|
ສະບາຍດີ,ທ່ານຜູ່ຟັງທີ່ຮັກແພງ,ພົບກັນອີກແລ້ວກັບລາຍການດາວປະດັບຟ້າທາງCRIທີ່ອອກອາກາດເປັນປະຈຳທຸກໆວັນພະຫັດ.ໃນລາຍການດາວປະດັບຟ້າທຸກຄັ້ງທີ່ຜ່ານມາ,ດວງມະນີກໍໄດ້ສະເໜີກ່ຽວກັບດາລາໃນວົງການເພງຈີນ ພ້ອມທັງຈັດເພງມ່ວນໆຂອງເຂົາເຈົ້າສູ່ຟັງ.ສ່ວນໃນມື້ນີ້ກໍເຊັ່ນດຽວກັນ,ດວງມະນີຈະແນະນຳສູຮວາຍຢູ ນັກຮ້ອງໄຕ້ຫວັນທີ່ແຟນເພງເອີ້ນເຂົາວ່າເປັນລາຊີນີຂອງມວນຊົນ.ແຕ່ຕອນນີ້,ດວງມະນີຈະຂໍເລີ່ມຕົ້ນລາຍການມື້ນີ້ດ້ວຍເພງ ຂອງສູຮວາຍຢູ ໃນເພງ ຂ້ອຍແມ່ນສາວນ້ອຍ
ປ່ອຍເພງຂ້ອຍແມ່ນສາວນ້ອຍ
ທີ່ຈົບໄປນັ້ນແມ່ນເພງ ຂ້ອຍແມ່ນສາວນ້ອຍ ຂອງສູຮວາຍຢູ.ເພງນີ້ແມ່ນເພງໜຶ່ງໃນອາລະບ້ຳຊຸດທຳອິດຂອງນາງທີ່ອອກມາໃນປີ1998.ໃນເພງນີ້,ສູຮວາຍຢູໄດ້ນຳສະເໜີສາວນ້ອຍທີ່ໜ້າຮັກທັງມີນິໄສຊູຊີຂີ້ດຶ້ບໍ່ຟັງຄວາມຜູ່ອື່ນ.9ປີກ່ອນ,ກໍແມ່ນເພງ ຂ້ອຍແມ່ນສາວນ້ອຍ ເພງນີ້ແຫຼະ ເຮັດໃຫ້ ສູຮວາຍຢູມີຊື່ສຽງດົ່ງດັງຂຶ້ນໃນວົງການເພງຈີນ.ແຕ່ວ່າສູຮວາຍຢູເຂົ້າສູ່ວົງການເພງແມ່ນຍ້ອນໂອກາດບັງເອີນຄືໃນຕອນບ່າຍມື້ໜຶ່ງ,ອາກາດປອດໂປ່ງ,ສູຮວາຍຢູຊັກເຄື່ອງຢູ່ໃນເຮືອນຕາມປົກກະຕິ.ໃນເວລາຕາກເຄື່ອງຢູ່ລະບຽງເຮືອນ,ນາງຮ້ອງນຳເພງທີ່ເປີດໃນເທບ,ສຽງເພງຂອງນາງສົ່ງໄປທົ່ວເຂດຄຸ້ມເຮືອນ, ບັງເອີນ,ທ່ານວັ່ງຊ້ຽວລຽງ ຜູ່ຜະລິດດົນຕີທີ່ມີຊື່ສຽງຂອງໄຕ້ຫວັນໄດ້ຍິນ ,ເລີຍ ເຫັນພອນສະຫວັນຂອງສູຮວາຍຢູ,ແລ້ວພານາງເຂົ້າສູ່ບໍລິສັດແຜ່ນສຽງrolling stone.
