຢູ່ຈີນຢ່າງຫຼວງຫຼາຍ.ເຖິງວ່າໃນນັ້ນມີສ່ວນໜຶ່ງແມ່ນເພື່ອສ້າງຄວາມສົນໃຈໃຫ້ແກ່ຄົນທົ່ວໄປ ຈົນກະທັ້ງບໍ່ຖືກກັບເລື່ອງຈິງກໍຕາມ,ແຕ່ຂ່າວເຫຼົ່ານີ້ໄດ້ຊີ້ອອກບາງບັນຫາຢູ່ໃນຂົງເຂດຄຸນນະພາບຂອງຜະລິດຕະພັນແລະຄວາມປອດໄພຂອງອາຫານທີ່ຜະລິດຢູ່ຈີນ.ລັດຖະບານຈີນດ້ານໜຶ່ງໄດ້ຕັ້ງໜ້າປັບປຸງວິສາຫະກິດທີ່ມີບັນຫາ,ຍັງໄດ້ສືບສວນທາງອາຍາຕໍ່ຜູ້ຮັບຜິດຊອບຈຳນວນໜຶ່ງ,ອີກດ້ານໜຶ່ງກໍຕັ້ງໜ້າວາງມາດຕະການອອກມາ,ເພີ່ມທະວີການຕິດຕາມຄຸ້ມຄອງຄຸນນະພາບຂອງຜະລິດຕະພັນແລະຄວາມປອດໄພຂອງອາຫານ.
ໃນກອງປະຊຸມຂ່າວທີ່ຈັດຂຶ້ນໃນວັນທີ27ສິງຫານີ້, ທ່ານຫຼີຊາງຈ່ຽງ ຫົວໜ້າກົມໃຫຍ່ຕິດຕາມກວດກາຄຸນນະພາບແລະກວດພະຍາດແຫ່ງຊາດຈີນໄດ້ຈ້ງໃຫ້ຊາບ6ມາດຕະການອັນສຳຄັນທີ່ຈີນປະກາດໃຊ້ໃນດ້ານປັບປຸງຄູນນະພາບຂອງຜະລິດຕະພັນໃນຫວ່າງມໍ່ໆນີ້, ເຊິ່ງລວມທັງປະກາດໃຊ້ "ກົດລະບຽບພິເສດວ່າດ້ວຍການເພີ່ມທະວີການຕິດຕາມຄຸ້ມຄອງອາຫານແລະຜະລິດຕະພັນອື່ນໆ", ສ້າງແຜນການການປັບປຸງໂດຍສະເພາະຄືຄຸນນະພາບຜະລິດຕະພັນແລະຄວາມປອດໄພຂອງອາຫານທີ່ເປັນເວລາ4ເດືອນ, ແລະອື່ນໆ.ທ່ານຫຼີຊາງຈ່ຽງກ່າວວ່າ:"ຂ້າພະເຈົ້າຄິດວ່າ, ພາຍໃນເວລາໜຶ່ງເດືອນລັດຖະບານຈີນໄດ້ປະກາດໃຊ້6ມາດຕະການອັນສຳຄັນ, ເຊິ່ງໄດ້ສະແດງໃຫ້ເຫັນຢ່າງເຕັມສ່ວນວ່າ ລັດຖະບານຈີນແມ່ນໃຫ້ຄວາມສຳຄັນໃນລະດັບສູງຕໍ່ຄຸນນະພາບຂອງຜະລິດຕະພັນແລະຄວາມປອດໄພຂອງອາຫານ, ແມ່ນລັດຖະບານທີ່ມີຄວາມຮັບຜິດ ຊອບ."
ຕາມຂ່າວແຈ້ງວ່າ, ແຜນການສະເພາະເພື່ອປັບປຸງຄຸນນະພາບຂອງຜະລິດຕະພັນແລະຄວາມປອດໄພຂອງອາຫານທີ່ຈີນເລີ່ມຈັດຕັ້ງປະຕິບັດຢ່າງເປັນທາງການໃນວັນທີ25ສິງຫານີ້, ຈະມີ8ດ້ານເປັນຈຸດໜັກ, ເຊັ່ນ ຜະລິດຕະພັນກະສິກຳ ອາຫານປຸງແຕ່ງ ການບໍລິໂພກໃນຮ້ານກິນດື່ມ ຜະລິດຕະພັນຂາເຂົ້າຂາອອກແລະຜະລິດຕະພັນທີ່ກ່ຽວພັນເຖິງສຸຂະພາບມະນຸດເປັນຕົ້ນ.
