|
|
 |
| (GMT+08:00)
2007-10-27 18:29:49
|
 |
|
ງານວາງສະແດງສິນຄ້າຈີນອາຊຽນຄັ້ງທີ4ຈະຈັດຂຶ້ນໃນໄວໆນີ້
cri
Author: da
ງານວາງສະແດງສິນຄ້າຈີນອາຊຽນຄັ້ງທີ4ຈະຈັດຂຶ້ນຢູ່ເມືອງນານນິງ ເທດສະບານເຂດປົກຄອງຕົນເອງເຜົ່າຈ້ວງກວາງຊີຂອງຈີນແຕ່ວັນທີ28ຮອດ31ຕຸລານີ້.ເລີ່ມແຕ່ມື້ນີ້ຮອດວັນທີ31ຕຸລາ,ວິທະຍຸCRIພວກເຮົາຈະອອກອາກາດລາຍການພິເສດ"ຈີນກັບອາຊຽນ"ທຸກມື້,ເພື່ອລາຍງານຂ່າວງານວາງສະແດງສິນຄ້າຈີນອາຊຽນສູ່ທ່ານຟັງ.ງານວາງສະແດງສິນ ຄ້າຈີນອາຊຽນແມ່ນທ່ານເວີນເຈຍປາວ ນາຍົກລັດຖະມົນຕີຈີນເປັນຜູ້ລິເລີ່ມ,ແມ່ນງານມະໂຫລານທີ່ແລກປ່ຽນທາງເສດຖະກິດການຄ້າລະດັບຊາດແລະລະດັບສາກົນທີ່ພາກສ່ວນຄຸ້ມຄອງເສດຖະກິດການຄ້າຂອງຈີນແລະ10ປະເທດອາຊຽນເປັນຜູ່ຈັດ,ຈັດຂຶ້ນຢູ່ເມືອງນານນິງເຂດກວາງຊີຂອງຈີນທຸກປີ. ງານວາງສະແດງສິນຄ້າມີຈຸດປະສົງ"ຊຸກຍູ້ການສ້າງເຂດການຄ້າເສລີຈີນອາຊຽນ,ພ້ອມກັນຊົມໃຊ້ໂອກາດຮ່ວມມືແລະພັດທະນາ",ກວມເນື້ອໃນ3ດ້ານຄືການຄ້າສິນຄ້າ ການຮ່ວມມືລົງທຶນແລະການຄ້າການບໍລິການ,ແມ່ນແທ່ນໃໝ່ແຫ່ງການເປີດກວ້າງການແລກປ່ຽນແລະການຮ່ວມມືການຄ້າລະ ຫວ່າງຈີນກັບອາຊຽນ.
ນັບແຕ່ປີ2004ເປັນຕົ້ນມາ,ງານວາງສະແດງສິນຄ້າຈີນອາຊຽນໄດ້ຈັດຂຶ້ນ3ຄັ້ງຢ່າງສຳເລັດຜົນແລ້ວ,ໄດ້ຮັບໝາກຜົນໃນດ້ານການຄ້າສິນຄ້າແລະການຮ່ວມມືລົງທຶນຢ່າງລຽນຕິດ.ສະນັ້ນ,ງານວາງສະແດງສິນຄ້າຈີນອາຊຽນຄັ້ງທີ4ນີ້ຈະມີຈຸດເດັ່ນໃໝ່ຫຍັງແດ່?ທ່ານວັງເລີຍ ຮອງເລຂາທິການກອງເລຂາງານວາງສະແດງສິນຄ້າຈີນອາຊຽນແນະນຳວ່າ:
"ໜຶ່ງ,ແມ່ນເລີ່ມແຕ່ງານວາງສະແດງສິນຄ້າຈີນອາຊຽນຄັ້ງນີ້,ພວກຂ້າພະເຈົ້າໄດ້ປະກາດກົນໄກຂອງປະເທດຫົວຂໍ້ຫຼັກເປັນຄັ້ງທຳອິດ,ຈຸດເດັ່ນທີສອງແມ່ນຊຸກຍູ້ການຮ່ວມມືຢ່າງແທ້ຈິງ.ປີນີ້ໄດ້ປະກາດຫົວຂໍ້ໃໝ່,ນັ້ນກໍແມ່ນການຮ່ວມມືລະຫວ່າງທ່າກ່ຳປັ່ນຂອງຈີນກັບອາຊຽນ,ຈະຈັດເວທີປຶກສາຫາລືການຮ່ວມມືແລະການພັດທະນາລະຫວ່າງ ທ່າກ່ຳປັ່ນຈີນອາຊຽນ;ສາມແມ່ນງານວາງສະແດງສິນຄ້າຄັ້ງນີ້ ຈະເຈາະຈົງຍົກປະສິດທິຜົນທາງເສດຖະກິດການຄ້າຂອງງານວາງສະແດງສິນຄ້າໃຫ້ສູງຂຶ້ນ,ຍົກລະດັບວິຊາການຂອງງານວາງສະແດງໃຫ້ສູງຂຶ້ນ."
