ຕາມຂ່າວ CRI: ໃນກອງປະຊຸມຂ່າວທີ່ຈັດຂຶ້ນຢູ່ທີ່ປັກກິ່ງໃນວັນທີ 23 ຕຸລານີ້, ທ່ານ​ລິວ​ຈ້ຽນ​ຊ່າວ ໂຄ​ສົກກະຊວງ​ການ​ຕ່າງປະເທດຈີນກ່າວວ່າ, ຈີນຈະສືບຕໍ່​ເສີມ​ຂະຫຍາຍ​ບົດ​ບາດ​ເທົ່າ​ທີ່​ຄວນ ​ໃນ​ບັນ​ຫາ​ນິວ​ເຄຼຍ​ແຫຼມເກົາຫຼີ ດ້ວຍ​ທ່າ​ທີ​ຮັບຜິດຊອບ.

ນັກ​ຂ່າວ ສ.​ເກົາຫຼີ​ຖາມ​ວ່າ, ພັກ​ກອມ​ມູນິດ​ຈີນ​ຫາ​ກໍ່​ເລືອກ​ຕັ້ງກຳມະການ​ປະຈຳ​ກົມ​ການ​ເມືອງ​ສູນ​ກາງ​ຊຸດ​ໃໝ່, ນີ້ຈະມີຜົນສະທ້ອນຕໍ່​ນະ​ໂຍບາຍ​ຂອງ​ຈີນ​ໃນບັນຫາ​ນິວ​ເຄຼຍ​ແຫຼມ​ເກົາຫຼີຫຼືບໍ່. ຕໍ່​ບັນຫາ​ນີ້, ທ່ານ​ລິວ​ຈ້ຽນຊ່າວ​ກ່າວ​ວ່າ, ການບັນລຸຄວາມປາສະ​ຈາກ​ນິວ​ເຄຼຍຢູ່​ແຫຼມ​ເກົາຫຼີ ຊຸກ​ຍູ້​ຂະ​ບວນການ​ເຈລະຈາ 6 ຝ່າຍ, ​ແມ່ນໜ້າທີ່​ສຳຄັນ​ອັນ​ໜຶ່ງ​ຂອງ​ການ​ຕ່າງປະ​ເທດ​ຂອງຈີນ. ຈີນ​ຈະ​ສືບ​ຕໍ່​ຊຸກ​ຍູ້​ການ​ສ້າງສາໂລກກົມກຽວ​ກັນ​ທີ່​ມີສັນ​ຕິ​ພາບ​ຖາວອນ ຈະ​ເລີ​ນຮຸ່ງ​ເຮືອງ​ພ້ອມ​ກັນ ​ເຊິ່ງລວມທັງ​ແຫຼມ​ເກົາຫຼີ. ຈີນຈະ​ສືບ​ຕໍ່​ຍຶດໝັ້ນ​ເດີນ​ໄປ​ຕາມ​ເສັ້ນ​ທາງ​ພັດ​ທະນາໂດຍສັນຕິ, ​ໃນ​ຂະນະ​ດຽວ​ກັນ ຈະ​ຍຶດໝັ້ນຍຸດ​ທະ​ສາດ​ເປີດ​ປະຕູ​ສູ່​ພາຍ​ນອກ ເຊິ່ງ​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດ.

ທ່ານ​ເຜີຍ​ໃຫ້​ຮູ້​ວ່າ, ຈີນ​ຈະສົ່ງຄະນະ​ຜູ້​ແທນ​ໄປ​ເຂົ້າຮ່ວມ​ກອງ​ປະຊຸມ​ຄັ້ງທີ 3 ຂອງ​ໜ່ວຍ​ງານ​ການ​ຮ່ວມ​ມື​ດ້ານ​ເສດຖະກິດ​ແລະ​ພະລັງງານ​ຂອງ​ການ​ເຈລະຈາ 6 ຝ່າຍ ທີ່​ຈະ​ໄຂ​ຂຶ້ນຢູ່​ປານ​ມູນ​ຈອມ​ໃນ​ວັນ​ທີ 29 ຕຸລາ​ນີ້.