ວັນທີ28ຕຸລານີ້, ງານວາງສະແດງສິນຄ້າຈີນອາຊຽນແລະກອງປະຊຸມສຸດຍອດວຽກງານການຄ້າແລະການລົງທຶນຄັ້ງທີ4ໄດ້ຈັດຂຶ້ນຢູ່ເມືອງນານນິງເຂດກວາງຊີ ພາກຕາເວັນຕົກສຽງໃຕ້ຂອງຈີນ. ໃນເວລາເຂົ້າຮ່ວມກິດຈະກຳທີ່ກ່ຽວຂ້ອງ, ທ່ານເຈິ່ງເພີຍອຽນ ຮອງນາຍົກລັດຖະມົນຕີຈີນກ່າວວ່າ, ປະຈຸບັນ, ຈີນກັບອາຊຽນໄດ້ສ້າງການພົວພັນຄູ່ຮ່ວມມືຍຸດທະສາດ, ຫວັງໃຫ້ເພີ່ມທະວີການຮ່ວມມືລະຫວ່າງຈີນກັບອາຊຽນໃນຂົງເຂດຕ່າງໆເລື້ອຍໆ, ເຊັ່ນການເມືອງ ເສດຖະກິດ ແລະວັດທະນະທຳເປັນຕົ້ນ. ຕໍ່ໄປເຊີນຟັງການລາຍງານລະອຽດ.
ງານວາງສະແດງສິນຄ້າຈີນອາຊຽນໄດ້ສະໜອງພື້ນຖານວາງສະແດງແລະຄ້າຂາຍໃຫ້ແກ່ສິນຄ້າຂອງວະສາຫະກິດຈີນແລະປະເທດອາຊຽນ, ແລະໄດ້ສະໜອງຂົວຕໍ່ໃຫ້ແກ່ການລົງທຶນເຊິ່ງກັນແລະກັນ, ຊຸກຍູ້ການຮ່ວມມືໃນຂົງເຂດການທ່ອງທ່ຽວແລະວິທະຍາສາດເຕັກນິກແລະຂົງເຂດອື່ນໆ. ງານວາງສະແດງສິນຄ້າຈີນອາຊຽນຄັ້ງທີ4ທີ່ຈັດຂຶ້ນໃນວັນທີ28ຕຸລານີ້ໄດ້ລິເລິ່ມຈັດວາງກົນໄກປະເທດຫົວຂໍ້ຫຼັກ, ຈັດກິດຈະກຳສະເໜີປະເທດຫົວຂໍ້ຫຼັກ, ແລະເຈາະຈົງຊຸກຍູ້ໂຄງການຮ່ວມມືລະຫວ່າງຈີນກັບອາຊຽນໃນຂົງເຂດຈຸດໜັກ.
ປະເທດຫົວຂໍ້ຫຼັກໃນງານວາງສະແດງຄັ້ງນີ້ແມ່ນບຼູໄນ, ໃນເວລາຊົງກ່າວຄຳປາໄສໃນພິທີຈັດງານ, ສົມເດັດ ເດັດອານ ມູທາດີ ບີນລາ ອົງມົງກຸດລາຊະກຸມມານແຫ່ງບຼູໄນໄດ້ຢືນຢັນຢ່າງເຕັມສ່ວນວ່າການຈັດງານວາງສະແດງສິນຄ້າຈີນອາຊຽນໄດ້ນຳເອົາຜົນປະໂຫຍດຕົວຈິງໃຫ້ແກ່ສອງຝ່າຍ.
ປະຈຸບັນ, ງານວາງສະແດງສິນຄ້າຈີນອາຊຽນແມ່ນວັນທີ່ສຸດໃນປະຕິທິນອາຊຽນ, ແຕ່ຈັດງານວາງສະແດງດັ່ງກ່າວໃນປີ2004ເປັນຕົ້ນມາ, ມັນໄດ້ເຕີບໂຕຂຶ້ນຢ່າງບໍ່ຢຸດຢັ້ງ, ໄດ້ສະໜອງແທ່ນວາງສະແດງໃຫ້ບໍລິສັດທີ່ດີທີ່ສຸດໃນພາກພື້ນອາຊຽນແລະຂອງຈີນຕະຫຼອດມາ, ພ້ອມກັນນັ້ນ, ກໍໄດ້ອຳນວຍໂອກາດໃຫ້ນັກທຸລະກິດພວກເຮົາດຳເນີນການເຈລະຈາວິຊາສະເພາະແລະແລກປ່ຽນບົດຮຽນແລະຄວາມເຫັນເຊິ່ງກັນແລະກັນ. ຂ້າພະເຈົ້າເຊື່ອວ່າງານວາງສະແດງສິນຄ້າຈີນອາຊຽນຍ່ອມຈະກາຍເປັນແທ່ນທີ່ດີເລີດ, ຊ່ວຍພວກເຮົາເກາະແຂນກັນເພື່ອສ້າງອະນາຄົດທີ່ດີງາມແລະຜາສຸກແກ່ປະຊາຊົນພວກເຮົາ.