ພາຍຫຼັງອາລະບ້ຳຊຸດທຳອິດທີ່ວາງອອກເມື່ອເດືອນມີນາປີ1998ໄດ້ຮັບຜົນສຳເລັດດີ,ໃນເດືອນສິງຫາປີດຽວກັນ,ສູຮວາຍຢູໄດ້ອອກອາລະບ້ຳຊຸດທີສອງ ທີ່ຊື່ວ່າບຸກໄປໜ້າ. ໂດຍອີງໃສ່ສະເໜ່ທີ່ທຳມະຊາດ,ສົດຊື່ນ,ໜ້າຮັກ,ບວກກັບສຽງຫວານແລະເສາະໃສ,ສູຮວາຍຢູໄດ້ພິຊິດໃຈຂອງແຟນເພງໄວລຸ້ນ. ອາລະບ້ຳ ແລ່ນໄປໜ້າ ຂາຍດີທີ່ສຸດ,ສູຮວາຍຢູຍິ່ງໄດ້ຮັບນາມມະຍົດຕ່າງໆເຊັ່ນ"ຫວານໃຈຊາຍໜຸ່ມ" "ລາຊີນີມວນຊົນ"ເປັນຕົ້ນ.ຕໍ່ໄປມາຟັງເພງ ຕິ່ງຕົ່ງ, ເພງດັງໃນອາລະບ້ຳດັ່ງກ່າວ. ຕິ່ງຕົ່ງ ຢູ່ທີ່ນີ້ໝາຍເຖິງສຽງກະຕິງປະຕູ. ເພງ ໄດ້ເວົ້າເຖິງສາວຜູ່ໜຶ່ງໃຈກ້າບີບກະຕິງປະຕູຂອງອ້າຍບ່າວເພື່ອສະແດງຄວາມຮັກຂອງຕົນຢ່າງກ້າຫານທີ່ສະທ້ອນໃຫ້ເຫັນທັດສະນະຄວາມຮັກທີ່ເຊື່ອໝັ້ນຕົນເອງແລະກົງໄປກົງມາ.ເພງນີ້ມີບັນຍາກາດໜ້າຮັກແລະຄຶກຄື້ນ,ເຊີນຟັງນຳກັນເລີຍ.
ປ່ອຍເພງສູຮວາຍຢູເກີດຢູ່ໃນຄອບຄົວທຳມະດາ,ນາງມີປະສົບການທີ່ໜ້າສົນໃຈຄືຖືກຄົ້ນພົບໃນເວລາທີ່ກຳລັງຕາກເຄື່ອງ ໃນຕອນທີ່ເປັນສາວນ້ອຍ,ແລ້ວກາຍເປັນນັກຮ້ອງທີ່ໃຜໆກໍຮູ້ຈັກ,ສະນັ້ນ,ແຟນເພງຈິ່ງເອີ້ນນາງເປັນ"ລາຊີນີມວນຊົນ".ແລະນັບແຕ່ເຂົ້າສູ່ວົງການເພງ,ສູຮວາຍຢູກໍສະແດງໃຫ້ເຫັນໂສມໜ້າທີ່ສົດຊື່ນ ມີພະລັງຊີວິດ,ມັກເຕັ້ນລຳຕະຫຼອດມາ,ສຽງເສາະໃສບວກກັບເພງເຕັ້ນທີ່ຕື່ນເຕັ້ນ,ເຮັດໃຫ້ນາງໃກ້ຊິດກັບແຟນເພງ,ແລະໄດ້ຮັບຄວາມນິຍົມຊົມຊອບຈາກແຟນເພງ. ນີ້ກໍແມ່ນສາເຫດອັນໜຶ່ງທີ່ແຟນເພງເອີ້ນນາງເປັນ"ລາຊີນີມວນຊົນ".ປີ2000,ສູຮວາຍຢູໄດ້ອອກອາລະບ້ຳຊຸດທີ4ຂອງຕົນທີ່ຊື່ວ່າlove.ເພງຕ່າງໆໃນອາລະບ້ຳໄດ້ບັນລະຍາຍຄວາມຮັກໃນແຕ່ລະດ້ານ.ໃນນັ້ນ,ເພງແຍກທາງກັນ ກໍແມ່ນເພງສະບາຍຄວາມໃນໃຈເພງໜຶ່ງທີ່ພັນລະນາຄວາມໂສກເສົ້າແລະທໍລະມານໃຈຂອງຄູ່ຮັກໃນເວລາແຍກທາງກັນ.ໃນເລລານຳສະເໜີເພງນີ້,ສຽງຮ້ອງຂອງສູຮວຍຢູປະສານກັນລະຫວ່າງສຽງທີ່ເສາະໃສໃນອາລົມທີ່ແສນເສົ້າ,ເຮັດໃຫ້ຊາບຊຶ້ງໃຈຜູ່ຟັງຫຼາຍ.ພາຍລຸນມາ,ເພງ ກໍໄດ້ກາຍເປັນເພງດັງກວ່າໝູ່ຂອງນາງ.
