ຕາມ​ຂ່າວສາ​ນຊິນ​ຮວາ: ວັນ​ທີ 25 ຕຸລາ​ນີ້ ​ໂທລະພາບ​ແຫ່ງ​ຊາດ​ມຽນມາລາ​ຍງານ​ວ່າ, ຕອນ​ບ່າຍ​ມື້​ດຽວ​ກັນ, ທ່ານ​ອູ​ອອງກີ ລັດຖະມົນຕີ​ຜູ້​ໃໝ່​ຂອງກະຊວງ​ແຮງ​ງານ​ ​ເຈົ້າ​ໜ້າ​ທີ່​ຕິດ​ຕໍ່​ພົວ​ພັນ​ລະ​ດັບລັດຖະມົນຕີຂອງ​ມຽນມາ ​ໄດ້​ພົບ​ປະ​ນາງ​ອອງ​ຊານ​ຊູ​ກີ ​ເລ​ຂາ​ທິ​ການ​ໃຫຍ່​ສະ​ຫະ​ພັນ​ປະຊາທິປະ​ໄຕ​ແຫ່ງຊາດມຽນມາ ທີ່​ຖືກ​ກັກ​ບໍ​ລິ​ເວນ ຢູ່​ຫໍ​ຮັບ​ແຂກ​ເມືອງ​ຢາງ​ກຸງ.

ຂ່າວ​ແຈ້ງວ່າ, ນີ້​ແມ່ນ​​ເຈົ້າໜ້າ​ທີ່​ລະດັບສູງຂອງ​ລັດຖະບານ​ມຽນມາ ພົບປະ​ກັບ​ນາງ​ອອງ​ຊານ​ຊູ​ກີຢ່າງ​ເປັນ​ທາງ​ການຄັ້ງທຳ​ອິດ ນັບແຕ່ລັດຖະບານ​ມຽນມາ​ປະກາດ​ວ່າ​ຍິນ​ດີ​ເຈ​ລະ​ຈາ​ກັບ​ນາງ​ຢ່າງ​ມີ​ເງື່ອນ​ໄຂ ເມື່ອ​ວັນ​ທີ 4 ຕຸລາ​ມານີ້. ​ຝ່າຍທາງ​ການ​ມຽນມາ​ບໍ່​ໄດ້​​ເຜີຍ​ໃຫ້​ຮູ້​ເນື້ອ​ໃນ​ຂອງ​ການ​ພົບ​ປະ.

ວັນ​ທີ 4 ຕຸລາ​ນີ້, ລັດຖະບານ​ມຽນມາ​ໄດ້​ອອກ​ຖະ​ແຫຼ​ງການ​ວ່າ, ​ໃນ​ເວລາ​ທ່ານ​ພົນ​ເອກ​ພິເສດຕັນສະເວ ປະທານ​ຄະນະ​ກຳມະການ​ສັນຕິພາບ​ແ​ລະກາ​ນພັດທະນາ​ແຫ່ງ​ລັດ​ມຽນມາ ພົບ​ປະ​ທ່ານອີ​ບຣາຮິມ ກຳ​ບາຣີ ທູດ​ພິ​ເສດ​ເລຂາທິການ​ໃຫຍ່​ສະຫະ​ປະຊາ​ຊາດ​ທີ່​ມາ​ຢ້ຽມຢາມ, ທ່ານ​ຕັນ​ສະເວ​ກ່າວ​ວ່າ, ທ່ານ​ຍິນ​ດີ​ເຈລະຈາ​ກັບ​ນາງ​ອອງຊານ​ຊູ​ກີຢ່າງ​ມີ​ເງື່ອນ​ໄຂ. ວັນ​ທີ 8 ຕຸລານີ້, ລັດຖະບານ​ມຽນມາ ​ໄດ້​ແຕ່ງຕັ້ງທ່ານ​ອູ​ອອງກີ​ເປັນ​ເຈົ້າໜ້າ​ທີ່​​ຕິດ​ຕໍ່​ພົວພັນລະດັບລັດຖະມົນຕີ, ຮັບຜິດຊອບ​ການຕິດ​ຕໍ່ພົວພັນ​ກັບ​ນາງ​ອອງຊານ​ຊູ​ກີ.