|
ຕາມຂ່າວ CRI: ວັນທີ 11 ຕຸລານີ້, ສະພາຄວາມໝັ້ນຄົງສະຫະປະຊາຊາດໄດ້ອອກຖະແຫຼງການຂອງປະທານ, ຮຽກຮ້ອງໃຫ້ລັດຖະບານມຽນມາເຈລະຈາກັບຝ່າຍຄັດຄ້ານ, ເພື່ອບັນລຸຄວາມປອງດອງຊາດທີ່ມີທຸກຝ່າຍເຂົ້າຮ່ວມ ພາຍໃຕ້ການຊ່ວຍເຫຼືອໂດຍກົງຂອງສະຫະປະຊາຊາດ.
ໃນຖະແຫຼງການໄດ້ຮຽກຮ້ອງໃຫ້ລັດຖະບານມຽນມາ ແລະຝ່າຍອື່ນໆທີ່ກ່ຽວຂ້ອງ ປະສານກັນ ເພື່ອຜ່ອນຄາຍສະຖານະການ, ແກ້ໄຂບັນຫາດ້ວຍສັນຕິວິທີ. ຖະແຫຼງການຍັງຮຽກຮ້ອງໃຫ້ລັດຖະບານມຽນມາ ສ້າງເງື່ອນໄຂທີ່ຈຳເປັນ ເພື່ອຈັດການເຈລະຈາແທ້ຈິງກັບຝ່າຍຄັດຄ້າຍ, ແລ້ວບັນລຸຄວາມປອງດອງຊາດທີ່ມີທຸກຝ່າຍເຂົ້າຮ່ວມ ພາຍໃຕ້ການຊ່ວຍເຫຼືອໂດຍກົງຂອງສະຫະປະຊາຊາດ.
ຖະແຫຼງການຍັງຮຽກຮ້ອງໃຫ້ລັດຖະບານມຽນມາໃຊ້ມາດຕະການທີ່ຈຳເປັນໝົດທຸກຢ່າງ, ແກ້ໄຂບັນຫາດ້ານການເມືອງ ເສດຖະກິດ ແລະ ມະນຸດສະທຳ ທີ່ປະຊາຊົນມຽນມາເອົາໃຈໃສ່, ແລະກ່າວເນັ້ນວ່າ ອະນາຄົດຂອງມຽນມາແມ່ນຢູ່ໃນກຳມືຂອງປະຊາຊົນທຸກຖ້ວນໜ້າຂອງມຽນມາ.
ວັນທີ 11 ຕຸລານີ້, ທ່ານບານກີມູນ ເລຂາທິການໃຫຍ່ສະຫະປະຊາຊາດໄດ້ອອກຖະແຫຼງ ການກ່າວວ່າ, ທ່ານຈະແຕ່ງທ່ານອີບຣາຮິມ ກຳບາຣີ ທູດພິເສດກ່ຽວກັບບັນຫາມຽນມາ ໄປເຂດອາຊີ ເພື່ອໄກ່ເກ່ຍສະຖານະການມຽນມາ. ຖະແຫຼງການຂຽນວ່າ, ທ່ານກຳບາຣີ ຈະເລີ່ມອອກເອີນທາງໃນທ້າຍອາທິດນີ້, ທ່ານຈະໄປຢ້ຽມຢາມໄທ ມາເລເຊຍ ອິນໂດເນເຊຍ ອິນເດຍ ຈີນແລະຍີ່ປຸ່ນ ນັບແຕ່ວັນທີ 15 ຕຸລານີ້ເປັນຕົ້ນໄປ, ຫຼັງຈາກນັ້ນ ກໍມີແຜນຈະໄປຢ້ຽມຢາມມຽນມາ.
|
