|
ມູນຄ່າສົ່ງອອກທີ່ຕົກລົງໃນງານການຄ້າສິນຄ້າຂາເຂົ້າຂາອອກກວາງໂຈ່ວຄັ້ງທີ 102 ເພີ່ມຂຶ້ນ 2,9%
cri
ຕາມຂ່າວສານຊິ່ນຮວາ: ວັນທີ 30 ຕຸລານີ້, ງານການຄ້າສິນຄ້າຂາເຂົ້າຂາອອກຂອງຈີນຄັ້ງທີ 102 ທີ່ຈັດຂຶ້ນຢູ່ເມືອງກວາງໂຈ່ວໄດ້ອັດລົງ, ມູນຄ່າສົ່ງອອກທີ່ຕົກລົງແລ້ວໄດ້ສ້າງສະຖິຕິໃໝ່, ຄືມີເຖິງ 37 ຕື້ 450 ລ້ານໂດລາ, ເພີ່ມຂຶ້ນ 2,9% ເມື່ອທຽບໃສ່ງານການຄ້າລະດູໃບໄມ້ປົ່ງປີນີ້, ຫຼາຍກວ່າງານການຄ້າລະດູໃບໄມ້ຫຼົ່ນປີກາຍນີ້ 10%.
ທ່ານຊູບິ່ງ ຮອງເລຂາທິການໃຫຍ່, ທັງເປັນໂຄສົກຂອງງານການຄ້າກວາງໂຈ່ວແຈ້ງໃຫ້ຊາບວ່າ, ໃນງານການຄ້າຄັ້ງນີ້, ຜະລິດຕະພັນເຄື່ອງຈັກເອເລັກໂຕຼນິກຍັງແມ່ນພະລັງຕົ້ນຕໍທີ່ເຮັດໃຫ້ການຄ້າຂາອອກເພີ່ມຂຶ້ນ. ນອກນີ້, ມູນຄ່າສິນຄ້າຂາອອກປະເພດຕ່າງໆ, ເຊັ່ນ: ຜະລິດຕະພັນອຸດສາຫະກຳເບົາ, ແລະຜະລິດຕະພັນກະສິກຳເປັນຕົ້ນກໍ່ໄດ້ມີການເພີ່ມຂຶ້ນ.
ນັບແຕ່ງານການຄ້າກວາງໂຈ່ວເລີ່ມຈັດຂຶ້ນໃນປີ 1957 ມາຮອດປະຈຸບັນ, ໄດ້ກາຍເປັນງານວາງສະແດງສາກົນລວມທີ່ມີປະຫວັດສາດຍາວກວ່າໝູ່, ຂະໜາດໃຫຍ່ກວ່າໝູ່, ແລະໄດ້ຮັບຜົນດີກວ່າໝູ່ຂອງຈີນແລ້ວ.
|
|