ທ່ານຫຼີຊາງຈ່ຽງມີຄວາມໝັ້ນໃຈອັນເຕັມປ່ຽມຕໍ່ແຜນການປັບປຸງສະເພາະຄັ້ງນີ້,ທ່ານກ່າວວ່າ:"ຕາມການຈັດວາງເບື້ອງຕົ້ນ,ການເຄື່ອນໄຫວປັບປຸງເທື່ອນີ້ຈະດຳເນີນເປັນເວລາ4ເດືອນ,ຕ້ອງໄດ້ຮັບໝາກຜົນອັນເດັ່ນຊັດພາຍໃນ4ເດືອນ.ນີ້ຈະເປັນຂີດໝາຍສະແດງໃຫ້ເຫັນວ່າ,ຄຸນນະພາບຂອງຜະລິດຕະພັນແລະຄວາມປອດໄພຂອງອາຫານຈີນຈະໄດ້ກ້າວຂຶ້ນສູ່ຂັ້ນໃໝ່,ຈະເຮັດໃຫ້ປະເທດຕ່າງໆໃນໂລກເຊື່ອໝັ້ນຜະລິດຕະພັນທີ່ ຜະລິດຢູ່ຈີນ,ເຊື່ອໝັ້ນຜະລິດຕະພັນຈີນ."
ແຕ່ຍ້ອນວ່າຜະລິດຕະພັນທີ່ຜະລິດຢູ່ຈີນໄດ້ກ່ຽວພັນເຖິງວິສາຫະກິດຈີນແລະວິສາຫະກິດຕ່າງປະເທດ,ສະນັ້ນ,ຖ້າຢາກຍົກສູງຄຸນນະພາບຂອງຜະລິດຕະພັນທີ່ຜະລິດຢູ່ຈີນ,ນອກຈາກວິສາຫະກິດຈີນແລ້ວ,ວິສາຫະກິດຕ່າງປະເທດກໍ ມີໜ້າທີ່ຮັບຜິດຊອບໃນລະດັບໃດໜຶ່ງ.ຕົວຢ່າງຄື,ບໍລິສັດມັດເຕວອາເມລິກາໄດ້ຮຽກຮ້ອງໃຫ້ເກັບຄືນເຄື່ອງຫຼິ້ນເດັກນ້ອຍ20ລ້ານ2ແສນເຄື່ອງທີ່ຂາຍຢູ່ໃນຂອບເຂດທົ່ວໂລກ,ໃນນັ້ນ,ມີ85%ແມ່ນອອກແບບໂດຍຝ່າຍອາເມລິກາ,ແລະຜະລິດຕາມຄວາມຮຽກຮ້ອງຂອງບໍລິສັດຂາເຂົ້າຂອງອາເມລິກາ,ແຕ່ການອອກແບບຂອງຜະລິດຕະພັນເຫຼົ່ານີ້ກໍມີບັນຫາອັນໜັກໜ່ວງ.
ໃນງານຖະແຫຼງຂ່າວທີ່ຈັດຂຶ້ນໃນຫວ່າງມໍ່ໆນີ້,ເຈົ້າໜ້າທີ່ກະຊວງການຄ້າຈີນກໍໄດ້ກ່າວວ່າ:ຮູບແບບການຄ້າຜະລິດຕະພັນທີ່ຜະລິດຢູ່ຈີນມີເຄິ່ງໜຶ່ງຂຶ້ນໄປແມ່ນການຄ້າປຸງແຕ່ງ,ຜະລິດຕະພັນການຄ້າປຸງແຕ່ງລ້ວນແຕ່ແມ່ນຜະລິດຕາມຄວາມຮຽກຮ້ອງຂອງບໍລິສັດສັ່ງຊື້ສິນຄ້າຂອງຕ່າງປະເທດແລະມາດຕະຖານສາກົນ.ຝ່າຍຈີນຫວັງໃຫ້ບໍລິສັດຕ່າງປະເທດທີ່ກ່ຽວຂ້ອງຮ່ວມກັບບໍລິສັດຈີນເພື່ອພ້ອມກັນຍົກສູງຄຸນນະພາບຂອງຜະລິດຕະພັນທີ່ຜະລິດຢູ່ຈີນ.
|