ປະຈຸບັນ, ຈີນກັບອາຊຽນຕ່າງເປັນຄູ່ການຄ້າໃຫຍ່ອັນດັບທີ4ຂອງກັນ, ປີ2006, ຍອດມູນຄ່າການຄ້າລະຫວ່າງສອງຝ່າຍໄດ້ລື່ນກາຍ160ຕື້ໂດລາ, ຄາດວ່າຍອດມູນຄ່າການຄ້າໃນປີນີ້ຈະບັນລຸ190ຕື້ໂດລາ. ການສ້າງເຂດການຄ້າເສລີຈີນອາຊຽນພວມຢ່ວງບາດກ້າວໄປທິດຫັນການຄ້າແລະການລົງທຶນເປັນແບບເສລີ, ແບບສະດວກແລະແບບມີກົນໄກ. ເດືອນກໍລະກົດປີນີ້, ສັນຍາການຄ້າການບໍລິການໃນເຂດການຄ້າເສລີຈີນອາຊຽນເລີ່ມປະຕິບັດ, ປະຈຸບັນ, ສອງຝ່າຍຍັງຕັ້ງໜ້າຊຸກຍູ້ການເຈລະຈາກ່ຽວກັບສັນຍາການລົງທຶນ. ໃນກອງປະຊຸມສຸດຍອດກ່ຽວກັບການຄ້າແລະການລົງທຶນທີ່ຈັດຂຶ້ນຕາມຫຼັງນັ້ນ, ທ່ານເຈິ່ງເຜີຍແຢນ ຮອງນາຍົກລັດຖະມົນຕີຈີນໄດ້ກ່າວປາຖະກະຖາຫົວຂໍ້ຫຼັກ, ທ່ານຊີ້ອອກວ່າ, ສອງຝ່າຍຈີນກັບອາຊຽນຄວນສືບຕໍ່ເພີ່ມທະວີການສົນທະນາກ່ຽວກັບນະໂຍບາຍການລົງທຶນ, ຍາດແຍ່ງສິ້ນສຸດການເຈລະຈາກ່ຽວກັບສັນຍາການລົງທຶນໃນເຂດການຄ້າເສລີຈີນອາຊຽນໂດຍໄວ.
ໃນຖານເປັນເຂດຈຸດໜັກທີ່ວິສາຫະກິດຈີນກ້າວໄປສູ່ພາຍນອກ, ຈີນຈະເພີ່ມການລົງທຶນຕໍ່ປະເທດອາຊຽນ, ລວມທັງເຂດຮ່ວມມືເສດຖະກິດການຄ້າຫຼາຍແຫ່ງທີ່ປະເທດອາຊຽນສ້າງຕັ້ງຂຶ້ນ, ຊຸກຍູ້ໃຫ້ວິສາຫະກິດຈີນໄປທຸລະກິດຢູ່ປະເທດອາຊຽນ, ຕັ້ງໜ້າຕອບແທນສັງຄົມຢູ່ແຫ່ງນັ້ນ.
ຫົວຂໍ້ຂອງກອງປະຊຸມສຸດຍອດການຄ້າແລະການລົງທຶນຈີນກັບອາຊຽນຄັ້ງທີ4ແມ່ນ"ປະດິດສ້າງໃໝ່ແລະຮ່ວມມື---ເລັ່ງລັດຍົກສູງກຳລັງເຕີບໂຕຂອງພາກພື້ນ".ກ່ຽວກັບຫົວຂໍ້ນີ້,ທ່ານເຈິ່ງເຜີຍເຢັນກ່າວໃນເວລາກ່າວປາຖະກະຖາວ່າ,ເດືອນກໍລະກົດປີ2006,ຈີນແລະປະເທດກ່ຽວຂ້ອງຂອງອາຊຽນໄດ້ສະເໜີອອກໂຄງຄວາມຄຶດທີ່ເພີ່ມທະວີການຮ່ວມມືເສດຖະກິດບໍລິເວນອ່າວພາກເໜືອ,ການສະເໜີອອກແລະປະຕິບັດໂຄງຄວາມຄຶດນີ້ຈະມີຜົນດີຕໍ່ການຈໍ່ຕົວຂຶ້ນເປັນຈຸດເຕີບໂຕເສດຖະກິດອັນໃໝ່ພາຍໃນພາກພື້ນ.
ຄຳປາຖະກະຖາຂອງທ່ານເຈິ່ງເຜີຍເຢັນໄດ້ຮັບຄວາມເຫັນດີຈາກຜູ່ນຳປະເທດອາຊຽນທີ່ເຂົ້າຮ່ວມກອງປະຊຸມ.ໃນກອງປະຊຸມສຸດຍອດການຄ້າແລະການລົງທຶນ,ທ່ານບົວສອນ ບຸບຜາວັນນາຍົກລັດຖະມົນຕີລາວກ່າວວ່າ,ລາວຫວັງພ້ອມກັບຈີນຊຸກຍູ້ການຮ່ວມມືຮອບດ້ານຕື່ມອີກ.
ທ່ານຫງວນຕັນດຸງ ນາຍົກລັດຖະມົນຕີຫວຽດນາມກ່າວໃນຄຳປາໄສວ່າ,ຫວັງໃຫ້ຈີນແລະອາຊຽນສິ້ນສຸດການເຈລະຈາກ່ຽວກັບເຂດການຄ້າເສລີໂດຍໄວ,ແລະເຊັນສັນຍາໂດຍໄວ.
"ເຮັດແນວນີ້ພວກເຮົາກໍ່ຈະສາມາດດຳເນີນການຄ້າຫັນເປັນເສລີຕື່ມອີກ,ບໍ່ວ່າດ້ານບໍລິການຫຼືດ້ານການລົງທຶນ,ສອງຝ່າຍພວກເຮົາລ້ວນແຕ່ໄດ້ໃຫ້ຄຳໝັ້ນສັນຍາຕໍ່ເລື່ອງນີ້,ເມື່ອເປັນແນວນີ້,ພວກເຮົາບໍ່ພຽງແຕ່ສະໜອງຄວາມສະດວກໃຫ້ນັກລົງທຶນຂອງສອງຝ່າຍເທົ່ານັ້ນ,ພ້ອນກັນນັ້ນກໍ່ຈະເຮັດໃຫ້ພາກພື້ນນີ້ກາຍເປັນຈຸດຮຸ່ງທີ່ດູດດຶງການລົງທຶນມາຈາກພາກພື້ນອື່ນໆ."
|