ປ່ອຍເພງແຍກທາງກັນ
ທີ່ຈົບໄປນັ້ນແມ່ນເພງ ແຍກທາງກັນ ເຊິ່ງຄັດເລືອກຈາກອາລະບ້ຳຊຸດທີ4ທີ່ຊື່ວ່າlove ຂອງສູຮວາຍຢູ.ເມື່ອກ່າວເຖິງອາລະບ້ຳຊຸດນີ້,ກໍຕ້ອງເວົ້າເຖິງເພງ ຢຽບຟອງທະເລ.ມິດລາຍການອາດຈະຄຸ້ນຫູດີ.ເພາະວ່າໃນລາຍການຕ່າງໆຂອງCRIໄດ້ເປີດເພງນີ້ເລື້ອຍໆ,ຍັງມີຜູ່ຟັງຂໍຟັງເລື້ອຍໆ.ດວງມະນີເອງກໍມັກເພງນີ້ຫຼາຍຄືກັນ.ຜູ່ຟັງຫຼາຍທ່ານມັກເພງນີ້ອາດແມ່ນຍ້ອນຈັງຫວະຕື່ນເຕັ້ນມ່ວນຊື່ນຂອງເພງນີ້.ແຕ່ທ່ານອາດຈະບໍ່ຮູ້ວ່າເນື້ອເພງນີ້ເວົ້າເຖິງຫຍັງ.ທີ່ຈິງແລ້ວ,ນີ້ແມ່ນເພງປະເພດຊີວິດໃນໄວຮຽນທີ່ອະມະຕະຂອງແຂວງໄຕ້ຫວັນຂອງຈີນ.ເພງນີ້ວາດພາບຄວາມມ່ວນຊື່ນຂອງຄົນທີ່ໄປທ່ຽວແຄມທະເລ,ຢຽບຟ້ອງທະເລຫຼີ້ນໃນຍາມລະດູປານໃໝ່ທີ່ປອດໂປ່ງ ເພື່ອສຳຜັດກັບທຳມະຊາດ.ເນື້ອເພງໄດ້ກ່າວເຖິງທ້ອງຟ້າສີຄາມ,ເມກຂາວ,ຟອງທະເລພ້ອມດ້ວຍດອກໄມ້ບານເຮືອງເຮືອຢູ່ເທິງພູແຄມທະເລ,ທັງໝົດເຫຼົ່ານີ້ເຮັດໃຫ້ ຮູ້ສຶກວ່າຕົວເອງເໝືອນດັ່ງໄດ້ໄປແຄມທະເລທີ່ສວຍງາມແທ້ໆ,ແລະເພີດເພີນໃຈທີ່ສຸດ.ທ່ານຜູ່ຟັງເຫັນດີນຳດວງມະນີບໍ່,ເພງມ່ວນໆຟັງຍາມໃດກໍບໍ່ເບື່ອ.ບັດນີ້,ມາຟັງເພງ,ເພື່ອສຳຜັດກັບທຳມະຊາດທີ່ສົດຊື່ນແລະສວຍງາມໃນສຽງເພງນີ້.
ປ່ອຍເພງຢຽບຟອງທະເລ
ປີ2002,ສູຮວຍຢູໄດ້ອອກອາລະບ້ຳຊຸດທີ5ທີ່ຊື່ວ່າmiss right ,ປີ2003,ໄດ້ອອກອາລະບ້ຳ ລວມເພງຮິດ. ການຮ້ອງເພງຂອງສູຮວາຍຢູໄປໄດ້ດີ,ບໍລິສັດໂຄສະນາຕ່າງໆກໍເຊີນນາງຖ່າຍສະປອດໂຄສະນາສິນຄ້າ.ນາງຍັງໄດ້ທົດລອງເປັນພິທີກອນລາຍການບັນເທີງທາງໂທລະພາບ.ພາຍຫຼັງປີ2003,ສູຮວາຍຢູໄດ້ເນັ້ນໄປໃນດ້ານການສະແດງຮູບເງົາແລະລະຄອນໂທລະພາບ,ນາງໄດ້ເປັນນາງເອກຫຼືຕົວປະກອບເດັ່ນໆຫຼາຍເລື່ອງ.ນາງບອກວ່າ,ການພັດທະນາໃນຫຼາຍດ້ານເຮັດໃຫ້ຕົວເອງໄດ້ຮຽນຮູ້ຫຼາຍສິ່ງຫຼາຍຢ່າງ,ທັງໄດ້ເປີດກວ້າງວຽກງານສິລະປະການສະແດງຂອງຕົນ.ໃນວົງການເພງປັດຈຸບັນ,ນັກຮ້ອງນ້ອງໃໝ່ເກີດຂຶ້ນຫຼາຍ,ຖ້າວ່າຕົວເອງບໍ່ມີການພັດທະນາກໍຈະຫຼ້າຫຼັງ.ນາງຢາກເປັນສິລະປິນທີ່ມີຄວາມສາມາດຫຼາຍດ້ານ.ເຫັນໄດ້ວ່າ,ຄວາມສຳເລັດຜົນຂອງສູຮວາຍຢູບໍ່ພຽງແຕ່ແມ່ນຍ້ອນຄວາມໂຊກດີເທົ່ານັ້ນ,ແຕ່ສ່ວນໃຫຍ່ແມ່ນຍ້ອນນາງທຳຄວາມພະຍາຍາມແລະທ້າທາຍຕົວເອງຢ່າງບໍ່ຢຸດຢັ້ງ.
