|
ຕາມຂ່າວສານຊິນຮວາ: ວັນທີ 24 ຕຸລານີ້ ຢູ່ທີ່ນິວຢອກ, ທ່ານຈອນ ເນໂກຣພົງທ໌ ລັດຖະມົນຕີຊ່ວຍວ່າການປະຈຳການຂອງກະຊວງການຕ່າງປະເທດອາເມລິກາກ່າວວ່າ, ການພົວພັນກັບຈີນແມ່ນການພົວພັນໜຶ່ງລະຫວ່າງສອງຝ່າຍທີ່ສຳຄັນທີ່ສຸດໃນການພົວພັນກັບຕ່າງປະເທດຂອງອາເມລິກາ, ການພົວພັນລະຫວ່າງອາເມລິກາກັບຈີນ "ມີຄວາມສຳຄັນຫຼາຍ" ຕໍ່ການເຮັດໃຫ້ນະໂຍບາຍການຕ່າງປະເທດຂອງອາເມລິກາ ໄດ້ຮັບຜົນສະເລັດ.
ໃນມື້ດຽວກັນ, ທ່ານເນໂກຣພົງທ໌ ໄດ້ກ່າວຄຳປາໄສ ໃນງານມອບລາງວັນແລະລ້ຽງອາຫານຄ່ຳເພື່ອບໍລິຈາກເງິນ ເຊິ່ງແມ່ນຄະນະກຳມະການທົ່ວປະເທດກ່ຽວກັບການພົວພັນອາເມລິກາກັບຈີນຈັດຂຶ້ນປີລະເທື່ອ, ທ່ານກ່າວວ່າ, ອາເມລິກາກັບຈີນມີການຮ່ວມມືກັນຢ່າງກວ້າງຂວາງໃນຫຼາຍບັນຫາສາກົນ. ໃນຫຼາຍປີມານີ້, ປະມຸກລັດຂອງສອງປະເທດໄດ້ພົບປະກັນປີລະຫຼາຍເທື່ອ, ເຈົ້າໜ້າທີ່ຊັ້ນສູງຂອງລັດຖະບານສອງປະເທດກໍໄດ້ຈັດການພົບປະກັນເປັນປະຈຳ, ກົນໄກການເຈລະຈາທາງການທູດຊັ້ນສູງ ທີ່ຜູ້ນຳຂອງສອງປະເທດລິເລີ່ມສົ່ງເສີມ ເຊັ່ນ ການເຈລະຈາດ້ານເສດຖະກິດຍຸດທະສາດ ແລະ ການເຈລະຈາຍຸດທະສາດເປັນຕົ້ນ ໄດ້ດຳເນີນໄປຢ່າງສະດວກ.
ທ່ານເນໂກຣພົງທ໌ໄດ້ກ່າວຢ້ຳຫຼັກໝັ້ນຂອງອາເມລິກາໃນບັນຫາໄຕ້ຫວັນ. ທ່ານຊີ້ອອກວ່າ, ອາເມລິກາບໍ່ສະໜັບສະໜູນໄຕ້ຫວັນເປັນເອກະລາດ, ຄັດຄ້ານຝ່າຍໃດໆປ່ຽນແປງສະພາບການພົວພັນລະຫວ່າງສອງຝັ່ງແຕ່ຝ່າຍດຽວ, ບັນຫາທີ່ກ່ຽວຂ້ອງ ຄວນໃຫ້ປະຊາຊົນສອງຝັ່ງແກ້ໄຂດ້ວຍສັນຕິວິທີ.
|