ອີງຕາມຄວາມຮັບຮູ້ຄືກັນທີ່ບັນດາຝ່າຍທີ່ຮ່ວມກັນຈັດງານວາງສະແດງສິນຄ້າຈີນອາຊຽນຄັ້ງທີ4ກ້າວເຖິງຂັ້ນຕົກລົງກັນນັ້ນ,ນັບແຕ່ປີນີ້ເປັນຕົ້ນໄປ,ງານວາງສະແດງສິນຄ້າຈີນອາຊຽນທຸກຄັ້ງຈະເຊື້ອເຊີນ1ຫຼື2ປະເທດອາຊຽນເປັນປະເທດຫົວຂໍ້ຫຼັກ."ປະເທດຫົວຂໍ້ຫຼັກ"ປີນີ້ແມ່ນບຼູໄນ.ໃນໄລຍະງານວາງສະແດງ,ອົງມຸງກຸດລາຊະກຸມານບຼູໄນຈະນຳພາຄະນະຜູ່ແທນເຂົ້າຮ່ວມງານວາງສະແດງສິນຄ້າຢູ່ເມືອງນານນິງເຂດກວາງຊີຂອງຈີນ,ງານວາງສະແດງຈະແນະນຳປະເພດຫົວຂໍ້ຫຼັກເປັນຈຸດໜັກ.
ນອກນັ້ນ, ການວາງສະແດງຫົວຂໍ້ສະເພາະ "ເມືອງສະເໜ່"ໄດ້ກາຍເປັນຈຸດຮຸ່ງທີ່ຈັບຕາຄົນຫຼາຍທີ່ສຸດໃນງານວາງສະແດງສິນຄ້າຈີນອາຊຽນ. ເພື່ອປະສານສົມທົບກັບຫົວຂໍ້ທີ່ວ່າເພີ່ມທະວີການຮ່ວມມືລະຫວ່າງທ່າກ່ຳປັ່ນ, ເມືອງສະເໜ່ຂອງງານວາງສະແດງຄັ້ງນີ້ລ້ວນແຕ່ແມ່ນເມືອງທ່າກ່ຳປັ່ນ, 11ເມືອງສະເໜ່ເຫຼົ່ານີ້ແມ່ນ, ເມືອງທຽນສິນຂອງຈີນ, ສະຫວັນນະເຂດຂອງລາວ,ຮາລົງຂອງຫວຽດນາມ, ເມືອງສິຫະນຸກຂອງກຳປູເຈຍ,ຈັງຫວັດຊົນບູລີຂອງໄທ, ບາເລມບັງຂອງອິນໂດເນເຊຍ,ເກລາງຂອງຂອງມາເລເຊຍ, ຢາງກຸງຂອງມຽນມາ,ອ່າວຊູບິກຂອງຟິລິບປິນ, ເມືອງສິງກະໂປຂອງສິງກະໂປແລະບັນດາສີລິເບກາວັນຂອງບຼູໄນ.
ຕາມຂ່າວແຈ້ງວ່າ, ງານວາງສະແດງປີນີ້ໄດ້ຕັ້ງຮ້ານວາງສະແດງທີ່ໄດ້ມາດຕະຖານສາກົນລວມ3000ຮ້ານ, ສິນຄ້າວາງສະແດງກ່ຽວພັນເຖິງກົນຈັກ ເຄື່ອງເອເລັກໂຕຼນິກເຄື່ອງໄຟຟ້າແລະວັດສະດຸກໍ່ສ້າງເປັນຕົ້ນ.
ໃນປີມໍ່ໆມານີ້, ການຮ່ວມມືລະຫວ່າງຈີນກັບປະເທດອາຊຽນໃນຂົງເຂດເສດຖະກິດການຄ້າແລະການລົງທຶນໄດ້ລົງສູ່ລວງເລິກເລື້ອຍໆ. ເພື່ອຕອບສະໜອງກັບຄວາມຕ້ອງການໃໝ່ໃນການສ້າງສາເຂດການຄ້າເສລີຈີນອາຊຽນ, ຊຸກຍູ້ແກ້ໄຂບັນຫາຕ່າງໆໃນດ້ານນະໂຍບາຍ ກົດລະບຽບ ກົນໄກໃຫ້ແກ່ການຮ່ວມມືເສດຖະກິດການຄ້າຂອງສອງຝ່າຍ, ງານວາງສະແດງສິນຄ້າຈີນອາຊຽນໄດ້ຮັບການບູລະນະແລະປະດິດສ້າງໃໝ່ໃນດ້ານເນື້ອໃນ ຮູບການແລະກົນໄກ, ງານວາງສະແດງທຸກຄັ້ງໄດ້ຮັບຄວາມຍ້ອງຍໍຈາກເຈົ້າໜ້າທີ່ແລະນັກທຸລະກິດຂອງຈີນແລະປະເທດອາຊຽນ.
ໃນເວລາໃຫ້ສຳພາດ, ທ່ານວາງເລີຍກ່າວວ່າ, ງານວາງສະແດງສິນຄ້າຈີນອາຊຽນໄດ້ຮັບຜົນສຳເລັດແມ່ນຍ້ອນປັດໄຈສອງດ້ານ. ທ່ານເວົ້າວ່າ, ໜຶ່ງແມ່ນຍ້ອນວ່າຜູ້ນຳຈີນແລະປະເທດອາຊຽນໄດ້ໃຫ້ຄວາມສຳຄັນຫຼາຍ, ແມ່ນໝາກຜົນທີ່ພາກສ່ວນທີ່ກ່ຽວຂ້ອງຂອງຈີນແລະອາຊຽນທຳຄວາມພະ ຍາຍາມພ້ອມກັນ. ອີກດ້ານໜຶ່ງ, ການກຳເນີດແລະຜົນສຳເລັດຂອງງານວາງສະແດງສິນຄ້າຈີນອາຊຽນແມ່ນໝາກຜົນທີ່ປິ່ນອ້ອມການຂະຫຍາຍຕົວຂອງການພົວພັນການເມືອງເສດຖະກິດລະຫວ່າງຈີນກັບອາຊຽນ, ໂດຍສະເພາະແມ່ນຂະບວນການສ້າງສາເຂດການຄ້າເສລີຈີນອາຊຽນ.
|
|
|