ເດືອນພຶດສະພາປີນີ້,ພາຍຫຼັງອຳລາຈາກວົງການເພງ5ປີ,ສູຮວຍຢູໄດ້ນຳເອົາອາລະບ້ຳຊຸດໃໝ່ທີ່ຊື່ວ່າ"bad girl" ກັບຄືນສູ່ວົງການເພງ.ສ່ວນນາງເອງກໍໄດ້ຈາກສາວນ້ອຍທີ່ໄຮ້ດຽງສາໃນເມື່ອກ່ອນກາຍມາເປັນສາວໃຫຍ່ເຕັມໂຕ.ເພງຕ່າງໆໃນອາລະບ້ຳຊຸດໃໝ່ ມີລັກສະນະຂອງສາວໃຫຍ່ເພີ່ມຂຶ້ນເມື່ອທຽບກັບອາລະບ້ຳໃນເມື່ອກ່ອນ.ໃນອາລະບ້ຳຊຸດໃໝ່,ມີເພງໜຶ່ງຊື່ວ່າ ຄວາມເສຍດາຍໃນໃຈ ນີ້ແມ່ນເພງສະບາຍອາລົມທີ່ສູຮວາຍຢູມັກທີ່ສຸດ.ຕໍ່ໄປຈະໃຫ້ມິດລາຍການສຳຜັດໂດຍຕົວເອງວ່າ ສູຮວາຍຢູ່ມີຄວາມປ່ຽນແປງຫຍັງແດ່ໃນທ່າມກາງສຽງເພງ .
ປ່ອຍເພງຄວາມເສຍດາຍໃນໃຈ ເມື່ອກີ້ນີ້ດວງມະນີໄດ້ແນະນຳສູຮວາຍຢູ ນັກຮ້ອງໄຕ້ຫວັນພ້ອມດ້ວຍເພງຂອງນາງ,ຫວັງວ່າຄົງຈະຖືກໃຈທ່ານຢູ່ຕິ໋ເນາະ! ເວລາຜ່ານໄປໄວຫຼາຍ,ລາຍການດາວປະດັບຟ້າໃກ້ຈະໄດ້ອຳລາຈາກທ່ານແລ້ວ.ໃນຕອນທ້າຍລາຍການ,ດວງມະນີຈະມອບອີກເພງໜຶ່ງໃນອາລະບ້ຳຊຸດໃໝ່ຂອງສູຮວາຍຢູ,ຄືເພງ ແປວ່າ "ງານແຂ່ງຂັນການຟ້ອນ". ເພງນີ້ໄດ້ເລົ່າເຖິງສາວຊົນນະບົດຜູ່ໜຶ່ງເດີນທາງເຂົ້າເມືອງເພື່ອເຂົ້າຮ່ວມງານແຂ່ງຂັນການຟ້ອນ,ສາວຜູ່ນີ້ໄດ້ສະແດງຄວາມສາມາດການຟ້ອນອັນຍອດຢ້ຽມຂອງຕົນດ້ວຍຄວາມໝັ້ນໃຈສູງ.ໄປພ້ອມໆກັບສຽງເພງທີ່ຕື່ນເຕັ້ນມ່ວນຊື່ນເພງນີ້,ລາຍການດາວປະດັບຟ້າຄືນນີ້ຂໍອຳລາທ່ານໄປກ່ອນ,ດວງມະນີຂອບໃຈນຳທ່ານທີ່ຕິດຕາມຮັບຟັງແລະໃຫ້ການສະໜັບສະໜູນຕໍ່ລາຍການນີ້, ຄືນວັນພະຫັດໜ້າ,ເວລາເກົ່າຈິ່ງຈະກັບມາພົບກັບທ່ານອີກ,ສະບາຍດີ!
|
