ຕາມ​ຂ່າວ CRI: ວັນ​ທີ 18 ຕຸລາ​ນີ້, ​ທ່ານ​ລີ​ເສ​ຈີ ລັດຖະມົນຕີ​ວ່າການ​ກະຊວງ​ການ​ປົກ​ຄອງ​ແລະ​ປະຊາ​ສົງ​ເຄາະ​ຈີນ ​ໄດ້​ໃຫ້​ສຳພາດ​ຕໍ່​ນັກ​ຂ່າວ ​ຢູ່​ສູນ​ຖະ​ແຫຼ​ງຂ່າວ​ກອງ​ປະ​ຊຸມ​ໃຫຍ່​ຄັ້ງ​ທີ 17 ຂອງ​ພັກ​ກອມ​ມູນິດຈີນ, ທ່ານ​ລີ​ເສ​ຈີ​​ໄດ້​ຕອບ​ຄຳ​ຖາມ​ຂອງ​ນັກ​ຂ່າວ​ວິ​ທະ​ຍຸ CRI ​ໂດຍກ່າວ​ວ່າ, ປັດຈຸບັນ ຊາວ​ກະສິກອນຈີນ 25 ລ້ານ​ຄົນ ​ໄດ້​ຖືກ​ຈັດ​​ເຂົ້າ​ໃນ​ລະ​ບົບ​ປະ​ກັນ​ຊີ​ວິດ​ການ​ເປັນ​ຢູ່​ລະດັບ​ຕ່ຳ​ສຸດ, ຮອດ​ທ້າຍ​ປີ​ນີ້, ມີ​ຫວັງ​ຈະ​ເພີ່ມ​ຂຶ້ນຮອດ 30 ລ້ານ​ຄົນ.

ທ່ານ​ລີ​ເສ​ຈີ​ກ່າວ​ວ່າ, 10 ປີກ່ອນ ຈີນ​ເລີ່​ມສ້າງ​ລະບົບ​ປະກັນ​ຊີວິດ​ການ​ເປັນ​ຢູ່​ລະ​ດັບ​ຕ່ຳ​ສຸດ​ໃນ​ຕົວ​ເມືອງ, ປະຊາຊົນ​ໃນ​ຕົວ​ເມືອງ​ທີ່​ຖືກ​ຈັດ​​ເຂົ້າ​ໃນ​ລະບົບ​ດັ່ງ​ກ່າວ ​ມີ 22 ລ້ານ​ຄົນ​. ປີ​ນີ້ ລະບົບ​ດັ່ງກ່າວ​ກໍ​ເລີ່​ມສ້າງຕັ້ງຂຶ້ນຢູ່​ເຂດ​ຊົນນະບົດ.

ທ່ານ​ລີ​ເສ​ຈີ​ກ່າວ​ວ່າ, ນອກຈາກ​ສ້າງ​ລະບົບ​ປະກັນ​ຊີວິດ​ການ​ເປັນ​ຢູ່​ລະດັບ​ຕ່ຳ​ສຸດ​ຢູ່​ໃນ​ຕົວ​ເມືອງ​ ​ແລະ ​ເຂດ​ຊົນນະບົດແລ້ວ, ຈີນ​ຍັງໄດ້​ສ້າງ​ລະບົບ​ຊ່ວຍ​ເຫຼືອກ​ອບກູ້​ປະ​ເພດ​ຕ່າງໆ ​ເຊັ່ນ ລະ​ບົບ​ກອບ​ກູ້​ຊາວ​ປະສົບ​ໄພ​ຊົ່ວຄາວ ລະບົບ ຊ່ວຍ​ເຫຼືອ​ກອບ​ກູ້​ການ​ປິ່ນປົວ​ພະ​ຍາດ​ໃນ​ຕົວ​ເມືອງ​ແລະ​ເຂດ​ຊົນນະບົດ ​ແລະ ລະບົບ​ຊ່ວຍ​ເຫຼືອກ​ອບກູ້​ຜູ້​ພະ​ເນ​ຈອນຂໍ​ທານ​, ນັບ​ມາ​ຮອດ​ປັດ​ຈຸ​ບັນ ​ໄດ້​ຊ່ວຍ​ເຫຼືອກ​ອບກູ້​ 150 ລ້ານ​ຄົນ​ແລ້ວ, ​ນີ້ໄດ້​ຮັບປະກັນ​ຊີວິດ​ການ​ເປັນ​ຢູ່​ອັນ​ພື້ນ​ຖານ​ຂອງ​ກຸ່ມ​ຄົນ​ທຸກ​ຍາກ​ຂອງ​ຈີນ ຢ່າງ​ບັງ​ເກີດ​ຜົນ.